د مقاومت په نوم د طالبانو مخالفې جبهې ویاند علي میثم نظري، د اروپایي پارلمان له وروستي پرېکړهلیک هرکلی کړی او ویلي یې دي چې دغه اقدام د طالبانو د واکمنۍ د مشروعیت هڅو پر ضد یو واضح او اخلاقي پیغام دی، په ځانګړي ډول د افغان ښځو او نجونو د وضعیت په اړه.
د طالبانو د رییسالوزرا اقتصادي مرستیال ملا عبدالغني برادر د پنجشنبې په ورځ د حیرتان ـ مزارشریف د اوسپنې پټلۍ د پنځمې برخې د پرانیستې په مراسمو کې وویل، هیله لري چې په راتلونکي کې د افغانستان او ازبکستان ترمنځ تګراتګ له ویزې او پاسپورټ پرته ترسره شي.
د امریکا بهرنیو چارو وزیر مارکو روبیو ویلي، د ناټو ټول متحد هېوادونه له واشنګټن سره په دې نظر دي چې ایران باید اټومي وسلې ترلاسه نه کړي، ځکه د ده په وینا دغه هېواد د سولې لپاره ګواښ دی او داسې توغندي لري چې اروپا ته رسېدلای شي.
د کانګو ډیموکراټیک جمهوریت په ختیځ کې، د یاغي ډلې تر کنټرول لاندې جنوبي کیوو ولایت کې د ایبولا یوه نوې پېښه ثبت شوې. دا پېښه داسې مهال ثبت شوې چې روغتیايي چارواکي د دغه ناروغۍ د پراخېدو خبرداری ورکوي او د تلفاتو شمېر مخ په زیاتېدو دی.
وسلهوالو غلو تېره شپه د هرات ښار په مرکز کې د «خواجه محمد تاکي» سوداګریز مارکېټ ته تر ننوتلو وروسته، د اته دوکانونو څخه نغدې پیسې او مالونه له ځان سره وړي دي.
د ملګرو ملتونو په جینوا کې د افغانستان دایمي استازي نصیر احمد اندېشه د یوه ۲۷ کلن افغان انجینر «شمس» مړینه د طالبانو تر واک لاندې افغانستان کې د ژور ټولنیز او بشري بحران نښه بللې او ویلي یې دي چې هېواد له یوې «خاموشې انساني فاجعې» سره مخ دی.
د امریکا د خزانې وزارت په لبنان کې د تهران پر اېستل شوي سفیر محمدرضا ریوف شیباني بندیزونه ولګول. د امریکا د بهرنیو چارو وزارت هم اعلان کړی چې له حـ. ـزبالله ډلې سره تړلي ۹ کسان یې تحریم کړي دي.
په افغانستان کې د روغتیا نړېوال سازمان دفتر ویلي، طبیعي پېښې پر ټولو خلکو یو شان اغېز نه کوي. یاد سازمان پر اېکس لیکلي چې لږ تر لږه ۷۰ تر ۸۰سلنه د بیړنیو مرستو بېړني اړمن کسان ښځې او ماشومان دي او نږدې ۷۵ سلنه هغه کسان چې د طبیعي پېښو له امله بېځایه کېږي هم ښځې او ماشومان دي.
د افغانستان د خبریالانو مرکز (ای ایف جی سي) وايي، د طالبانو د استخباراتو ادارې په بامیان ولایت کې د «بامیان راډیو» فعالیت درولی او دا اقدام یې د رسنیو د ازادۍ او معلوماتو ته د لاسرسي له حقه ښکاره سرغړونه بللې ده.
د اوکراین د جګړې او په منځني ختیځ کې د امنیتي اندېښنو له پراخېدو سره، فنلنډ د خپلو لویو او پرمختللو بمپناهځایونو له امله د نړۍ د هېوادونو پام ځانته اړولی او اوس فنلنډي شرکتونه هڅه کوي چې د دغو امنیتي تاسیساتو ټکنالوژي او خدمات نورو هېوادونو ته صادر کړي.
