نن (د مئ ۵مه) د قابلو نړۍوالې ورځې سره برابره ده. دغه ورځ داسې مهال نمانځل کېږي، چې په افغانستان کې د نجونو او ښځو لپاره پر زدهکړو لګېدلي بندیز او محدودیتونو د قابلو پر شمېر او فعالیت ناوړه اغېز کړی او د ښځو د روغتیايي وضعیت په اړه یې اندېښنې زیاتې کړې دي.
د طالبانو تر واک لاندې د برېښنا شرکت وايي، وروستیو ورښتونو په هېواد کې د اوبو بندونه ډک کړي او په ټول هېواد کې د برېښنا د وېش کچه د پام وړ لوړه شوې ده. بل خوا خلک بیا غوښتنه کوي، چې د یو کیلو واټ بیه دې له دوه نیمو افغانیو را کمه شي.
د طالبانو مرستیال ویاند حمدالله فطرت په یوې خبرپاڼه کې د خیبرپښتونخوا په چارسده کې پر مولانا محمد ادریس صاحب ترنګزي برید غندلی او خواشینې یې ښودلې ده. طالبانو دا کار «د علماوو د دوښمنانو» کار بللی دی.
د طالبانو د مالیې وزارت خبر ورکړی، چې د یاد وزارت د ګمرکونو لوی ریاست د ګرځنده څارنې کارکوونکو په تېرو دوو اوونیو کې د کندهار، نیمروز، ننګرهار او هلمند ولایتونو په بېلابېلو سيمو کې په زیاته اندازه قاچاقي توکي نیولي دي.
د خیبرپښتونخوا په چارسده کې سلګونه کسان د مولانا محمدادریس د ژونې په غبرګون لارو او کوڅو ته راوتلي او لاریون یې کړی. په ورته وخت کې د پاکستان یوشمېر سیاستوالو، فعالانو او عامو خلکو پر هغه شوی برید غندلی دی.
په کندهار کې د طالبانو د اطلاعاتو او کلتور ریاست خبر ورکړی، چې له دغه ولایت څخه جدې ته د حاجیانو د لېږد لړۍ نن سېشنبه (د غویي ۱۵مه) پیل شوه. په کندهار کې د طالبانو د ارشاد، حج او اوقافو ریاست ویاند عبدالرازق عمري هم ویلي، چې له کندهار نه د حاجیانو د لېږد بهیر رسماً پیل شوی دی.
د طالبانو د ریاستالوزرا اقتصادي معاونیت خبر ورکړی، چې د یادې ډلې د پانګونې بینالوزارتي کمیټې د خپل فعالیت له پیل راهیسې د ۳۵ مېلیارده افغانیو په ارزښت کورنۍ او بهرنۍ پانګونه جذب کړې ده.
د طالبانو روغتیا وزارت خبر ورکړی، چې د یاد وزارت د خوړو او درملو مرستیال مولوي حمدالله زاهد او مل پلاوي یې افغان سوداګرو ته د درملو واردولو په برخه کې د اسانتیاوو رامنځته کولو په موخه روسیې هېواد ته سفر کړی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې په تېرو دوو ورځو کې (د غویي ۱۳مه او ۱۴مه) ۱۶۱۸ کډوالې کورنۍ چې ټولټال ۷زره او ۳۴۲ کسان کېږي؛ له ایران او پاکستان نه افغانستان ته ستنې شوې دي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو د کابل ښار په ۱۵مه حوزه او د فاریاب په قیصار ولسوالۍ کې یې یو، یو کوډګر د «سحر او کوډو» په تور نیولي دي. یاد وزارت زیاته کړې، چې دغه کسان د کورنیو ترمنځ د جنجالونو لامل وو.
په کندهار کې د سوداګرۍ او پانګونې خونې مشر عبدالاحد صدیقي خبریالانو ته ویلي، چې د چین د درېیو ایالاتونو له سوداګرۍ خونو سره یې د صادراتو او وارداتو د اسانتیا او د سوداګرۍ کچې د لوړوالي په موخه درې هوکړهلیکونه لاسلیک کړي.
په تخار کې د طالبانو د والي ویاند محمدعارف عارف خبر ورکړی، چې د دغه ولایت په بېلابېلو برخو کې د وروستیو ورښتونو او سېلابونو له امله درې کسه مړه او درې نور ټپیان شوي دي. د هغه په وینا؛ د یادې پېښې قربانیان د دغه ولایت د کلفګان او رستاق ولسوالیو اوسېدونکي دي.
