د افغانستان د رسنیو ملاتړ سازمان (امسو) د پاکستان په راولپنډۍ ښار کې د پولیسو لهخوا د افغان خبریال پروېز امینزاده پر نیولو اندېښنه ښودلې او دغه اقدام یې د بشري حقونو، بیان ازادۍ او د خبریالانو د خوندیتوب له اصولو سره په ټکر کې یاد کړی.
د طالبانو د صنعت او سوداګرۍ وزارت خبر ورکړی، چې د طالبانو او ازبکستان ترمنځ د سوداګریزو اړیکو په ګډ کنفرانس کې د دواړو هېوادونو د خصوصي سکټور ترمنځ د سوداګرۍ د کچې پر لوړوالي، سوداګریزو اړیکو او د ګډې پانګونې پر اسانتیاوو خبرې شوې.
په کندهار کې د طالبانو تر واک لاندې د پېښو پر وړاندې د مبارزې او چمتووالي ریاست وایي، د تېرې ورځې او شپې سختو توپاني بادونو او دوړو په ښار او یوشمېر ولسوالیو کې خلکو ته درانه ځاني او مالي زیانونه اړولي دي. د یاد ریاست په وینا؛ په یادو پېښو کې درې تنه مړه او شپږ نور ټپیان شوي دي.
د بلوچستان ایالت د چاغۍ ولسوالۍ له سياه جنګ سيمې نه د درېيو کسانو سخت زيانمن شوي جسدونه موندل شوي، چې تر لومړنيو قانوني او طبي چارو وروسته د دالبندين پرنس فهد روغتون ته لېږدول شوي دي.
فاکسنیوز شبکې په یوه راپور کې د ترهګرۍ ضد چارو له کارپوه عمر محمد سره د مرکې پرمهال دې ته اشارې کړې، چې مجتبی خامنهیي نږدې درې میاشتې کېږي په پټنځای کې ژوند کوي. د هغه په وینا؛ دغه ډول ژوند د اسامه بنلادن د ژوند وروستي کلونه ورپه یادوي.
د پاکستان د بشري حقونو کمېسیون د دغه هېواد له فدرالي حکومت او د خیبر پښتونخوا له ځایي ادارې غوښتي، چې د پښتون ژغورنې غورځنګ فعال فریدالله اپریدي د ژر تر ژره موندلو لپاره اړین ګامونه پورته کړي. فریدالله اپریدی څلور ورځې وړاندې په پېښور کې نادرکه شوی.
د کندهار د سپینې او تورې زڼکۍ کروندګر وايي، په دې وروستیو کې د زڼکۍ بازارونه په بېساري ډول راولوېدلي او د دوی کلونه زحمت یې له سخت اقتصادي زیان سره مخ کړی. د دوی په خبره؛ د لارو تړل کېدو او د بدیلو سوداګریزو لارو نه موندلو له امله د زڼکۍ بیې تر نیمايي ډېرې راټیټې شوې دي.
د ملګرو ملتونو د امنیت شورا د کلنۍ غونډې پرمهال د پاکستان استازې صایمه سلیم په خپلو څرګندونو کې یو وار بیا ادعا کړې، چې د پاکستان پر ضد د ځینو وسلهوالو ډلو فعالیتونه له افغان خاورې تمویل، تسهیل او ملاتړ کېږي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۲۳ کوډګر نیولي دي. د یاد وزارت په وینا؛ دغه نیول شوي کوډګر عدلي او قضایي ارګانونو ته ور پېژندل شوي دي.
د افغانستان انټرنشنل – پښتو لهخوا د راټولو شویو شمېرو له مخې؛ یوازې په غویي میاشت کې ۲زره او ۲۸۳ افغان کډوال چې د پاکستان په زندانونو کې بندیان وو، له زندانه تر خوشې کېدو وروسته بېرته افغانستان ته ستانه شوي دي.
د بشري حقونو سازمان «پرو ازول» د جرمني له حکومت نه غوښتنه کړې، چې په افغانستان کې د بشري حقونو وضعیت ته په کتو له جرمني نه د افغان کډوالو اېستل باید سملاسي ودروي. د یاد بنسټ د شمېرو له مخې؛ د مجرده نارینه پناه غوښتونکو د ملاتړ او منلو کچه له شاوخوا ۶۶ سلنې ۱۶ ته راټیټه شوې ده.
