افغانستان انټرنشنل ته رارسېدلي راپورونه ښيي چې طالبانو هڅه کړې، د هرات د وروستیو اعتراضونو پر مهال د وژل شوي ۱۶ کلن مرتضی د مړینې په اړه روایت بدل کړي او د هغه کورنۍ تر فشار لاندې راولي.
په خیبر پښتونخوا کې د بشري حقونو فعالې جمایمه اپریدۍ د طالبانو له لوري په افغانستان او په ځانګړې ډول په هرات کې د افغان ښځو پر وړاندې د محدودیتونو او چلند په اړه اندېښنه ښودلې او ویلي یې دي چې نړیواله ټولنه باید د دې وضعیت پر وړاندې عملي ګامونه واخلي.
د خېبرپښتونخوا پولیسو وایي، چې په دغه ایالت کې د محرم الحرام په مناسبت د ماتمي مراسمو او غونډو د امنیت ټینګښت لپاره یې هر اړخیز امنیتي پلان چمتو کړی چې له مخې به یې په ټولو سیمو کې له ۴۳ زرو څخه زیات امنیتي عسکر ځای پر ځای شي.
د پاکستان د سنا مجلس غړي دنېش کمار ویلي، قران کریم له سود اخیستو منع کړې، خو د پاکستان نیمايي بودیجه د سود په ورکړه لګېږي. هغه د غونډې پر مهال د سود په اړه د قران کریم ځینې ایتونه هم ولوستل.
د بښنې نړيوال سازمان ويلي، چې په ازاد کشمیر کې د انټرنېټ د بندېدو پرله پسې ۱۲مه ورځ ده. دغه سازمان له پاکستان څخه غوښتي چې سمدستي ټول «ارتباطي خدمات» بېرته فعال کړي.
د امریکا متحده ایالاتو څارنوالانو د سېشنبې په ورځ اعلان وکړ چې د رحمانالله لکڼوال په نوم د افغانستان د ۲۹ کلن وګړي لپاره به د اعدام سزا وغواړي. نوموړی د امریکا د ملي ګارد د یوه غړي د وژلو او د بل سرتېري د سخت ټپي کولو په تور تورن دی.
د پاکستان د دفاع وزیر خواجه اصف ويلي، دوی د طالبانو سره څو ځله خبرې کړي خو دوی ته یې د امن ضمانت نه دی ورکړی او که اوس هم څوک له پاکستان څخه جرګه بوځي د طالبانو سره خبرې کوي، لاړ دې شي خو بې پايلې به نه راځي.
یوه نوې پراخه طبي څېړنه ښيي چې هغه ښځې چې د وزن کمولو او د دویم ډول شکرې ناروغۍ د درملنې لپاره د (ایل پي جي - ۱ ) ډلې درمل، لکه اوزمپیک او وېګووي، کاروي د نورو ښځو په پرتله د سینې د سرطان له کم ګواښ سره مخ دي.
د افغانستان د سولې او عدالت ملي حرکت د امریکا او ایران ترمنځ د اوربند تمدید او د سوداګریزو لارو د پرانیستلو د پرېکړې هرکلی کړی او دا پرمختګ یې په سیمه او نړۍ کې د کړکېچ د کمولو، د امنیت د ټینګښت او د ثبات د رامنځته کولو لپاره یو مهم ګام بللی دی.
د پکتیکا ولایت یو شمېر اوسېدونکو ادعا کړې، چې په دغه ولایت کې د یوه سپینږیري سړي د کور دروازې ته ماین ایښودل شوی و چې د چاودنې له امله یې پلار او زوی ټپیان شوي دي. دوی وایي پېښه هغه مهال رامنځته شوه چې یاد سپینږیری سهار وختي د خپل کور دروازه خلاصوله.
د افغانستان لپاره د بریتانیا ځانګړي استازي ریچارډ لینډسي د ملګرو ملتونو د مرستندویه پلاوي (یوناما) د ماموریت د یو کال لپاره د غځولو هرکلی کړی او ویلي یې دي چې یوناما په افغانستان کې د بشري مرستو په همغږۍ کې مهم رول لري.
