په جوزجان کې د طالبانو د امنیې قوماندانۍ ویاند عبدالستار حلیمي خبر ورکړی، چې د جوزجان – بلخ پر عمومي لویه لار د یوې ترافیکي پېښې له امله یو کس مړ او څلور نور ټپیان شوي دي. د هغه په وینا، پېښه نن له غرمې وروسته د فیضاباد ولسوالۍ په ګرجګ سیمه کې شوې ده.
نوموړي زیاته کړې، چې ټپیان د درملنې لپاره روغتیايي مرکزونو ته لېږدول شوي او د پېښې لامل یې د موټر چلوونکو بېاحتیاطي بلل شوی دی.
په افغانستان کې د طالبانو له بیا واکمنېدو وروسته پاکستان ته کډوال شوي افغان سندرغاړي او هنرمندان وايي، چې په دغه هېواد کې له سختو اقتصادي او ټولنیزو ستونزو سره مخ دي او د خپل راتلونکي په اړه ډاډه نهدي.
افغان سندرغاړي سعیدالله وفا افغانستان انټرنشنل پښتو ته ویلي، چې ماشومان یې له زدهکړو بېبرخې دي، ازاد تګراتګ نهشي کولی او له سختو اقتصادي ستونزو سره ژوند تېروي.
د هغه په وینا، دوی نه په افغانستان او نه هم په پېښور کې فکري ازادي لري او تر فشارونو لاندې ژوند کوي. وفا وايي، دامهال شاوخوا د ۵۰۰ افغان هنرمندانو کورنۍ په پېښور او کوټه کې مېشتې دي چې له بېلابېلو ستونزو سره لاس او ګرېوان دي.
د نوموړي په خبره، په پېښور کې د مېشتو ۱۰۹ هنرمندانو کورنیو عالي محکمې ته عریضې کړې دي؛ څو افغانستان ته د دوی د جبري ستنولو مخه ونیسي. هغه زیاته کړې، په پېښور کې د «هنري ټولنې» په نوم بنسټ له دغه کورنیو سره د محکمې تر بهیر پورې مرسته کړې او له محکمې یې غوښتي چې د دغه هنرمندانو د اېستلو مخه ونیسي؛ ځکه په افغانستان کې د هغوی ژوند له جدي ګواښ سره مخ دی.
د پېښور عالي محکمې د ۲۰۲۶کال د اکتوبر په پنځمه د پاکستان اړوندو چارواکو ته لارښوونه کړې، چې د افغان هنرمندانو د ویزو اړوند غوښتنلیکونه وڅېړي. د «هنري ټولنې» د خبرپاڼې له مخې، محکمې امر کړی چې دغه بهیر باید د قانون له اصولو سره سم په ۶۰ ورځو کې بشپړ شي.
وفا وايي، محکمې دوی ته یو رسمي لیک هم ورکړی، چې له مخې یې پولیس نه شي کولی هغوی ونیسي یا وځوروي. د هغه په خبره، له دې پرېکړې وروسته د پولیسو چلند ورسره تر یوه بریده نرم شوی دی.
وفا ټینګار کړی، چې افغانستان ته بېرته نهشي ستنېدای؛ ځکه هلته نه یوازې د دوی پر هنر او کار بندیزونه لګېدلي، بلکې د ماشومانو د زدهکړو مخه یې هم نیول شوې ده. هغه ویلي، چې درېیمو هېوادونو ته د لېږد په تمه دي او په دې اړه یې غوښتنلیکونه هم سپارلي دي.
وفا ادعا کړې: «طالبانو په افغانستان کې ګڼ هنرمندان نیولي، زنداني کړي او توبې یې پرې اېستلې دي». د هغه په وینا، طالبانو په خوست او لوګر ولایتونو کې د موسیقۍ سلګونه الې هم سوځولې دي؛ دا هغه اقدامات دي چې د افغانستان د موسیقۍ او هنر راتلونکی یې له ګواښ سره مخ کړی دی.
د «هنري ټولنې» مشر راشد احمد خان هم ویلي، چې اوسمهال په پېښور او کوېټه کې د افغان هنرمندانو، سندرغاړو او د هغوی د کورنیو د غړو شمېر له ۸۰۰ تر ۱۰۰۰ پورې رسېږي.
