ناپېژاندو وسلهوالو د بلوچستان په مستونګ ولسوالۍ کې د ګوادر پوهنتون مرستيال مشر عبدالرزاق صابر، د هغه مرستیال سعيدمنظور احمد، د پوهنتون ښوونکی شکیل او د هغوی موټر چلوونکی تښتولي دي.
د خیبر پښتونخوا د لنډي کوتل قومي مشرانو او چارواکو په یوې جرګه کې د تورخم لارې بندېدو ستونزو او په افغانستان کې د بندپاتې پاکستاني وګړو د ستنېدو په اړه خبرې کړې. دغه قومي مشرانو ویلي، چې د لارو تړل کېدو له کبله سلګونه کسان له ستونزو سره مخ دي او دوه اړخیزه سوداګري اغېزمنه شوې ده.
د روسیې د امنیت شورا منشي سرګي شویګو وايي، چې په افغانستان کې روانه بېثباتي د شانګهای همکارۍ سازمان لپاره یو له اصلي امنیتي ګواښونو څخه ده. هغه وويل، د شانګهای همکارۍ سازمان د غړو ترمنځ د امنیتي همکارۍ پیاوړتیا لپاره به یو لړ عملي نوښتونه وړاندې شي.
د سره صليب نړۍوالې کمېټې لهخوا په خپور شوي بیان کې راغلي، چې د خوست ولایت په ګربز ولسوالۍ کې بېځايه شوې کورنۍ د ناوړه وضعیت او ناروښانه برخليک تر سيورې لاندې په سمڅو او ازاده فضا کې مېشتېدو ته اړې شوې دي.
د خیبر پښتونخوا د مومندو ولسوالۍ قبایلي مشرانو په یوې لویه جرګه کې وړاندیز کړی، چې د پاکستان او طالبانو ترمنځ پر ډیورنډ کرښه د کړکېچ د کمولو لپاره دې یوه جرګه جوړه شي.
د طالبانو د کډوالو او بېرته راستنېدونکو چارو وزارت د پنجشنبې په ورځ (د غویي ۲۴مه) خبر ورکړی، په روانه اونۍ کې ۵۶۱ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته د تورخم او سپین بولدک له لارې بېرته افغانستان ته ستانه شوي دي.
د پاکستان قامي اسمبلۍ د ګوزڼ د لهمنځه وړلو لپاره نوی قانون منظور کړی، چې له مخې به یې پر هغه کورنیو چې خپلو ماشومانو ته د پوليو ضد واکسينو څاڅکي نهورکوي؛ جريمه او نور بنديزونه ولګول شي.
د پاکستان د قومي اسمبلۍ د اپوزېسیون او د پښتونخوا ملي عوامي ګوند مشر محمودخان اڅکزي ويلي، د حکومت د روانو تګلارو له امله په بلوچستان کې د بېلتون غږونه پورته شوي. هغه خبرداری ورکړی، که اوسنی حالت همداسې دوام وکړي؛ نو ښايي په نورو پښتون مېشتو سيمو کې هم ورته غږ راپورته شي.
د ملګرو ملتونو استوګنې ادارې (UN-Habitat) ویلي، چې کارپوهان به راتلونکې اونۍ په باکو کې د «نړۍوال ښاري فورم» په ناسته کې په افغانستان کې د نارسمي مېشت ځایونو په ګډون د مهمو ښاري ننګونو په اړه بحث او خبرې وکړي.
د پاکستان تحریک انصاف ګوند عمومي منشي سلمان اکرم راجا ادعا کړې، چې د دغه ګوند بنسټګر او د پاکستان پخوانی لومړی وزیر عمران د زندان دننه وهل کېږي او ناسم چلند ورسره کېږي. د هغه په وینا؛ نوموړي د یوې سترګې لید په بشپړه توګه له لاسه ورکړی.
