د استقلال جبهې په نوم د طالبانو مخالفې وسلهوالو ډلې ادعا کړې، چې د ننګرهار په درونټې سیمه کې په یوه کمین کې ۲ طالبان وژلي او یو بل یې ټپي کړی دی. طالبانو د تېر په څېر د دغې جبهې د بریدونو په تړاو چوپتیا غوره کړې او افغانستان انټرنشنل یې هم په خپلواکه توګه نهتاییدوي.
د افغانستان د پخوانۍ ولسي جرګې مشر عبدالروف ابراهیمي وایي چې د ازبکي ژبې او د هېواد ترکتوکمو ته، هم د مخکېني جمهوریت پر مهال او هم د طالبانو تر اوسنۍ واکمنۍ لاندې چندان پاملرنه نه ده شوې. هغه د دې ژبې د ودې او پراختیا لپاره د ځانګړې بودیجې د ټاکلو غوښتنه کړې ده.
د امریکا د بهرنیو چارو وزارت ویاند ټامي پیګټ، د رویټرز خبري اژانس د هغه راپور په غبرګون کې چې ګواکې امریکا د خلیج فارس له هېوادونو څخه د خپلو سفارتونو د کارکوونکو د ایستلو امر صادر کړی، ویلي چې دغه راپور ناسم دی.
د بنګلهدېش د بهرنیو چارو وزارت ویاند شاهدالکریم د چهارشنبې په ورځ وویل، چې سعودي عربستان تر اوسه د دوو بنګلهدېشي وګړو د اعدام په هکله د ډاکې پوښتنو ته ځواب نه دی ویلی. هغه وایي، د بنګلهدېش چارواکو ته له خبر ورکولو پرته د دوی وګړي اعدام شوي دي.
د خیبرپښتونخوا د ۱۲ قبایلي ولسوالیو د تازه جوړ شوي سکرتریت ویاند محمود جان بابر ادعا لري، چې افغان طالبان او تحریک طالبان پاکستان سره یو لاس دي. خو افغان طالبانو په وار وار دغه ادعا رد کړې، چې ګواکې له پاکستاني طالبانو سره یو لاسي دي.
د طالبانو په واک کې د المپیک، بدني روزنې او سپورټ عمومي ریاست وايي، د تکواندو د ازادو سیالیو څوارلسم پړاو د کابل په ګډون د پنځو ولایتونو د ۱۰۰ ورزشکارانو په ګډون پیل شوی دی.
رویټرز خبري اژانس د درېیو امریکایي چارواکو په حواله راپور ورکړی، چې د امریکا بهرنیو چارو وزارت د خلیج فارس په سیمه کې د خپلو سفارتونو د ځینو کارکوونکو او د هغوی د کورنیو د غړو د ایستلو لپاره چمتووالی نیسي.
د ننګرهار اوسېدونکي حاجي ارباب خان په دغه ولایت کې د یوه ډاکټر او د هغه د روغتون د کارکوونکو له لوري تر جراحي عملیات وروسته د طبي بېغورۍ او د اکسیجن د نشتوالي له کبله د خپلې ناروغې خور د مړینې خبر ورکړی دی.
د یمن دولتي چارواکي وايي، د دغه هېواد په تعز ولایت کې د حوثي وسلهوالو د یوې اوونۍ په بریدونو کې ۹ ملکي وګړي وژل شوي او ۴۲ نور ټپیان دي.
د افغانستان کرېکټ ملي لوبډلې د یو ورځنیو نړیوالو درې اړخیزو سیالیو لوبلړۍ په دویمه لوبه کې د بنګلهدېش ملي لوبډلې ته هم ماتې ورکړې او د روانو سیالیو پایلوبې ته یې لاره وموندله. د دغې لوبلړۍ پایلوبه به د راروانې جمعې په ورځ د افغانستان او زېمبابوې کرېکټ ملي لوبډلو ترمنځ ترسره شي.
بامیان ولایت کې ځايي سرچینو د چهارشنبې په ورځ د تلې په ۲۹مه، افغانستان انټرنشنل ته ویلي چې د ملګرو ملتونو یو کارکوونکی د ډزو موخه ګرځېدلی دی. ډیپلوماتیکي سرچینې وایي، د ملګرو ملتونو دغه کارکوونکی له دغه امنیتي پېښې څخه روغ رمټ وتلی دی.
