چینایي رسنیو راپور ورکړی، چې د چین په مرکزي ولایت هونان کې د چانګشا په یوې فابریکه کې چاودنې لږترلږه ۲۱ کسان مړه او ۶۱ نور ټپیان کړي دي. دغه پېښه پر ځايي وخت د دوشنبې په ماښام رامنځته شوه، چې لامل یې لاروښانه نهدی.
په تخار کې د طالبانو د امنیې قوماندانۍ د نشهیي توکو پر وړاندې د مبارزې اداره وايي، د افغانستان او تاجکستان پولې ته څېرمه یې ۱۳۰ بوتله الکولي مشروبات نیولي چې افغانستان ته قاچاق کېدل. یادې ادارې زیاته کړې، چې دغه عملیات یې پولې ته نږدې په ځنګلي سیمو کې ترسره کړي دي.
د طالبانو د دولتي شرکتونو لوی ریاست وایي، چې د «سراسیاب» د ډبرو سکرو دولتي شرکت د ورځې تر ۵۰ ټنو پورې د سکرو د تولید ظرفیت لري. دغه کان د سمنګان ولایت د درهصوف ولسوالۍ په سوېل لوېدیځه برخه کې د شباشک کان شاوخوا موقعیت لري او د سیمې د سکرو لرونکو له مهمو سیمو ګڼل کېږي.
د خیبرپښتونخوا د چارسدې په اتمانزيو سیمه کې ناپېژاندو وسلهوالو د مولانا محمد ادریس صاحب ترنګزي په نوم یو دیني عالم په ډزو وژلی دی. نوموړی د جمعیت علمای اسلام ګوند مشر مولانا فضل الرحمان نږدې کس او د حقانیه مدرسې مدرس و، چې د افغان طالبانو ځینې لوړپوړي چارواکي یې هم روزلي وو.
د پېسو نړۍوال صندوق (ایاېماېف) مشرې کریستالینا جورجیوا خبرداری ورکړی، چې انفلاسیون لا دمخه مخ په لوړېدو دی. د هغې په خبره؛ که په منځني ختیځ کې جګړه تر ۲۰۲۷کال پورې دوام وکړي او د تېلو هر بېرله بیه شاوخوا ۱۲۵ ډالرو ته لوړه شي؛ نو نړۍوال اقتصاد به له ناوړه وضعیت سره مخ شي.
د همایون خواهاني مېرمنې طالبانو ته په یوه لیک کې ویلي، خاوند یې بېګناه دی او ۷ ورځې کېږې چې د هغه د ساتنې ځای، روغتیايي وضعیت او برخلیک په اړه معلومات نهلري. مېرمن خواهاني ویلي، چې له همدې کبله یې کورنۍ او ماشومان اندېښمن او له روحي ستونزو سره مخ دي.
د طالبانو د کډوالو او بېرته راستنېدونکو چارو وزارت ویاند عبدالمطلب حقاني وایي، چې په روانې غویي میاشت کې له پاکستان، ایران او ترکیې نه په خپله خوښه او جبري توګه ۱۰۴زره او ۲۵۵ کډوال بېرته افغانستان ته ستانه شوي دي.
د افغانستان د ښځینهو کرېکټ ملي لوبډلې لوبډلمشرې ناهيد سپان افغانستان انټرنشنل ته په یوه پیغام کې د فوټبال نړۍوال فدراسیون (فیفا) لهخوا د افغانستان د ښځینهو فوټبال ملي لوبډلې د رسمیت پېژندلو مبارکي وړاندې کړه او دغه اقدام یې د سپورت په برخه کې یو لوی، مهم او تاریخي ګام وباله.
په پاکستان کې د تېر ۲۰۲۵کال پرمهال د جنسیت پر بنسټ د تاوتریخوالي پېښې ۲۵ سلنه زیاتوالی ښیي، چې له دې ډلې یوازې د ښځو پر وړاندې د سایبري ځورونې ۲زره او ۵۸۶ پېښې ثبت شوې دي. له دې سره ۴۷۰ ښځې بیا د «غیرت» په نوم وژل شوې دي.
د امریکا ولسمشر، ډونالډ ټرمپ ویلي چې د ایران د نفتو څاهګانې ښايي ډېر ژر د «طبیعي چاودنو» له ګواښ سره مخ شي، ځکه د ده په وینا دغه هېواد د نفتو د زېرمه کولو له ظرفیت سره نږدې حد ته رسېدلی دی.