د هغه په وینا، دغه ټولنه د افغان هنرمندانو د حقونو د دفاع او افغانستان ته د هغوی د جبري ستنولو د مخنیوي لپاره هڅې کوي او د محکمې پرېکړې د دې زمینه برابره کړې، چې دغه هنرمندان په جبري توګه افغانستان ته ونه اېستل شي.
راشد احمد خان د افغان هنرمندانو پر وړاندې د پاکستان د حکومت د تګلارې په اړه ویلي، دولتي او امنیتي ادارې په ښکاره وايي هنرمندان نه ځوروي؛ خو بیا هم پولیس هغوی نیسي او دوی یې د خوشې کولو لپاره د محکمې دروازې ټکوي.
هغه ټینګار وکړ، چې د «افغان هنرمندانو په اړه د پاکستان حکومت هېڅ روښانه تګلاره نهلري». راشد احمد خان د اندېښنې په څرګندولو خبرداری ورکړی، چې ښايي په راتلونکي کې د افغانستان اصیله او دودیزه موسیقي لهمنځه لاړه شي.
د سکاینیوز عربي څانګې د عراق د یوه استخباراتي راپور په حواله لیکلي، چې د دغه هېواد له شمال څخه تېل ایران ته قاچاق کېږي او تر چاڼ وروسته په افغانستان کې پلورل کېږي. د راپور له مخې، د قاچاقي تېلو یوه برخه ترکیې ته هم لېږدول کېږي.
د سکاینیوز عربي څانګې ویلي، چې د دغه استخباراتي راپور یوه نسخه یې ترلاسه کړې ده. د دغه راپور له مخې چې د سېشنبې په ورځ خپور شوی، افغانستان او ترکیه د عراق د قاچاق شويو تېلو د پلور له مهمو بازارونو دي.
د راپور په ټکو، د کردستان په سیمهییزه اداره کې فعالې شبکې د کرکوک او سلیمانیه د تېلو له زېرمو څخه په پراخه کچه خام تېل او نفتلرونکي مواد قاچاق کوي. دغه جوپې د کوچنیو او منځنیو ټانکرونو پرمټ له ځمکنیو لارو ایران ته لېږدول کېږي. د راپور له مخې، د ټانکرونو تګراتګ د باشماق او پروېزخان له سرحدي لارو په اسانۍ ترسره کېږي.
د راپور پربنسټ، د عراق قاچاق شوي تېل په ایران کې تصفیه کېږي یا د دغه هېواد له تولید شويو نفتلرونکو موادو سره ګډېږي او وروسته د ایراني محصولاتو په نوم پلورل کېږي. د سکاینیوز عربي څانګې د دغه کار موخه له بندیزونو تېښته بللې؛ خو دا یې نهده په ډاګه کړې چې دغه بهیر څنګه د بندیزونو په مخنیوي کې مرسته کوي.
دغه رسنۍ لیکلي، چې نفتلرونکي مواد د کیفیت د ښهوالي یا بدلولو لپاره هم پروسس کېږي او له ایراني نفتلرونکو محصولاتو سره یې ګډول د دغه بهیر مهمه برخه ده. په راپور کې د افغانستان په بازار کې د انرژۍ لوړه تقاضا د دغه توکو د پلور یو له اصلي لاملونو بلل شوې ده.
دغه جوپې د ایراني ټانکرونو پر مټ د ایران له ختیځو ښارونو څخه د افغانستان سرحد ته لېږدول کېږي او تر سرحدي دروازو له اوښتو وروسته په لویو زېرمتونونو کې خالي کېږي. دغه زېرمتونونه له پولې سره نږدې ښارونو کې موقعیت لري او د افغان خصوصي واردوونکو شرکتونو لهخوا اداره کېږي.
وروسته دغه نفتلرونکي مواد د کوچنیو بار وړونکو موټرو پرمټ د افغانستان ښارونو او ولایتونو کې د تېلو پمپونو او مصرفوونکو ته رسول کېږي.
د راپور له مخې، قاچاق شبکې د عراق د هغه سرحدي سیمو له لارو ګټه اخلي چې ایران او ترکیې ته نږدې دي او د عراق د مرکزي حکومت تر کنټرول لاندې نهدي. د یادې جوپې یوه برخه ترکیې ته هم لېږدول کېږي او هلته پلورل کېږي.
