د ایران ولسمشر مسعود پزشکیان او د ترکیې ولسمشر رجب طیب اردوغان د سیمې هېوادونو پر روان وضعیت او دوه اړخیزو اړیکو ټیلیفوني خبرې کړې دي. پزشکیان ویلي، د اسلامي امت دښمنان هڅه کوي چې د سیمې په هېوادونو کې د کړکېچونو پر رامنځته کولو سره ترهګري او نا امني خپره کړي.
په دوحه کې د طالبانو سفیر محمد سهیل شاهین په قطر کې د ماشومانو د ملاتړ او وسلهوالو شخړو لپاره د ملګرو ملتونو د سرمنشي د ځانګړي استازي د دفتر د تحلیل او عامه پوهاوي مرکز له مشر داود المصري سره کتلي او د ماشومانو د خوندیتوب په اړه یې خبرې کړې دي.
د افغانستان د مخکیني جمهوري نظام پر مهال د ملي امنیت پخوانی رییس احمد ضیا سراج ویلي، طالبان به هېڅکله د افغانانو له محکمې نجات ونهمومي او نه به هم له الهي عدالت څخه د تېښتې توان ولري. هغه زیاته کړې چې پر کابل د واکمنې ډلې تېره شل کلنه جګړه د واک لپاره وه، نه د دین لپاره.
په هرات کې د طالبانو د والي ویاند د یوې خبرتیا په خپرولو سره ویلي، چې نن شپه هم (پنجشنبه د سلواغې ۲مه) د سختې یخنۍ او کنګل له امله د هرات- کندهار د لویې لارې په اوږدو کې د «بند شابید» په سیمه کې لاره د ټرافیکو پرمخ تړل شوې ده.
د البانیا قانون جوړوونکو د پنجشنبې په ورځ (د سلواغې ۲مه) د حکومت هغه پرېکړه تایید کړه، چې لهمخې یې دغه هېواد د «سولې نړۍوال پلاوي یا بورډ» له نوښت سره یوځای کېږي؛ دا نوښت د امریکا د ولسمشر ډونالډ ټرمپ لهخوا د نړۍوالو شخړو د حل لپاره پیل شوی دی.
د افغانستان او وېسټ انډیز د کرېکټ ملي لوبډلو ترمنځ د درې شل اوریزو نړۍوالو سیالیو لوبلړۍ ۲ـ۱ د افغان لوبډلې په بریا پایته ورسېده او ورسره یې دغه لوبلړۍ په خپل نوم کړه.
د ایران ولسمشر مسعود پزشکیان د وروستیو اوونیو لاریونونو اړوند د ایران ولس ته په خپل پیغام کې دغه وضعیت «یو سخت او دردناک ازمیښت» وباله. هغه ومنله چې په دې لاریونونو کې ۳ زره کسان وژل شوي، خو نړۍوالو رسنیو بیا دا شمېر تر ۱۵ زرو پورې ښودلی دی.
په جینوا کې د افغانستان استازي نصیر احمد اندېشه، د طالبانو د نوې خپرې شوې «جزایي اصولنامې» په اړه ژوره اندېښنه څرګنده کړې او ویلې دي، چې دا قانون یوازې یو حقوقي سند نهدی، بلکې یوه سیاسي پروژه ده، چې د افغانستان ټولنه په بېساري ډول له خطر سره مخامخ کوي.
د افغانستان یو نوموتی خبریال او لیکوال صدیقالله توحیدي د طالبانو د مشر ملا هبتالله اخوندزاده له لوري د «جزایي اصولنامې» توشېح کولو په غبرګون کې ویلي، چې د دغې ډلې «رژیم» طبقاتي دی. هغه وایي، طالبانو خلک پر طبقو وېشلي او د دوی دا چاره د اسلامي شریعت له ماهیت سره په ټکر کې ده.
د امریکا د کورني امنیت وزیره کرسټي نوم وايي، چې د ۲۰۲۵ کال د جنورۍ له پیله تر دې مهال له امریکا څخه ۲ اعشاریه ۲ میلیونه غیرقانوني کډوال په خپله خوښه بېرته خپلو هېوادونو ته ستانه شوي دي.