پاکستانۍ ورځپاڼې «اکسپرس ټریبیون» راپور ورکړی، چې د پاکستان او ایران ترمنځ پوله د څو ورځني بندښت وروسته د سېشنبې په ورځ، د تلې په ۲۸مه نېټه، د سرحدي ستونزو له حل کېدو سره بېرته پرانیستل شوې ده.
سنټرل ایشیا ټایمز رسنۍ په یو تحلیل کې ویلي، که څه هم د منځنۍ اسیا هېوادونو له طالبانو سره سوداګریزې او اقتصادي اړیکې پراخې کړې دي، خو په افغانستان کې د داعـ .ـش خراسان او نورو وسلهوالو ډلو د شتون له امله امنیتي اندېښنې لا هم پر ځای پاتې دي.
د طالبانو تر کنټرول لاندې د افغانستان برېښنا شرکت رییس عبدالحق همکار په دوبۍ کې د ویټېکس (WETEX) په نړۍوال نندارتون کې ویلي، چې د برېښنا د تولید، لېږد او وېش په برخو کې د پرمختللو تجهیزاتو او معیاري ټکنالوژیو کارول د افغانستان برېښنا شرکت له مهمو لومړیتوبونو څخه دي.
افغانستان انټرنشنل ته سرچینو د چهارشنبې په ورځ، د تلې په ۲۹مه، راپور ورکړی، چې د بامیان ولایت په یوه امنیتي پېښه کې د ملګرو ملتونو یو کارکوونکی د ډزو موخه ګرځېدلی دی.
ځايي سرچینې وايي، د طالبانو مامورینو د کابل په لوېدیځ کې، په ځانګړي ډول دشت برچي او شهرک اتفاق کې، د بېجوازه ودانیو په پلمه د یو شمېر کورونو د ویجاړولو او د اوسېدونکو د ایستلو اقدام کړی دی. سرچینې وايي، ځینې کورنۍ د کورونو د ژغورلو لپاره طالب چارواکو ته د پیسو ورکولو ته اړ شوي.
د طالبانو مخالفې وسلهوالې ډلې، متحدې جبهې ادعا کړې چې د غزني ولایت په قرهباغ ولسوالۍ کې یې د طالبانو پر یوه پولیس برید کړی او هغه یې وژلی دی. د دغې جبهې له خوا په خپره شوې خبرپاڼه کې راغلي چې دغه عملیات د قرهباغ ولسوالۍ اړوند د کامدیشک په کلي کې ترسره شوي دي.
خوست لپاره طالب مسوولین وايي، په دغه ولایت کې یو شمېر زرګرۍ او د خوراکي توکو پلورنځي یې تړلي او هټۍوال یې «نظارت خونې» ته لېږدولي دي. د مسوولینو په وینا، یادو کسانو د قانوني لایحې څخه سرغړونې کړي. دا په داسې حال کې ده چې طالبان د پخوا په پرتله اوس د څار پر ځای په نیونو تکیه کوي.
د طالبانو د کانونو او پټرولیم وزارت په چوکاټ ک د ټاپي پروژې د همغږۍ مسوول محمد نظیم سمون د ترکمنستان په پلازمېنه عشقاباد کې ویلي، چې په افغانستان کې د ټاپي نللیکې د غځولو کار د دغې سیمهیزې پروژې تخنیکي او عملي امکان ثابت کړی دی.
د نجونو د زدهکرو په اړه د «امر ثاني» یو صادرونکی ندا محمد ندیم وايي، هېواد د علم په واسطه ابادېدای او پرمختګ کولای شي. د چارو یو شمېر څارونکي وايي، د علم د ارزښت په تړاو د ندیم اعتراف په داسې حال کې دی، چې نجونې له شپږم ټولګي او له پوهنتوني زدهکړو بېبرخې دي.
د مصر ولسمشر عبدالفتاح السیسي ویلي، چې له سعودي عربستان څخه د دغه هېواد احتمالي پوځي ملاتړ به یوازې د سعودي عربستان د خاورې او پولو تر دفاع محدود وي او پر یمن به بریدونه پکې شامل نه وي.