ورته مهال له پاکستان سره د سوداګریزو محدودیتونو له امله د افغانستان د بازار تکیه پر ایران زیاته شوې ده. د نړۍوال بانک د راپور له مخې، ایران د ۲۰۲۶کال په فبرورۍ کې د افغانستان د شاوخوا ۳۱ سلنه وارداتو په برابرولو سره دغه هېواد ته تر ټولو لوی صادرونکی و. له پاکستان سره د لارو تر تړل کېدو وروسته، د افغانستان شاوخوا ۶۰ سلنه واردات له ایران یا د دغه هېواد له لارې برابر شوي دي.
د روسیې د امنیت شورا منشي سرګي شویګو د منځنۍ اسیا د هېوادونو لپاره د افغانستان پر ثبات ټینګار کړی او په افغانستان کې یې د طالبانو له ادارې سره د رغنده همکارۍ غوښتنه کړې ده.
شویګو د دوشنبې په ورځ (د لړم ۱۸مه) د ګډو ګټو د خپلواکو دولتونو ټولنې د غړو هېوادونو د امنیت شوراګانو د منشیانو په څوارلسمه کلنۍ غونډه کې ویلي، چې د منځنۍ اسیا وضعیت په مستقیم ډول د افغانستان له ثبات څخه اغېزمنېږي.
هغه ټینګار کړی، چې په همدې چوکاټ کې په کابل کې د طالبانو له ادارې سره د رغنده همکارۍ رامنځته کول د امنیت، اقتصاد او سیمهییز پرمختګ په برخو کې د ګډو ننګونو د حل لپاره ارزښت
لري.
د روسیې د امنیت شورا منشي ویلي، چې د منځنۍ اسیا وضعیت له نسبي ثبات سره، سره لاهم له جدي امنیتي ګواښونو سره مخ دی. د هغه په وینا، ترهګري، افراطیت، په ځانګړي ډول مذهبي افراطیت او د نشهیي توکو قاچاق د یادې سیمې له مهمو ګواښونو څخه دي.
په وروستیو کلونو کې د مسکو او د طالبانو د ادارې اړیکې پراخې شوې دي او دواړه لوري هڅه کوي، چې خپلې سیاسي، اقتصادي او پوځي همکارۍ لا پیاوړې کړي.
د افغانستان په چارو کې د روسیې د ولسمشر ځانګړي استازي ضمیر کابلوف د سېشنبې په ورځ (د لړم ۱۹مه) په کابل کې د طالبانو د بهرنیو چارو له وزیر امیرخان متقي سره لیدلي دي.
د طالبانو د بهرنیو چارو وزارت ویلي، چې دواړو لورو د دوهاړخیزو اړیکو پر پراختیا، د سوداګریزو راکړو ورکړو پر زیاتوالي او له اقتصادي فرصتونو څخه د ګټې اخیستنې په اړه خبرې کړې دي.
همدارنګه، ټاکل شوې ده چې د روسیې یو لوړپوړی پلاوی د دغه هېواد د لومړي وزیر د مرستیال الکسي اوورچوک په مشرۍ کابل ته سفر وکړي. ویل شوي، چې د دغه سفر موخه د دواړو لورو ترمنځ د سوداګریزو او اقتصادي همکاریو د پراختیا په اړه خبرې اترې دي.
ضمیر کابلوف تر دې مخکې ویلي و، چې د ۲۰۲۶کال په لومړیو شپږو میاشتو کې د روسیې او افغانستان ترمنځ د سوداګرۍ کچه د تېرکال د ورته مودې پرتله دوه برابره شوې ده.
په پوځي برخه کې هم روسیې او طالبانو د روان کال د مئ میاشتې په ۲۷مه د پوځي او تخنیکي همکاریو هوکړهلیک لاسلیک کړ. دغه هوکړهلیک مسکو ته د طالبانو د دفاع وزیر یعقوب مجاهد د سفر پرمهال او د سرګي شویګو په حضور کې لاسلیک شو. د طالبانو چارواکو ویلي، چې دغه هوکړهلیک پر تخنیکي همکاریو، د پوځي تجهیزاتو پر ساتنې او ترمیم تمرکز لري.
