بریتانیا او اروپایي ټولنه د جولای پر۲۲مه خپله دویمه سرمشریزه غونډه کوي. د لومړي وزیر کیر سټارمر حکومت هڅه کوي له اروپایي ټولنې سره اړیکې بیا تنظیم کړي او د سوداګرۍ، امنیت او اقتصاد په برخو کې نږدې همکاري پیاوړې کړي.
د یونیسف نوی راپور وایي چې په افغانستان کې له ۸،۸ میلیونو څخه ډېر ماشومان له دریو اقلیمي خطرونو ؛ سېلابونو، وچکالۍ او ګرمۍ سره مخ دي، چې دا وضعیت د ماشومانو د روغتیا، زده کړو او پایښت لپاره جدي ګواښ ګڼل کېږي.
د ترکیې د بهرنیو چارو وزیر د سې شنبې په ورځ وویل چې خپل روسي سیال ته یې په تور سمندرګي کې له داسې ګامونو د ډډې کولو ویلي چې سیمه ییز امنیت او د ترکیې ګټې ګواښي. هاکان فیدان د کییف او مسکو ترمنځ د منځګړیتوب لپاره د ترکیې وړاندیز هم تکرار کړی دی.
د امریکا ولسمشر ډونالډ ټرمپ ویلي چې روسیه باید له اوکراین سره د سولې هوکړه وکړي. هغه زیاته کړې چې د فرانسې په کوربه توب د اوو سترو صنعتي هېوادونو (۷ډلې) د سرمشریزې په څنډه کې یې د اوکراین له ولسمشر سره «ډېره ښه» لیدنه کړې او د جګړې د پای ته رسولو لپاره به هر ممکن اقدام وکړي.
د طالبانو د ریاستالوزرا اقتصادي مرستیال ملا عبدالغني برادر په مشرۍ د اقتصادي کمېسیون غونډه کې په افغانستان کې د بېکارۍ پر کمولو خبرې شوې دي. په دې غونډه کې د اوو زونونو د والیانو پر وړاندیزونو هم بحثونه شوي دي.
د اسراییل پخواني لومړي وزیر نفتالي بېنېټ د ایران اسلامي جمهوریت ته خبرداری ورکړی او ویلي یې دي، تر هغه به له دې هېواده لاس وانخلي چې د ده په وینا، د ایران خلک ازاد شوي نه وي او تهران اټومي وسلې ونه لري.
د طالبانو د فراه ولایت امنیه قوماندانۍ ویلي چې کشفي ځواکونو یې د دغه ولایت په مرکز کې د ۷ میلیونه او ۵۰۰ زره افغانیو په ارزښت ۲۵۰ کارټنه پاکستاني قاچاقي درمل نیولي دي.
د سولې نړیوال شاخص د ۲۰۲۶ کال د تازه راپور له مخې، په افغانستان کې د سیاسي بېثباتۍ کچه کمه شوې، خو په سویلي اسیا کې تر ټولو ناامن هېواد دی او د ۲۰۲۶ کال د سولې نړیوال شاخص کې د نړۍ په کچه ۱۵۷م ځای لري.
د طالبانو د صنعت او سوداګرۍ وزارت مرستیال د ازبکستان د تاشکند ولایت له والي ظاهر میرزایف سره په لیدنه کې د دواړو هېوادونو ترمنځ د اقتصادي او سوداګریزو همکاریو د پراختیا په اړه خبرې کړې دي. ازبک پلاوي ژمنه کړې چې د چنګاښ په میاشت کې به له سلو سوداګرو سره کابل ته سفر وکړي.
د بلجیم د بهرنیو چارو وزارت بروکسل ته د طالبانو د سفر په اړه افغانستان انټرنشنل ته وویل، چې د ناستو د جوړولو او د پلاوي د بللو په اړه پرېکړه د اروپايي بنسټونو پر غاړه ده. د دغه وزارت ویاند لورنس سوینن وویل «اروپايي بنسټونه پرېکړه کوي چې کومې ناستې جوړې کړي او څوک ور وبولي.»
