د افغانستان د رسنیو ملاتړ سازمان (امسو) د پاکستان له امنیتي ادارو غوښتي چې په اسلام اباد کې د لادرکه شوي افغان خبریال سید قاسم هاشمي او ټولنیز فعال حامد احساس د ځای او وضعیت په اړه معلومات شریک کړي.
د سولې نوبل جايزه ګټونکې ملالې يوسفزۍ بنسټ ويلي، چې پر زدهکړو د طالبانو د بندیز لګولو پر مهال په ټولګیو کې ناستې نجونې اوس شل کلنۍ ته رسېدلې دي، خو د دغو محدودیتونو له امله تراوسه هیڅوک ځواب ورکولو ته نه دی اړ اېستل شوی.
د طالبانو د ریاست الوزرا اقتصادي مرستیال عبدالغني برادر د سالنګونو د بیا رغونې چارې له نږدې کتلې او د کابل-سالنګ لویې لارې د چارو پر چټکتیا یې ټینګار کړی دی.
د طالبانو مشر هبتالله اخوندزاده د کندهار له امنیتي چارواکو غوښتي چې د خپلو سیمو امنیت ته جدي پام وکړي او خبرداری یې ورکړی چې د هغوی «وړوکی غفلت» هم د دښمن د بري او ددوی د ناکامۍ لامل کېدای شي. هبت الله دغه راز ویلي چې په ګومارنو کې قوم، ژبه او شخصي اړیکې په پام کې ونه نیول شي.
د ملګرو ملتونو سرمنشي انتونیو ګوتریش وايي، چې د پاکستان په بلنه به «ژر» اسلام اباد ته سفر وکړي. ګوتریش د امریکا او ایران ترمنځ د روانې جګړې د پای ته رسولو په هڅو کې د ترکیې، مصر، سعودي عربستان او پاکستان رول مهم وباله.
له ګوزڼ د پاک افغانستان بنسټ وايي، چې د راتلونکې دوشنبې په ورځ، د وږي پر ۳۰مه د ګوزڼ ضد واکسین پنځه ورځنی ملي کمپاين پیلیږي. هممهاله په خیبر پښتونخوا او د پاکستان په شاوخوا ۱۱۵ ولسوالیو کې هم د ګوزڼ واکسین کمپاین پیلیږي.
د افغانستان د کرکټ ملي لوبډله به نن د پنجشنبې په ماښام (د وږي ۲۶مه) له هند سره د شل اوریزو نړیوالو سیالیو د روانې لوبلړۍ په درېیمه او وروستۍ لوبه کې لوبغالي ته ښکته شي. ټاکل شوې چې د دواړو لوبډلو ترمنځ درېیمه لوبه د افغانستان پر وخت ماښام شپږنیمې بجې پیل شي.
د اکثریت ګوند غړي فضل محمود فضلي ویلي، چې ایران په تېر وخت کې له افغان ځوانانو نه د نیابتي جګړو لپاره یوه وسله واله ډله جوړه کړه او اوس پاکستان په بلوچستان کې د پخوانیو افغان سیمهییزو پولیسو له غړو څخه د «لښکر» په نوم ملېشه جوړوي.
د طالبانو د ځمکو د غصب د مخنیوي کمېسیون وايي، چې په تېرو څلورو کلونو کې یې په ۱۴ ولایتونو کې د ۴۹ ښارګوټو ځمکې په بشپړ یا قسمي ډول دولتي تثبیت کړې او د استرداد پرېکړې یې صادرې کړې دي.
د ایران په دوغارون پوله کې زرګونه باروړونکي موټر افغانستان ته د اوښتلو په تمه ولاړ دي. افغان موټرچلوونکي وايي، د اوږده انتظار ترڅنګ د پارکینګ لوړو بیو، د ویزې ستونزو، د تشناب او حمام نشتوالي، د سونتوکو محدودیتونو او امنیتي خطرونو یې ژوند او اقتصادي وضعیت سخت اغېزمن کړی دی.