د طالبانو په ولکه کې د افغانستان د فوټبال فدراسیون اعلان کړی، چې د هېواد د فوټبال ملي لوبډله به د مالدیف په کوربتوب په یوه څلور اړخیز ټورنمنټ کې برخه واخلي.
د کابل ښار یوې اوسېدونکې افغانستان انټرنشنل ته په رالېږلي پیغام کې ویلي، چې د دغه ښار د تایمني سیمې په بازار کې د طالبانو له خوا د ښځو د پوښاک د څار په لړ کې یو شمېر ښځې نیول شوي او ځینې یې له تاوتریخوالي سره هم مخ شوې دي.
د امریکا د پټو خدمتونو ادارې ویلي، چې د دوشنبې په ورځ سپینې ماڼۍ ته نږدې له یو وسلوال او «مشکوک» کس سره مخامخ شول، چې وروسته د ډزو په تبادله کې یاد کس ټپي شوی دی. ویل کېږي، چې د پېښې له امله سپینه ماڼۍ د لنډ وخت لپاره قرنطین (بند) اعلان شوه.
د فرانسې ولسمشر امانوېل مکرون ویلي، د ایران له لوري د متحده عربي اماراتو پر ملکي بنسټونو بریدونه «ناجایز او د منلو وړ نه دي». هغه ټینګار کړی چې د روان کړکېچ دوامدار حل د هُرمز تنګي د بیا پرانیستلو او د امنیتي تضمینونو له لارې ممکن دی.
د ایران د بهرنیو چارو وزیر سید عباس عراقچي ویلي، د هُرمز تنګي وروستیو پېښو وښوده چې سیاسي کړکېچونه پوځي حل نه لري، او ټینګار یې کړی چې د پاکستان په منځګړیتوب خبرې روانې دي، خو امریکا او متحده عربي امارات باید له وضعیت څخه د ناوړه ګټې اخیستنې پر وړاندې محتاط وي.
پرون دوشنبه د غویي په ۱۴مه نېټه د پاکستان د کراچۍ ښار په بېلابېلو سیمو کې د سختې ګرمۍ له امله لسو کسانو خپل ژوند له لاسه ورکړي دي. ویل کېږي، چې په کراچۍ ښار کې د ۲۰۱۸ کال راهیسې دا تر ټولو ګرمه ورځ ثبت شوې ده.
د جرمني د کورنیو چارو وزیر، الکساندر دوبرینټ ویلي چې له جرمني څخه د هغو افغانانو اخراج چې جرمونه یې ترسره کړي، په منظم او دوامداره ډول به افغانستان ته دوام ولري. نوموړي ویلي، دا بهیر به د سیاسي ستونزو او د طالبانو له استازو سره د خبرو اړتیا سره سره هم نه درېږي.
د پاکستان د پنجاب ایالت په لاهور ښار کې القاعده شبکې ته د جلب او جذب په تور نيول شوي «يوټيوبر» محمد سعد بن رياض زندان ته لېږدول شوی دی. هغه مېرمن ويلي، دوی به د سعد پر ضد «جعلي او درغلیزه قضیه تر معقول پای رسوي».
د روسیې د بهرنیو چارو وزارت ویلي چې مسکو د مې په ۸ او ۹ مه د «بریا ورځې» په مناسبت اوربند اعلانوي او له اوکراین څخه یې د ورته اقدام تمه کړې، خو خبرداری یې ورکړی چې د اوربند د ماتېدو په صورت کې به سخت پوځي ځواب ورکړي.
د ملاله یوسفزۍ بنسټ ویلي، نجونې له زدهکړې محرومول نه یوازې اخلاقي ستونزه ده، بلکې د نړیوال بانک د اټکل له مخې د نړۍ اقتصاد ته د ۱۵ تر ۳۰ټریلیون ډالرو پورې اوږدمهاله زیان اړوي. دا په داسې حال کې ده چې په افغانستان کې میلیونونه نجونې د زدهکړو له فرصت څخه بېبرخې پاتې دي.
د بدخشان ولایت یو اوسېدونکي افغانستان انټرنشنل - پښتو ته په رالېږلي پیغام کې ویلي، چې په افغانستان کې د کوکنارو کښت، د نشهيي توکو پراخه کارونه او د کانونو غیرشفاف کېندنې د خلکو ژوند له جدي ستونزو سره مخ کړی او د ده په وینا، نړیواله ټولنه باید د دغه واقعیتونو له نږدې څېړنه وکړي.