د یوې تازه سروې له مخې؛ د جاپان د شاوخوا هرو درېیو شرکتونو له ډلې یو یې د مصنوعي ځیرکتیا لرونکي روبوټونه کاروي یا د کارولو پلان لري. د موټر جوړونې او ترانسپورتي تجهیزاتو شرکتونه په دې برخه کې تر ټولو مخکې دي.
په ملګرو ملتونو کې د هند دایمي استازي هریش پارواتانیني په کابل کې د روږدو کسانو د درملنې پر مرکز د پاکستان د برید په اړه ویلي، پاکستان د ملکیانو پر وړاندې د نسل وژنې او تاوتریخوالي اوږد تاریخ لري. هغه وایي، پر افغانستان د پاکستان د بریدونو له امله ۷۵۰ ملکیانو ته مرګ ژوبله اوښتې.
د طالبانو د ارشاد، حج او اوقافو وزارت خبر ورکړی، چې سعودي عربستان ته د افغان حاجیانو د لېږد بهیر پرون چهارشنبه (د غویي ۳۰مه) بشپړ شو. د یاد وزارت په وینا؛ سږکال ټول ٣٠زره افغان حاجیان د اریانا افغان او کام ایر هوايي شرکتونو په ٩٧ الوتنو کې سعودي عربستان ته لېږدول شوي دي.
د خیبر پښتونخوا په شانګله ولسوالۍ کې په دوو جلا پېښو کې دوه کان کېندونکي مړه او یو بل ټپي شوی دی. لومړۍ پېښه د اخوروال د سکرو کانونو په پنځم کان کې هغه مهال رامنځته شوه، کله چې دوه کان کېندونکي د کان دننه د کار پرمهال د خاورو او ډبرو لاندې بند پاتې شول.
په جوزجان کې د طالبانو والي عبدالله سرحدي په یوې غونډه کې ویلي، چې په دغه ولایت کې د غصب شویو ځمکو د تثبیت او استرداد کمېټې له یو مېلیون څخه ډېره ځمکه د طالبانو د مرکزي کمېسیون له پرېکړې وروسته د دولتي ملکیت په توګه تثبیت کړې ده.
د بلوچستان ایالت د ژوب ولسوالۍ د کاکړ خراسان په سیمه کې د یوې ټرافیکي پېښې له امله درې ښځې او دوه ماشومان مړه او د یوې کورنۍ څلور نور غړي ټپیان شوي دي. د ځایي چارواکو په وینا؛ د یادې پېښې مړي او ټپیان د ژوب ولسوالۍ مرکزي روغتون ته لېږدول شوي.
په زابل کې د طالبانو امنیې قوماندانۍ ویاند قاري ذبیحالله جوهر خبر ورکړی، چې د دغه ولایت په بېلابېلو سیمو کې د څلورو جلا ټرافیکي پېښو له امله درې تنه مړه او پنځه نور ټپیان شوي دي.
د خیبر پښتونخوا سر وزیر سهیل اپريدي او د عمران خان خور عليمه خان ادعا کړې ده، چې د اډیاله زندان مخې ته د احتجاجي ناستې پر ګډونوالو ډزې شوې او یوشمېر کسان پهکې ټپیان شوي دي.
د بلوچستان د کیچ ولسوالۍ اړوند په سنګۍ سیمه کې پولیسو د یو لړ عملیاتو پرمهال ۲۸ افغان کډوال نیولي دي. پولیسو ویلي، نیول شوي کسان په پټه توګه په سیمه کې مېشت وو او د عملیاتو پرمهال له کرنیزو ځمکو څخه نیول شوي دي.
د افغانستان د رزمي هنرونو دوو ملي لوبغاړو روحید ستانکزي او محمد قاسمي په ازبکستان کې د ۲۰۲۶کال د اسیا د ځوانانو د رزمي هنرونو په دویم پړاو سیالیو کې دوه مډالونه وګټل. په دغه سیالیو کې روحید ستانکزي د سپینو زرو او محمد قاسمي د برونزو مډال وګاټه.