روسیې د ۲۰۲۵کال د جولای په څلورمه د طالبانو اداره په رسمیت وپېژندله او په دې توګه لومړنی او تراوسه یوازینی هېواد شو، چې دغه اداره یې په رسمي توګه په رسمیت پېژندلې ده. مسکو تر دې مخکې، د همدې کال په اپرېل میاشت کې د طالبانو نوم د خپلو ترهګرو ډلو له نوملړه هم ایستلی و.
د ترکیې د وان ښار د وکیلانو ټولنې د یوې خبرپاڼې په خپرولو د دغه هېواد د کورنیو چارو له وزارت غوښتي، چې د ترکیې او ایران پر پوله د لږترلږه اتو افغان کډوالو د وژل کېدو په اړه څېړنې پیل کړي.
یادې ټولنې ویلي، د دغه کډوالو د وژل کېدو خبر تر خپرېدو وروسته یې استازي د وان ښار څارنوالۍ ته ورغلي دي. د وان د وکیلانو ټولنې د سېشنبې په ورځ (د لړم ۱۹مه) ویلي، چې د دغه اتو کډوالو د وژل کېدو لامل روښانه کولو لپاره یې قضايي څار پیل کړی دی.
یادې ټولنې د ترکیې د کورنیو چارو له وزارت هم غوښتي، چې دغه پېښه په هر اړخیز ډول وڅېړي.
د وان د وکیلانو ټولنې په خبرپاڼه کې راغلي، وروسته له هغې چې د اوزالپ ولسوالۍ د یوکاری تولګالي او اشاغي تولګالي کلیو ترمنځ په یوه سیمه کې د اتو کسانو د مړو د موندلو راپورونه خپاره شول، د یادې ټولنې استازي د دغه ولسوالۍ څارنوالۍ ته ورغلي دي.
یاددې ټولنې زیاته کړې، چې د دغې لیدنې پرمهال یې د قضیې د قضايي بهیر په اړه معلومات ترلاسه کړي دي. د وان د وکیلانو ټولنې په وینا، د دغه کډوالو د وژل کېدو لامل لاهم په بشپړ ډول نهدی روښانه شوی او قضیه د محرميت تر حکم لاندې ده.
نوموړې ټولنې ټینګار کړی، چې دغه قضیه باید نه یوازې له قضايي اړخه؛ بلکې د بشري حقونو له نظره هم وڅېړل شي. ترکي رسنیو په خپلو لومړنیو راپورونو کې د یوکاري تولګالي کلي ته څېرمه د اتو ځوانانو د مړو د موندلو خبر ورکړی و؛ خو هویت یې نامعلوم بللی و. خو د وان د وکیلانو ټولنې په خپله خبرپاڼه کې په څرګنده ویلي، چې دغه کسان د افغانستان تابعیت لرونکي کډوال دي.
افغانستان انټرنشنل ته سرچینو د یکشنبې په ورځ ( لړم ۱۷مه) د ترکیې او ایران پر پوله د اتو افغان کډوالو د مړو یوه ویډیو استولې وه. په دې ویډیو کې د اتو ځوانانو مړي لیدل کېږي، چې زنې یې تړل شوې دي.
هغه کس چې دغه ویډیو یې ثبت کړې، په افغانۍ لهجه وايي: «سلام وروره! دا مساپر دي».
په ترکیه کې د کډوالو ټولنې هم له افغانستان انټرنشنل سره په خبرو کې د دغو اتو کسانو مړینه تایید کړې ده. یادې ټولنې ویلي، تر اوسه په وان ښار کې مېشتو افغانانو ته اجازه نه ده ورکړل شوې چې د مړیو د پېژندلو یا لیدلو لپاره روغتون ته ورشي.
ترکي رسنیو راپور ورکړی، چې د دغه کسانو مړي د وان ولایت د اوزالپ ولسوالۍ اړوند د یوکاري تولګالي سیمې ته څېرمه، د ایران له پولې شاوخوا درې کیلومتره لرې موندل شوي دي.
