د خیبر پښتونخوا اعلی وزیر سهیل اپرېدي، په دغه ایالت کې د امنیتي وضعیت په اړه د خبرو پر مهال ادعا کړې چې د عمران خان د حکومت تر نسکورېدو وروسته ځینو پاکستاني جنرالانو په پښتونخوا کې د ناامنۍ د رامنځته کولو پرېکړه کړې وه.
نوموړي د یکشنبې په ورځ د پېښور په نشتر هال کې یوې غونډې ته د وینا پر مهال وویل: «هره نوې بهرنۍ ازموینه چې کېږي، له خیبر پښتونخوا څخه پیلېږي. په پردۍ جګړه کې د ښکېلتیا پرېکړه د جنرال (پروېز مشرف) وه. ترهګري زموږ سیمې ته راوړل شوه او زموږ ۸۰ زره ځوانان قرباني شول».
هغه زیاته کړه، له دغو قربانیو وروسته سوله ټینګه شوه، خو د عمران خان د حکومت له نسکورېدو وروسته یوه بله پالیسي جوړه شوه او ځینو جنرالانو پرېکړه وکړه چې په پښتونخوا کې به یو ځل بیا امنیتي وضعیت خرابېږي.
سهیل اپرېدي وویل: «موږ خبرداری ورکاوه چې وسلهوال را روان دي، په ایالت کې به ناامني او وراني رامنځته شي. که ډالرې ګټئ، ویې ګټئ، خو د پښتونخوا د خلکو د وینو په بیه یې مه ګټئ».
هغه پوځ ته په اشارې سره وویل چې د پښتونخوا وضعیت د دوی له کنټروله وتلی دی. د هغه په وینا، پخوا یې هم په پښتونخوا او بلوچستان کې ناامني رامنځته کړې وه او اوس دواړه ایالتونه د دوی له کنټروله وتلي دي.
نوموړي د کورنیو چارو د مرکزي وزیر محسن نقوي هغې څرګندونې ته هم اشاره وکړه چې ویلي یې وو د حکومتولۍ نظام «پرېوتی» دی. سهیل اپرېدي وویل: «که پوځ په تېرو ۷۸ کلونو کې د پاکستان برخلیک بدلولای شوای، نو نن به وزیر د نظام د پرېوتو خبره نه کوله».
هغه په پای کې، یو ځل بیا پوځ ته په اشارې سره وویل: «د سرحدونو ساتونکي سیاسي پرېکړې کوي، او هغه کسان چې د امنیت ټینګول یې دنده ده، په سیاسي جوړجاړو بوخت دي. په داسې وضعیت کې د نظام کمزوري کېدل طبیعي خبره ده».