د ملګرو ملتونو سر منشي انتونیو ګوترېش ویلي، چې ۲۰۲۶ کال به یې د مأموریت وروستی کال وي. هغه ټینګار کړی، دا وروستی کال به په بشپړه ژمنتیا د یوې عادلانه، سولهییزې او تلپاتې نړۍ د جوړولو لپاره وقف کړي. دغه څرګندونې په داسې حال کې دي، چې ځينې هېوادونه هغه په خپل ماموریت کې پاتې بولي.
د کندهار- هرات پر لویه لاره د هلمند ولایت د دویمې شهرا اړوند په سنګیلان سیمه کې د پنجشنبې په ورځ (د سلواغې ۲مه) د دوو موټرو د ټکر له امله ۶ کسان مړه او ۲ نور ټپيان شوي دي. په ټپیانو کې ماشومان هم شامل دي.
د عراق عالي قضايي شورا د پنجشنبې په ورځ وویل چې له سوریې څخه عراق ته د لېږدول شوو داعش بندیانو پر ضد به قانوني بهیر پیل کړي.
د جرمني د بهرنیو چارو وزیر اعلان کړی چې د جاسوسۍ په تور د روسیې د ډیپلوماتیکې استازولۍ یو غړی له هېواده شړي. د جرمني د بهرنیو چارو وزارت ویلي چې د روسیې سفیر یې احضار کړی او د یاد ډیپلومات د شړلو پرېکړه یې ورته په رسمي ډول ابلاغ کړې ده.
د افغانستان جګړې ته په ماموریت تللی ۲۶ کلن بریتانیایی سرتېری لوییس په خپل کور کې مړ موندل شوی دی. نوموړی په افغانستان کې د بریتانیا د ماموریت له پای ته رسېدو وروسته لندن ته ستون شوی و. ویل کیږي نوموړی له رواني فشارونو کړېده.
په مسکو کې د طالبانو سفیر مولوي ګل حسن حسن د روسیې د سوداګرۍ خونې د رییس ځانګړي استازي الکساندر شکیراندو او د افغان-روسيې سوداګرۍ شورا له رییس دیمیتري انتونوف سره کتلي. یاد سفارت ویلي، چې په دې لیدنه کې روسي استازو په افغانستان کې پانګونې او سوداګرۍ ته لېوالتیاښودلې.
په جینوا کې د افغانستان دایمي استازولۍ د طالبانو د نوې خپرې کړې«جزایي اصولنامې»په اړه ژوره اندېښنه څرګنده کړې او په وینا یې، دغه کړنلاره د تبعیض پراخولو، د روحاني طبقو سیستم تثبیتولو او د بشر د اساسي کرامت، برابرۍ او عدالت له اصولو د سرغړونې لامل کېږي.
د بښنې نړیوال سازمان ویلي، رپوټونه ښيي چې طالبانو په تخار ولایت کې د کانکېندنې د پروژو او د هغو د ناوړه ټولنیزو او چاپېریالي اغېزو پر ضد معترض کسان نیولي او په جبري ډول یې ورک کړي دي. یاد سازمان پر دې مساله ژوره اندېښنه ښودلې ده.
په ننګرهار ولایت کې د شاوخوا ۲۰ میلیونو افغانیو په لګښت د چرګانو د دانې د تولید یوه نوې فابریکه جوړه او ګټې اخیستنې ته وسپارل شوه.
د طالبانو تر واک لاندې افغانستان برېښنا شرکت خبر ورکړی، چې د ازبکستان ۲۲۰ کیلوولټه وارداتي برېښنا مزي یو سرکټ د پلخمري او کابل ترمنځ سیمه کې د واورو او توپان له امله له ستونزې سره مخ شوی او په کابل او یو شمېر ولایتونو کې برېښنا پرې شوې ده.
د افغانستان د عدلیې پخوانی وزیر فضل احمد معنوي وایي، چې د طالبانو د نوې «جزایي اصولنامې» بشپړ متن یې لا نه دی ترلاسه کړی، خو هغه څه چې د رسنیو له لارې خپاره شوي، اسلام، شریعت او افغانستان په نړیواله کچه د انزوا پر لور بیایي.