وان؛ له ایران نه ترکیې ته د کډوالۍ یوه مهمه لار
وان ولایت د ترکیې په ختیځ کې موقعیت لري او له ایران سره شاوخوا ۲۹۵ کیلومتره ګډه پوله لري. دغه ولایت د خپل جغرافیایي موقعیت له امله، له ایران نه ترکیې ته د کډوالو د ننوتلو او د دغه هېواد لوېدیځو ښارونو او اروپا ته د هغوی د لېږد یوه مهمه لار ده.
د وان ښار چې د دغه ولایت مرکز دی، د وان جهیل ترڅنګ پروت دی. د اوزالپ، چالدران او باشقلعه سرحدي ولسوالۍ د دغه ولایت له مهمو سیمو څخه دي، چې د غرني جوړښت او سختو لارو له امله، له معتبرو اسنادو پرته د کډوالو تګراتګ پهکې له جدي ګواښونو سره مل وي.
د انساني قاچاق شبکې هم د دغه سیمو له ځینو سرحدي لارو څخه د کډوالو د لېږد لپاره کار اخلي.
افغانستان انټرنشنل د لږ تر لږه یوه عیني شاهد او د دوو قربانیانو د کورنیو له غړو سره د خبرو له لارې موندلې، چې د ترکیې او ایران پر پوله د وژل شویو افغان کډوالو شمېر ښايي له هغو اتو کسانو ډېر وي چې په تېرو ورځو کې یې د موندل شویو مړو خبر خپور شوی و.
منیر خان صافي افغانستان انټرنشنل ته ویلي، چې ورور یې حامد صافي د پنجشنبې په شپه د ایران او ترکیې په سرحدي سیمه کې ژوند له لاسه ورکړی دی. د هغه په وینا، د حامد مړینه له هغو اتو کډوالو جلا پېښه ده چې تر دې مخکې یې د موندل شویو مړو خبر خپور شوی و.
د دغو اتو کسانو مړي اوس د ترکیې په وان ښار کې دي. افغانستان انټرنشنل داسې اسناد هم لیدلي، چې ښيي حامد د عبدالقیوم زوی شاوخوا ۲۲ کلن او د کندوز ولایت د امامصاحب ولسوالۍ اوسېدونکی و.
د حامد کورنۍ وايي، د هغه مړی اوس د ایران په خاوره کې د چالدران سرحدي سیمې په یوه دولتي سړه خونه کې ساتل کېږي. افغانستان انټرنشنل د حامد د مړي انځور هم لیدلی دی.
افغانستان انټرنشنل نور انځورونه هم لیدلي، چې د دغه ځوان د کورنۍ په وینا، ترکیې ته تر تګ مخکې د چالدران په سیمه کې اخیستل شوي دي.
۲۰ کلن جنید له افغانستان انټرنشنل سره په خبرو کې د ترکیې سرحدي پولیس او قاچاق کوونکي د کډوالو پر وړاندې په ناوړه چلند او تاوتریخوالي تورن کړي دي. هغه ویلي، چې د پنجشنبې په شپه له حامد سره یوځای د چالدران په سیمه کې د ترکیې له سرحدي دېوال څخه واوښتل؛ خو د ترکیې خاورې ته تر ننوتلو وروسته د دغه هېواد د سرحدي ځواکونو لاس ته ورغلل.
د جنید په وینا، سرحدي ځواکونو ورسره ناوړه چلند کړی او وهلي یې دي. هغه ادعا کړې، چې سرتېرو کډوال اړ کړي وو، په سړه هوا کې پر واورو ودرېږي او پر بربنډو بدنونو یې سړې اوبه ور وشیندي. د ترکیې سرحدي پولیس هم تورن شوي، چې د کډوالو جامې یې په بشپړ ډول ترې ایستلې او وروسته یې د سرحدي دېوال له پاسه بېرته د ایران لوري ته اړولي دي.
جنید ویلي، دی او حامد له څو ساعتونو پلي مزل وروسته په سړه هوا کې بېهوښه شوي وو. د هغه په وینا، کله چې بېرته په هوښ راغی، ویې لیدل چې یوې خونې ته لېږدول شوی او حامد ساه ورکړې ده.
افغانستان انټرنشنل په خپلواکه توګه نه شي تاییدولی، چې د حامد د مړینې اصلي لامل څه و.
