ازادۍ جبهې ویلي، چې د نورستان په کامدېش او د کونړ په ناړۍ ولسوالیو کې یې د طالبانو څو پوستې او دغه راز څو کلي نیولي دي. یادې جبهې «د ۳۷ طالبانو د وژل کېدو او ۲۴ نورو د ټپي کېدو» ادعا کړې ده.
د ایران د بهرنیو چارو وزیر عباس عراقچي وايي، د هرمز تنګي د بیا پرانیستلو هر اقدام د تهران د شرایطو له پوره کېدو سره تړاو لري. نوموړي ټینګار کړی چې یوازې د خبرو له لارې حللاره د ایران او امریکا ترمنځ روان کړکیچ پای ته رسولی شي.
د برېتانیا پولیسو اعلان کړی چې د ترهګرۍ ضد ځانګړو ځواکونو د دغه هېواد د هوايي ځواکونو یوې اډې ته څېرمه پنځه تنه نیولي دي. دا اډه د امریکا د هوايي ځواکونو له خوا کارول کېږي. د راپورونو له مخې، یاد کسان د یکشنبې په ورځ د ترهګریز برید د پلانولو او چمتووالي په تور نیول شوي دي.
د طالبانو د معلوماتو او احصايي اداره وايي چې د روان کال په لومړیو شپږو میاشتو کې یې څه باندې ۸۲۷ زره کسانو ته برېښنايي تذکرې وېشلې دي. یاده اداره وايي، څه باندې ۶۰۰ زره تذکرې نارینهو او څه باندې ۲۲۶ زره نورې ښځو ته وېشل شوې دي.
د هند د بهرنیو چارو وزارت ویاند رندهیر جیسوال ویلي، چې له دغه هېواد څخه د بشري مرستو نوې جوپه کابل ته رسېدلې ده. په دې مرستو کې درمل او طبي توکي شامل دي، چې د کابل یوه دولتي روغتون ته سپارل شوي دي.
د جمهوري نظام پر مهال د بلخ پخواني والي عطا محمد نور وايي، په ټولنیزو رسنیو کې د ده د شتمنیو او جایدادونو په اړه خپرېدونکې ادعاوې بې بنسټه دي. نوموړی وايي، هیڅ ښارګوټی نه لري او هغه ملکیتونه چې د خلکو او پانګوالو دي، باید ده ته منسوب نه شي.
د هند په اتراپردېش ایالت کې د سېلابونو راوتو او ځمکې ښویېدو له امله ۵۶ کسان مړه شوي او ۴۶ نور ټپیان دي. همدارنګه د نیپال په ځینو ولسوالیو کې هم د ناڅاپي سېلابونو راوتو له امله ۱۴ کسان مړه شوي او ۱۱ لادرکه دي.
د جرمني د کورنیو چارو وزیر الکساندر ډوبرېنټ غواړي له جرمني څخه د افغان وګړو د ایستلو لړۍ پراخه کړي، په داسې حال کې چې د حکومت د معلوماتو له مخې، د هغو شاوخوا ۴۸۸ افغانانو له ډلې چې د ایستلو لپاره نوملړ شوي، لږ تر لږه د ۲۶۷ کسانو په اړه د جرمي محکومیت سابقه نشته.
د پاکستان د اطلاعاتو او خپرونو وزارت د نورستان په وروستیو نښتو کې د پاکستان د لاس لرنې په تړاو د طالبانو ددفاع وزارت اعلامیه رد کړې او وايي، چې د طالبانو ادعاوې بې بنسټه دي.
د طالبانو او ازبکستان د معیار او کیفیت ادارو مسوولانو په ترمذ کې د تخنیکي همکاریو، سوداګرۍ د اسانتیا او تخنیکي خنډونو د لرې کولو په اړه خبرې کړې دي. دواړو لوریو د معیارونو همغږي، لابراتوارونو پراختیا او د افغان متخصصانو د روزنې په اړه هم بحث کړی.