د طالبانو د ارشاد، حج او اوقافو وزارت وايي، چې یوه چینایي وګړي چې «لي نام» نومېده او له څه مودې راهیسې په افغانستان کې اوسېده، د اسلام دین منلی دی. د یاد وزارت په وینا، نوموړي په کابل کې دوی ته مراجعه وکړه او هلته یې د شهادت کلمه وویله.
د ملګرو ملتونو د سرمنشي د ځانګړي استازي نوی مرستیال برونو لمارکي کابل ته ورسېد او په رسمي ډول یې دنده پیل کړه. یوناما وایي، نوموړی به په افغانستان کې د ملګرو ملتونو د ادارو، صندوقونو او پروګرامونو د فعالیتونو د همغږۍ مسوولیت پر غاړه ولري.
د دانګام ولسوالۍ له غرنیو کلیو د وتلو پر مهال مرمۍ دومره ډېرې شوې، چې عبدالقاهر نورې نه شوای شمېرلی. هغه وایي، په ځینو ورځو کې به دومره ډزې کېدې چې ماشومانو یې له امله د شپې خوب نه شوای کولای. اوس هغه له خپلې کورنۍ او ټپي شوې لور سره د ننګرهار په بهسود ولسوالۍ کې اوسیږي.
د هلمند ولايت په مرکزي لوبغالي کې د سويل ختيځ زون په کچه د غوره لوبډلې ټاکلو په موخه د فوټبال سيالۍ پيل شوې، چې د پنځو ولايتونو لوبډلې پکې ګډون لري او ټاکل شوې پنځه ورځې دوام وکړي.
د جرمني د هیسن ایالت د هاناو محکمې یو ۷۰ کلن افغان د خپل ورور د وژنې په جرم په اتو کلونو بند محکوم کړی دی. محکمې ثابته کړه چې دغه سړي د ۲۰۱۵ کال په اکتوبر میاشت کې په کندهار کې تر ځان شپږ کاله کشر ورور په ډزو وژلی و.
جرمني یو ځل بیا له لیپزیګ/هاله هوايي ډګره کابل ته شاوخوا ۳۰ تنه افغان پناه غوښتونکي په یوه چارټر الوتکه کې لېږدولي دي. دا اقدام له طالبانو سره په همغږۍ شوی او لیږل شوي کسان ټول نارینه دي.
د طالبانو د پنجشېر ولایت ویاند ویلي، چې د دغه ولایت له کانونو د تازه استخراج شویو زمردو څخه ۳ زره او ۲۰۸ قیراطه زمرد د ۱۳۹ زره او ۴۰۰ امریکايي ډالرو په ارزښت نن د داوطلبۍ له لارې وپلورل شول.
د چین د بهرنیو چارو وزیر وايي، په افغانستان کې باید د ملي پخلاینې بهیر پر مخ ولاړ شي او د افغان سولې او بیا رغونې بهیر اسانه شي. نوموړي ویلي، چین د «افغانستان په مالکیت او مشرۍ» د افغانستان د ستونزو حل غواړي.
د طالبانو د ننګرهار د پوهنې مرستیال لیاقت علي لېسو ته خبرداری ورکړی، چې زده کوونکي په فراغت غونډو کې پر جامو لاسلیکونو، رنګ پاشلو او ملي بیرغونو ته پرې نه ږدي. افغانستان انټرنشنل ته په رسېدلي غږ کې نوموړي ویلي، چې که دا کار تکرار شي د ازموینو پایلې او بریلیکونه به یې معطل شي.
د طالبانو د کورنیو چارو وزارت ویلي چې له نشهیي توکو سره د مبارزې ځواکونو یې د جلا جلا عملیاتو په ترڅ کې د کابل ولایت په بېلابېلو سیمو کې ۲۸ کسان د نشهیي توکو د قاچاق او پلور په تړاو نیولي دي.
د خېبرپښتونخوا د کورني او قبايلي چارو سلاکار طارق سعید د افغان کډوالو د ستنېدو د ارزونې په غونډه کې ټينګار وکړ، چې د کډوالو د ایستلو پروسه دي په ۴۵ ورځو کې بشپړه شي. نوموړي مسولینو ته امر کړی چې د هغو کسانو د ملکیتونو پر وړاندې اقدامات وکړي چې غیري قانوني مېشت دي.