د هوا پېژندنې د معلوماتو له مخې، د پنجشنبې او تېرې جمعې په شپه د چالدران په سیمه کې د هوا تودوخه نږدې صفر درجې سانتيګراد ته راټیټه شوې وه. د ورځې په اوږدو کې د تودوخې درجه شاوخوا له پنځو تر لسو درجو پورې وه.
د حامد کورنۍ وايي، د قاچاقکوونکو ناوړه ګټه اخیستنه او باج اخیستنه، هغه څه چې دوی یې د ترکیې د سرحدي ځواکونو شکنجه او تاوتریخوالی بولي، د کډوالو جبري بېرته ستنول او سخته یخني د هغه په مړینه کې ونډه لري. خو د حامد د مړینې لامل تر اوسه په خپلواکه توګه نه دی تایید شوی.
د جنید او د حامد د کورنۍ روایت د هغو مواردو له ډلې دی، چې افغانستان انټرنشنل د ترکیې او ایران پر پوله د کډوالو د وضعیت په اړه څېړلي دي. د نورو کډوالو تجربې او د هغوی د مړینې لاملونه ښايي توپیر ولري.
په تېرو څو ورځو کې یو شمېر افغان کډوالو افغانستان انټرنشنل ته د ویډیوګانو په لېږلو سره د ترکیې په سرحدي سیمو کې له تاوتریخوالي شکایت کړی دی. دوی د قاچاق کوونکو او سرحدي ځواکونو لهخوا د باج اخیستنې او ناوړه چلند، او همدارنګه د کډوالۍ پر لارو د سختې یخنۍ په اړه راپورونه ورکړي دي.
د اتو افغان کډوالو د مړو موندل کېدل
په دغو پېښو کې یوه داسې ویډیو هم خپره شوې، چې د ترکیې او ایران په سرحدي سیمه کې د اتو افغان ځوانانو مړي په کې ښکاري او پراخ غبرګونونه یې راپارولي دي. د یوه قرباني ورور شریف نظري د سېشنبې په ورځ (د لړم ۱۹مه) افغانستان انټرنشنل ته ویلي، چې خپل ورور رضا نظري یې د دغو اتو کسانو په منځ کې پېژندلی دی.
د هغه په وینا، رضا وروستی کس دی چې د مړو په خپره شوې ویډیو کې لیدل کېږي او ښايي په دې پېښه کې تر ټولو کمعمره قرباني وي.
افغانستان انټرنشنل داسې اسناد لیدلي، چې ښيي رضا نظري د عليچمن نظري زوی او د بامیان ولایت اوسېدونکی و. نوموړی د ۱۳۸۸ کال د تلې په دویمه (د ۲۰۰۹ کال د سپټمبر په ۲۴مه) زېږېدلی و. د ملګرو ملتونو د ماشومانو د حقونو کنوانسیون له مخې، له ۱۸ کلونو کم عمر لرونکي کسان ماشومان ګڼل کېږي.
شریف نظري د ترکیې، ایران او طالبانو له چارواکو غوښتي، چې کابل ته د رضا د مړي د لېږدولو په برخه کې همکاري وکړي؛ څو کورنۍ یې وکولای شي هغه خاورو ته وسپاري. د شریف نظري په وینا، د قربانیانو مړي د ترکیې په وان ښار کې ساتل کېږي او کورنۍ یې تر اوسه د خپلو اولادونو مړو ته لاسرسی نه لري.
باخبره سرچینو د یکشنبې په ورځ (د لړم ۱۷مه) د اتو افغان کډوالو د مړو یوه ویډیو افغانستان انټرنشنل ته لېږلې ده. په دغه ویډیو کې د اتو ځوانانو مړي لیدل کېږي، چې زنې یې تړل شوې دي.
هغه کس چې ویډیو یې ثبت کړې، په افغانۍ لهجه وايي: «سلام وروره! دا مساپر دي».
په ترکیه کې د افغان کډوالو ټولنې هم له افغانستان انټرنشنل سره په خبرو کې د دغو اتو کسانو مړینه تایید کړې ده. یادې ټولنې ویلي، تر اوسه په وان ښار کې مېشتو افغانانو ته اجازه نه ده ورکړل شوې،چې د قربانیانو د پېژندلو یا د مړو د لیدلو لپاره روغتون ته ورشي.