د طالبانو د امربالمعروف وزارت خبر ورکړی، چې په کونړ کې یې ۴ سوالګرې ښځې «د فحشا» د ترویج په تور نیولې دي. یاد وزارت زیاته کړې، چې د سیمې د اوسېدونکو، قومي مشرانو او جوماتونو د امامانو د پرلهپسې غوښتنو وروسته یې دغه اقدام کړی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د غویي ۲۳مه) ۹۷۵ کډوالې کورنۍ چې ټولټال ۵زره او ۲۲۹ کسان کېږي؛ له ایران او پاکستان نه افغانستان ته ستنې شوې دي.
په کندهار کې احمدشاهي لوبغالی چې څو کاله وړاندې د افغانستان فوټبال فدراسیون، د المپیک ملي ادارې او ځایي ادارې په همکارۍ د شاوخوا یو مېلیون امریکايي ډالرو په لګښت جوړ شوی و؛ اوس د فوټبال پرځای د غېږ نیونې سیالیو لپاره کارول کېږي.
د بلوڅانو د یووالي غورځنګ مشرې ماهرنګ بلوڅ ويلي، په بلوچستان کې د سولهييزو سياسي او ټولنيزو فعاليتونو لپاره فضا ورځ تر بلې تنګېږي او هغه کسان چې د عدالت او حق غوښتنه کوي له ګواښونو او فشارونو سره مخامخ کېږي.
د امریکا ولسمشر ډونالډ ټرمپ د چین له ولسمشر شي جېن پېنګ سره د لیدنې پرمهال ویلي، چې له شي جېن پېنګ سره یې اړیکه د دواړو هېوادونو د ولسمشرانو ترمنځ تر ټولو اوږده اړیکه وه او دا یې «ستر ویاړ» وباله. هغه ټینګار وکړ، چې د دواړه هېوادونو ترمنځ اړیکې به «تر بل هر وخت ښې شي».
د بلوچستان د کوټې ښار پوليسو ويلي، چې د دغه ښار د ګوالمنډۍ تاڼې اړوند سيمه کې يې د بېاسناده افغان کډوالو پرضد د پلټنې عمليات ترسره کړي دي. د پوليسو په وينا؛ په دغه عملياتو کې ۱۱ ښځې او ۱۹ نور افغان کډوال نيول شوي دي.
رویټرز راپور ورکړی، د امریکا ولسمشر ډونالډ ټرمپ به د چین له ولسمشر شي جېن پېنګ سره په لیدنه کې ترې وغواړي چې له ایران سره د جګړې په پای ته رسولو کې مرسته وکړي. خو دا لا روښانه نهده، چې چین به تر کومه حده چمتو وي پر ایران فشار راوړي او له تهران سره خپلې اړیکې زیانمنې کړي.
په بلوچستان کې په جلا، جلا پېښو کې څلور کسان وژل شوي او ۱۲ نور ټپیان دي. یوازې په لومړۍ پېښه کې د پنجګور په بایپاس سيمه کې پوليسو د دوو ناپېژاندو کسانو مړي موندلي دي. د پوليسو په وينا؛ د وژل شويو کسانو پر بدن د ډزو نښې لیدل شوې دي.
په ایران کې د افغان کډوالو د وضعیت په اړه د ناروې د کډوالو شورا د راپور تر خپرېدو وروسته د بېځایه شویو نړۍوال سازمان هم ویلي، چې په ایران کې افغان کډوال د جګړې، کډوالۍ او تړلو پولو ترمنځ بند پاتې دي.
د ۲۰۲۶کال د داخلي بېځایه شویو کلني راپور له مخې؛ تېر کال په افغانستان کې شاوخوا ۷ مېلیونه خلک د هېواد دننه د اوږدو جګړو او طبیعي پېښو له امله بېځایه شوي دي. دغه شمېره د ۲۰۲۵کال د سویلي اسیا د کورنیو بېځایه شویو نیمایي نفوس جوړوي.
تر ۲۰کلنو کم عمره د افغانستان فوټبال لوبډلې د ۲۰۲۶کال کافا جام سیالیو په دویمه لوبه کې د ازبکستان په وړاندې د ۲-۰ په توپير ماتې وخوړه. دغه لوبه چې د تاجکستان په پلازمېنه کې ترسره شوه، افغان لوبډلې پهکې پرلهپسې دویمه ماتې وخوړه او د جدول په پای کې پرته له کوم امتیازه پاتې شوه.