چینایي رسنیو راپور ورکړی، چې د چین په مرکزي ولایت هونان کې د چانګشا په یوې فابریکه کې چاودنې لږترلږه ۲۱ کسان مړه او ۶۱ نور ټپیان کړي دي. دغه پېښه پر ځايي وخت د دوشنبې په ماښام رامنځته شوه، چې لامل یې لاروښانه نهدی.
په تخار کې د طالبانو د امنیې قوماندانۍ د نشهیي توکو پر وړاندې د مبارزې اداره وايي، د افغانستان او تاجکستان پولې ته څېرمه یې ۱۳۰ بوتله الکولي مشروبات نیولي چې افغانستان ته قاچاق کېدل. یادې ادارې زیاته کړې، چې دغه عملیات یې پولې ته نږدې په ځنګلي سیمو کې ترسره کړي دي.
د طالبانو د دولتي شرکتونو لوی ریاست وایي، چې د «سراسیاب» د ډبرو سکرو دولتي شرکت د ورځې تر ۵۰ ټنو پورې د سکرو د تولید ظرفیت لري. دغه کان د سمنګان ولایت د درهصوف ولسوالۍ په سوېل لوېدیځه برخه کې د شباشک کان شاوخوا موقعیت لري او د سیمې د سکرو لرونکو له مهمو سیمو ګڼل کېږي.
د خیبرپښتونخوا د چارسدې په اتمانزيو سیمه کې ناپېژاندو وسلهوالو د مولانا محمد ادریس صاحب ترنګزي په نوم یو دیني عالم په ډزو وژلی دی. نوموړی د جمعیت علمای اسلام ګوند مشر مولانا فضل الرحمان نږدې کس او د حقانیه مدرسې مدرس و، چې د افغان طالبانو ځینې لوړپوړي چارواکي یې هم روزلي وو.
د پېسو نړۍوال صندوق (ایاېماېف) مشرې کریستالینا جورجیوا خبرداری ورکړی، چې انفلاسیون لا دمخه مخ په لوړېدو دی. د هغې په خبره؛ که په منځني ختیځ کې جګړه تر ۲۰۲۷کال پورې دوام وکړي او د تېلو هر بېرله بیه شاوخوا ۱۲۵ ډالرو ته لوړه شي؛ نو نړۍوال اقتصاد به له ناوړه وضعیت سره مخ شي.
د همایون خواهاني مېرمنې طالبانو ته په یوه لیک کې ویلي، خاوند یې بېګناه دی او ۷ ورځې کېږې چې د هغه د ساتنې ځای، روغتیايي وضعیت او برخلیک په اړه معلومات نهلري. مېرمن خواهاني ویلي، چې له همدې کبله یې کورنۍ او ماشومان اندېښمن او له روحي ستونزو سره مخ دي.
د طالبانو د کډوالو او بېرته راستنېدونکو چارو وزارت ویاند عبدالمطلب حقاني وایي، چې په روانې غویي میاشت کې له پاکستان، ایران او ترکیې نه په خپله خوښه او جبري توګه ۱۰۴زره او ۲۵۵ کډوال بېرته افغانستان ته ستانه شوي دي.
د افغانستان د ښځینهو کرېکټ ملي لوبډلې لوبډلمشرې ناهيد سپان افغانستان انټرنشنل ته په یوه پیغام کې د فوټبال نړۍوال فدراسیون (فیفا) لهخوا د افغانستان د ښځینهو فوټبال ملي لوبډلې د رسمیت پېژندلو مبارکي وړاندې کړه او دغه اقدام یې د سپورت په برخه کې یو لوی، مهم او تاریخي ګام وباله.
په پاکستان کې د تېر ۲۰۲۵کال پرمهال د جنسیت پر بنسټ د تاوتریخوالي پېښې ۲۵ سلنه زیاتوالی ښیي، چې له دې ډلې یوازې د ښځو پر وړاندې د سایبري ځورونې ۲زره او ۵۸۶ پېښې ثبت شوې دي. له دې سره ۴۷۰ ښځې بیا د «غیرت» په نوم وژل شوې دي.