په ایټالیا کې د افغانستان سفارت د ملګرو ملتونو له امنیت شورا او نړیوالې ټولنې غوښتي چې پر پاکستان بیړني فشارونه راوړي، څو پر افغان خاوره خپل بریدونه سملاسي ودروي او د ملکي تلفاتو مخه ونیسي.
د تېر جمهوري نظام دغه سفارت چې له طالبانو سره له تعامل پرته فعالیت کوي؛ د جمعې په ورځ (د تلې ۱۰مه) په یوې اعلامیه کې د کونړ پر شلتن او د هلمند پر ګرمسېر ولسوالیو د پاکستان وروستي هوایي بریدونه چې پهکې د ښځو او ماشومانو په ګډون ۱۰ ملکیان وژل شوي او ۱۱ نور ټپیان دي، غندلي دي.
اعلامیه، سیمې ته د قطر او ترکیې د استخباراتي مشرانو وروستي سفرونه د طالبانو او پاکستان د منځګړتوب له هڅو سره تړلې بولي، خو زیاتوي، چې افغانستان په دې نازک پړاو کې تر دې هڅو لا زیاتو جدي سیاسي حل لارو او یوه «ټاکل شوي او ټول ګډونه» حکومت ته اړتیا لري.
د افغانستان دغه سفارت، پاکستان تورن کړی، چې په افغانستان کې د « ستراتیژیکې ژورتیا» د پالېسۍ له مخې یې، د طالبانو ډله د جګړو او نیابتي موخو لپاره کاروله او ترهګر یې په «ښو» او «بدو» وېشلي وو، خو اوس ترې شکایتونه لري.
په ایټالیا کې د افغانستان سفارت ټینګار کړی، چې د پاکستان د هوایي بریدونو د مخنیوي او په افغانستان کې د دوی په خبره، د ترهګرو ډلو د موجودیت او خطر پای ته رسولو لپاره باید ملګري ملتونه، اروپایي ټولنه او د اسلامي همکاریو سازمان له سیمهییزو لوبغاړو سره په ګډه د افغانستان د سیاسي حل لپاره لاس په کار شي.
پر افغان خاورې د پاکستان بریدونه ګڼو نورو افغان لوریو هم غندلي او د حل لپاره یې خپلې غوښتنې وړاندې کړي، خو د طالبانو مشر ملاهبتالله اخوند زاده او نورو لوړپوړو چارواکو په دې اړه خپلې چوپتیا ته دوام ورکړی، چې له امله یې له سختو نیوکو سره مخ شوي دي.
له دې سربېره، پر افغانستان د پاکستان وروستي بریدونه هېڅ هېواد هم نهدي غندلي.