د طالبانو د هرات والي اسلام جار د قزاقستان له پلاوي سره د اقتصادي او سوداګریزو اړیکو پر پراختیا خبرې کړې دي. د افغانستان لپاره د قزاقستان ځانګړي استازي یرکین توکوموف ویلي، چې د دواړو هېوادونو د شپږو میاشتو سوداګریز حجم ۵۸۱ میلیونه ډالرو ته رسېدلی دی.
د طالبانو تر واک لاندې افغانستان بانک او د افغان اعتباري بنسټ (اې سي جي ایف) ترمنځ د همکارۍ نوی هوکړهلیک لاسلیک شو. د دغه هوکړه لیک له مخې به په لومړي پړاو کې پنځو بانکونو او یوې مالي موسسې ته د شاوخوا یو میلیون ډالرو په ارزښت وړیا مرستې ورکړل شي.
سیمه ییزو سرچینو تېره شپه د پکتیا او د خیبر پښتونخوا د کورمې ولسوالۍ په سرحدي سیمو کې د طالبانو او پاکستاني ځواکونو ترمنځ د نښتو خبر ورکړی دی. طالبانو او پاکستاني چارواکو په رسمي ډول ددغو نښتو په اړه تر دې دمه څه نه دي ویلي.
تېره شپه د کندهار په ډنډ ولسوالۍ کې یو تن د نکاح له مراسمو وروسته پر ناوې ډزې کړې دي او وژلې یې ده. ځايي اوسېدونکو ویلي چې برید کوونکي وروسته پر خپل ځان هم ډز کړی او په روغتون کې یې سا ور کړې ده.
د طالبانو د ټولګټو وزارت د یوه مکتوب له لارې د لوړ ټناژ بار وړونکو وسایطو د وزن کولو لپاره ۱۵۰ افغانۍ ثابت فیس ټاکلی دی. دغه فیس د جمهوري حکومت د لوړتناژلرونکو وسایطو په مقرره کې له ټاکل شوي فیس نه ۵۰ افغانۍ لوړ دی.
د طالبانو دفاع وزارت وايي، د نورستان په کامدیش کې یې د وسلهوالو مخالفانو پر یوه ډله عملیات کړي او ۲۸ کسان یې وژلي او ۳۲ نور یې نیولي. د وزارت په وینا، یو شمېر وسله وال بېرته پاکستان ته اوښتي. یاد وزارت هېوادونو ته د پاکستان له اړخه د سیمې د ناامنه کولو په تړاو خبرداری ورکړی.
په سپتمبر میاشت کې د پښتونخوا ایالت په جنوبي ولسوالیو کې د حافظ ګل بهادر په مشرۍ فعال د پاکستان د مجاهدینو سازمان او ټي ټي پي پر پاکستاني پولیسو او نورو امنیتي ځواکونو خونړي بریدونه وکړل او هغوی ته یې زیات تلفات واړول.
افغانستان انټرنشنل ته د رسېدلو اسنادو له مخې، د طالبانو د بهرنیو چار وزارت په برلین کې د افغان سفارت د سرپرست عبدالباقي پوپل کاري قرارداد د درېیم ځل لپاره د سیمه ییز کارکوونکي په توګه تمدید کړی دی. طالبانو یو بل سیمه ییز کارمند سید مصطفی نوري د کونسلي چارو مسوول ټاکلی.
د پاکستان د ولسمشر ویاند مرتضیٰ سولنګي پر طالبانو سختې نیوکې کړې او ویلي یې دي چې شاوخوا ۳۰ کاله وړاندې د دوی واک ته رسېدو افغانستان په «ژوندي دوزخ» بدل کړی و.
د خیبر پښتونخوا د خیبر ولسوالۍ په ملاګوري سیمه کې د پولیسو سیمهییز مشر ریاض حسین اپریدی د قاچاقبرانو په ډزو وژل شوی دی.
د ننګرهار د طالبانو د امنیه قوماندانۍ ویاند سید طیب حماد وایي، د جلالاباد ښار د درېیمې امنیتي حوزې اړوند د عربانو ګولایي په سیمه کې یو کس د کورنۍ شخړې له امله پر خپلې خواښې او اوښي ډزې کړې، چې له امله یې دواړه ټپیان شوي دي.