د کونړ پوهنتون محصل: طالبان د ږیرې نه لرلو له امله له محصلانو د لیلیې کارتونه اخلي
د کونړ د سید جمالالدین افغان پوهنتون یوه محصل افغانستان انټرنشنل- پښتو ته ویلي چې د طالبانو د امر بالمعروف ماموران د محصلانو ږیرې ګوري او د هغو کسانو د پوهنتون او لیلیې کارتونه اخلي چې ږیره یې لنډه کړې وي.
د دغه محصل په وینا، د امر بالمعروف کسان په طعامخانه کې ناست وي او هلته د محصلانو ظاهري بڼه څاري. دی وايي، له یوې میاشتې وروسته یوازې هغه مهال کارت بېرته ورکول کېږي چې محصل خپله ږیره پرېښې وي. د هغه په خبره، که محصل دا شرط پوره نه کړي، له پوهنتون او لیلیې د ایستلو له ګواښ سره مخ کېږي.
محصل وايي، د کارتونو اخیستلو له امله ځینې لیلیهمېشتي محصلان له خوراک او استوګنځي بېبرخې شوي دي. هغه ادعا کوي چې د دغو فشارونو له امله یو شمېر محصلانو پوهنتون هم پرېښی دی.
د هغه په خبره، په پوهنتون کې ږیره او لونګۍ یا خولۍ جبري دي. دی وايي، که محصل کندهارۍ خولۍ ونه لري، غیرحاضرېږي، له ازموینې منع کېږي یا د ایستلو له ګواښ سره مخ کېږي. نوموړی زیاتوي چې د محصلانو د ظاهري بڼې د څارلو لپاره ځانګړی کمېسیون جوړ شوی او غړي یې کله ناکله د محصلانو مخونه لمسوي څو وګوري ږیره یې خرییلې ده که نه.
د یادونې وړ ده چې دا یوازې د کونړ پوهنتون د یوه محصل روایت دی، افغانستان انټرنشنل یې په خپلواکه توګه نه تاییدوي.
افغانستان انټرنشنل تر دې مخکې راپور ورکړی و چې طالبانو په پکتیا او ننګرهار کې د دولتي پوهنتونونو او په کابل کې د ځینو خصوصي پوهنتونونو له محصلانو ژمنلیکونه اخیستي چې ږیرې به پرېږدي او د امر بالمعروف قانون به عملي کوي.