ترکي رسنیو راپور ورکړی، چې د اتو ځوانانو مړي د وان ولایت د اوزالپ ولسوالۍ اړوند د یوکاري تولګالي سیمې ته څېرمه، د ایران له پولې شاوخوا درې کیلومتره لرې موندل شوي دي. دغو رسنیو د قربانیانو هویت نه دی په ډاګه کړی او د هغوی د مړینې لامل یې سخته یخني بللې ده.
خو د دغو اتو کسانو د مړینې لامل تر اوسه په خپلواکه توګه نه دی تایید شوی.
د کډوالو د مړینې په اړه د څېړنو غوښتنه
ترکي خبریال اوزکان اوزتاش د دوشنبې په ورځ افغانستان انټرنشنل ته ویلي، چې د وان سیمهییزې ادارې امر کړی، د یادې قضیې اړوند معلومات دې محرم وساتل شي.
یادې پېښې د ترکیې د حکومت د یو شمېر مخالفو سیاستوالو غبرګونونه هم راپارولي دي.
د ترکیې په پارلمان کې د خلکو د ډیموکراسۍ او برابرۍ ګوند استازې ګلجان کچماز سایغیت د دوشنبې په ورځ د دغه هېواد د کورنیو چارو وزیر ته په یوه لیک کې د قضايي څېړنو د پیل، د قربانیانو د هویت د معلومولو او د احتمالي شکمنو کسانو د نیولو غوښتنه کړې ده.
هغې په دغه لیک کې د ترکیې په سرحدي سیمو کې د کډوالو د مړینې ورته پېښو ته هم اشاره کړې ده. د سایغیت په وینا، د ۲۰۰۲ کال په مې میاشت کې د وان ولایت په چالدران سیمه کې د واورو تر ویلي کېدو وروسته د ۱۹ افغان کډوالو مړي وموندل شول. هغې همدارنګه په ۲۰۱۹ کال کې د باشقلعه په سیمه او د کډوالۍ پر لارو د یو شمېر نورو کډوالو د مړینې پېښو ته اشاره کړې ده.
د ترکیې د پارلمان دغې استازې د سیمهییزو جګړو او اقتصادي ناورینونو اغېزو ته په اشارې، په سرحدي سیمو کې د کډوالو د حقونو د خوندیتوب لپاره د نورو اقداماتو غوښتنه کړې ده.
هغې د ترکیې د کورنیو چارو له وزارت څخه په وان ولایت کې د کډوالو د بېرته لېږلو په مرکزونو کې د ساتل شویو کډوالو د شمېر، په تېرو پنځو کلونو کې د اېستل شویو کډوالو د شمېر او له ۲۰۲۰ کال راهیسې د هغو کسانو د شمېر په اړه هم معلومات غوښتي، چې د ایران له لارې دغه ولایت ته داخل شوي دي.
سایغیت همدارنګه د انساني قاچاق د شبکو پر وړاندې د حکومت د اقداماتو، په تېرو پنځو کلونو کې له دغو شبکو سره د تړاو په تور د نیول شویو کسانو د شمېر او د کډوالو د بېرته لېږلو په مرکزونو کې د هغوی د حقونو د سرغړونو د مخنیوي لپاره د تدابیرو په اړه پوښتنې کړې دي.
په وان ښار کې د ترکیې د جمهوريپال ولس ګوند د څانګې مشر سراجالدین بدیرهاناوغلو هم دغه پېښه د کډوالۍ په چارو کې د کمزوري مدیریت، د سرحدي څارنې د نیمګړتیاوو او د انسانانو ژوند ته د نه پاملرنې پایله بللې ده. هغه د پېښې د هر اړخیزې څېړنې او د احتمالي عاملانو د پېژندلو غوښتنه کړې ده.
ترکیه یونان او د اروپا نورو هېوادونو ته د افغانانو د کډوالۍ له مهمو لارو څخه ده. دغه هېواد د ګڼ شمېر افغان کډوالو کوربه هم دی، چې ځینې یې د استوګنې له معتبرو اسنادو پرته په دغه هېواد کې ژوند او کار کوي.