د طالبانو مخالفې ډلې، مقاومت جبهې اعلان کړی چې ځواکونو یې د کابل ښار په پنځمه امنیتي حوزه کې په یوه هدفمند برید کې درې طالبان وژلي او یو بل یې ټپي کړی دی. د دغې جبهې د خبرپاڼې له مخې، دغه برید د یکشنبې په ماښام د غبرګولي په ۲۴مه نېټه د کابل د سیلو سړک په سیمه کې شوی دی.
د هلمند د صنایعو او کانونو خونې د معلوماتو له مخې، د روان کال له پیل راهیسې شاوخوا ۸۰ زره مټریک ټنه پنبه بهرنیو هېوادونو ته صادره شوې او تمه ده چې په راتلونکو میاشتو کې به د صادراتو کچه نوره هم لوړه شي.
باخبره سرچینو افغانستان انټرنشنل ته ویلي چې د ایران اسلامي جمهوریت پر ملي مقاومت جبهې فشارونه راوړي چې پر طالبانو خپل بریدونه ودروي. د مقاومت جبهې دوو جګپوړو غړو وویل چې د ایران اسلامي جمهوریت دا جبهه له طالبانو سره له جګړې منع کړې ده.
د ایران د پخوانۍ شاهي کورنۍ غړي رضا شاه پهلوي په لندن کې د بریتانیا د پارلمان د بهرنیو اړیکو کمېټې له غړو سره تر لیدنې وروسته ویلي، هره هغه هوکړه چې د ایران د اوسني رژیم د بقا او ژغورنې لامل شي، یوه ستراتیژیکه تېروتنه ده او د ایران خلک به یې ونه مني.
د اوکراین ډرون برید د مسکو د تیلو په یوه لویه تصفیهخونه کې اور بل کړی او د راپورونو له مخې یې دغه تاسیسات له کاره غورځولي دي. دغه برید د «ګازپروم» د تصفیهخونې پر یوه مهمه برخه شوی، چې د دغې فابریکې شاوخوا ۵۳ سلنه تولیدي ظرفیت جوړوي.
د امریکا ولسمشر ډونالډ ټرمپ ویلي چې له ایران سره د لنډمهاله هوکړې متن به ډېر ژر عام شي او دا به په روښانه ډول تضمین کړي چې تهران به اټومي وسلې نه لري.
په هالنډ کې د پښتو ژبې ورځ د جون په ۱۴مه په یوه فرهنګي غونډه کې ونمانځل شوه. د غرغښت او پیوستون ټولنو په دې ګډه غونډه کې پر کلتوري موضوعاتو سربېره د پښتو ژبې پر ډیجیټلي کېدو او په نوې ټکنالوژۍ کې د ژبې پر حضور خبرې وشوې.
بریتانیا او اروپایي ټولنه د جولای پر۲۲مه خپله دویمه سرمشریزه غونډه کوي. د لومړي وزیر کیر سټارمر حکومت هڅه کوي له اروپایي ټولنې سره اړیکې بیا تنظیم کړي او د سوداګرۍ، امنیت او اقتصاد په برخو کې نږدې همکاري پیاوړې کړي.
د یونیسف نوی راپور وایي چې په افغانستان کې له ۸،۸ میلیونو څخه ډېر ماشومان له دریو اقلیمي خطرونو ؛ سېلابونو، وچکالۍ او ګرمۍ سره مخ دي، چې دا وضعیت د ماشومانو د روغتیا، زده کړو او پایښت لپاره جدي ګواښ ګڼل کېږي.
د ترکیې د بهرنیو چارو وزیر د سې شنبې په ورځ وویل چې خپل روسي سیال ته یې په تور سمندرګي کې له داسې ګامونو د ډډې کولو ویلي چې سیمه ییز امنیت او د ترکیې ګټې ګواښي. هاکان فیدان د کییف او مسکو ترمنځ د منځګړیتوب لپاره د ترکیې وړاندیز هم تکرار کړی دی.