د طالبانو د کار او ټولنیزو چارو وزارت ویلي، د ترکیې او نورو هېوادونو لپاره د کاري ویزو د غیرقانوني صدور او تور بازار په تړاو یې د سیاحتي او زیارتي شرکتونو استازي او مسئولین احضار کړي. دغه وزارت په کابل کې د یادو شرکتونو استازو ته د احضار استعلامونه سپارلي او پوښتنې یې ترې کړې دي.
د افغانستان د بشر حقونو د خپلواک کمېسیون پخوانۍ مشرې شهرزاد اکبر د رواداري بنسټ ورستي راپور ته په اشارې سره د طالبانو په توقیف ځایونو کې د روانو شکنجو او د بندیانو د مړینې په اړه ژوره اندېښنه څرګنده کړې او دا وضعیت یې د نه زغملو وړ بللی دی.
د طالبانو د کډوالو او بېرته راستنېدونکو چارو وزارت وایي، د روانې اونۍ په ترڅ کې د پاکستان له بندخونو ۳۰۷ افغان کډوال ازاد شوي او افغانستان ته راستانه شوي دي.
د طالبانو تر واک لاندې له پېښو سره د مبارزې د چمتووالي ادارې ویاند محمدیوسف حماد وایي، په تېرو ۲۴ ساعتونو کې په کندهار، هرات، غور او تخار ولایتونو کې د تالندې او برېښنا، توپانونو او سېلابونو له امله لږ تر لږه شپږ کسان مړه او ۱۱ نور ټپیان دي.
په داسې حال کې چې نړۍ په نورو نړیوالو کړکېچونو کې بوخته ده، افغانستان له پامه غورځول کېږي او د بشري ناورین له سخت وضعیت سره مخ دی. د جرمني بیلډ ورځپاڼې ددغه هېواد د پرمختیا وزارت له قوله ویلي، چې ۶۴ سلنه افغانان په فقر کې ژوند کوي او ۱۴ میلیونه نور له لوږې سره مخ دي.
د طالبانو دفاع وزیر د امنیتي او تصفیوي کمیسیون له غونډې وروسته په مزارشریف کې روضې ته ورغلی او د هغې بېلابېلې برخې یې کتلې دي. مولوي یعقوب نن د افغانستان د ۹ شمالي ولایتونو له والیانو سره د امنیتي وضعیت په تړاو ناسته درلوده.
د ازبکستان او افغانستان ترمنځ د ټوکر (نساجۍ) په برخه کې د همکارۍ د پراختیا په موخه یوه ازبکستاني پلاوي کابل او یو شمېر ولایتونو ته سفر کړی او له افغان سوداګرو او د طالبانو له چارواکو سره یې خبرې کړې دي.
د ډلهییز امنیت تړون سازمان اعلان کړی چې د روان کال په وروستیو کې له شانګهای همکاریو سازمان او د ناپېیلو هېوادونو ټولنې سره یوځای د افغانستان او منځنۍ اسیا امنیتي وضعیت ارزوي.
ځايي سرچینو افغانستان انټرنشنل ته ویلي چې د طالبانو استخباراتو د غور ولایت په دولتیار ولسوالۍ کې لږ تر لږه ۳۰ کسان له مخالفو ډلو سره د همکارۍ په تور نیولي او نامعلوم ځای ته یې لېږدولي دي.
د روسیې د دولتي اورګاډو شرکت ویلي چې د پنجشنبې په ورځ په بریانسک سیمه کې پر یوه اورګاډي د اوکراینۍ بېپېلوټه الوتکې (ډرون) د برید له امله درې کسان وژل شوي دي.
د طالبانو د ټولګټو وزارت وايي، د تورغونډۍ ـ هرات ـ کندهار ـ سپین بولدک د رېل پټلۍ سترې پروژې سروې او ډیزاین بشپړ شوی او ټاکل شوې چې د دې پروژې عملي چارې په نږدې راتلونکي کې پیل شي.