د پاکستان دفاع وزیر خواجه اصف ویلي، چې که په یمن کې روانه جګړه پراخه شي، پاکستان به له سعودي عربستان سره په عملي او دیپلوماتیکه توګه ودرېږي.
د ملګرو ملتونو د کډوالو عالي کمېشنرۍ (UNHCR) ویلي، په پراخه کچه له پاکستان نه افغانستان ته د افغان کډوالو ستنېدنه د دغه هېواد پر روان کړکېچن بشري وضعیت اضافي فشار واردوي.
له پاکستان نه افغانستان ته یوشمېر ستانه شوي افغان کډوال وايي، د سرپناه نشتوالی، بېکاري او اقتصادي ستونزې هغوی اړ اېستي چې خپل د کور سامان وپلوري او بېرته پر قاچاقي لارو پاکستان ته ولاړ شي.
د اسټرالیا د بهرنیو چارو وزارت ویلي، دغه هېواد د کاناډا، جرمني او هالنډ په ګډون له خپلو نړۍوالو شریکانو سره یوځای د طالبانو د ځواب ویلو لپاره حقوقي اقدامات څاري؛ څو طالبان د ښځو پر وړاندې د هر ډول تبعیض د لهمنځه وړلو کنوانسیون د پراخو سرغړونو په تړاو حساب ورکونې ته اړ باسي.
د پاکستان د بهرنیو چارو وزارت ویاند سجاد حیدرخان وایي، هېواد یې له افغانستان سره د سوداګریزو لارو پرانیستلو ته چمتو دی؛ خو طالبان باید لومړی د وسلهوالو ډلو د فعالیت مخه ونیسي. هغه زیاته کړه، چې د چین، قطر او ترکیې له منځګړیتوب سره، سره د طالبانو ځواب منفي و.
د طالبانو د لوړو زده کړو وزارت یوې لوړپوړې سرچینې افغانستان انټرنشنل - پشتو ته ویلي، چې د طالبانو عدلیې وزیر په کابل کې د دعوت خصوصي پوهنتون ته د تخلیې او فعالیت د درولو لپاره یوه اوونۍ وخت ورکړی دی. سرچینه زیاتوي، چې طالبانو تېره میاشت په خوست کې هم د دغه پوهنتون څانګه تړلې وه.
د برېتانیا د دفاع وزارت ویلي، په افغانستان کې د برتانوي ځانګړو ځواکونو (اېساېاېس) لهخوا د احتمالي «جنګي جرمونو» د ادعاوو د څېړنې لګښت تراوسه ۵۸ مېلیون پونډو ته رسېدلی دی.
بیجینګ ته د سفر پرمهال د ایران د بهرنیو چارو وزیر عباس عراقچي د پاکستان د پوځ له مشر جنرال عاصم منیر سره د ټېلیفون په کرښه په سیمه کې د روان وضعیت او د دوه اړخیزو همکاریو په اړه بحث او خبرې کړې دي.
د بښنې نړۍوال سازمان د طالبانو لهخوا د نجونو پر زدهکړو د بندیز د پنځمې کلیزې سره هممهاله د ګډ غږ په پورته کولو سره د عمومي پیوستون او له نړۍوالې ټولنې د بېړني اقدام غوښتنه کړې ده؛ تر څو پر طالبانو فشار راوړي، چې د نجونو ښوونځي بېرته پرانیزي.
ایټيوي نیوز په یوه ځانګړي راپور کې ویلي، افغانستان د خوارځواکۍ له پراخ ناورین سره مخ دی او نږدې څلور مېلیونه ماشومان په خوارځواکۍ اخته دي چې له دې ډلې شاوخوا یو مېلیون یې د مرګ له جدي ګواښ سره مخ دي.
د خیبر پښتونخوا د خیبر ولسوالۍ د تیراه بېځایه شوي له اتو میاشتو راهیسې له سختو ستونزو سره مخ دي. قبایلي مشران او د بېځایه شویو استازو ویلي، چې د پاکستان حکومت د درېیو میاشتو په ترڅ کې د دوی د بېرته ستنېدو ژمنه کړې وه؛ خو تراوسه یې هېڅ عملي ګام نهدی پورته کړی.