د روسیې ولسمشر ولادیمیر پوتین وايي، چې اوکراین د روسیې پر اقتصادي تاسیساتو د بریدونو په ډېرولو «د پانډورا صندوق» پرانیستی او مسکو به د اوکراین «تر ټولو حساسې اقتصادي برخې» په نښه کړي.
د افغانستان د ملي امنیت پخوانی رییس احمدضیا سراج وایي، د طالبانو هوایي برخه د له منځه تلو په حال کې ده. سراج له افغانستان انټرنشنل سره په مرکه کې وویل چې د چورلکو د ساتنې لپاره عادي ترمیمات کافي نه دي او هره چورلکه باید د الوت د ټاکلو ساعتونو له پوره کېدو وروسته ترمیم شي.
د ملي امنیت پخواني مشاور حمدالله محب د ملي مقاومت جبهې د قوماندان حسیب پنجشري د وژل کېدو په غبرګون کې ویلي، چې افکار او تارضایتۍ په ګولۍ نه شي غلي کېدای. محب وايي، د جګړو مسوولیت د هغه چا پر غاړه دی چې په سیاسي تنوع او تفاهم باور نه لري او خلک بې قید و شرطه اطاعت ته بولي.
د یو افغان خبریال کورنۍ افغانستان انټرنشنل ته وویل، چې پاکستاني پولیسو په پېښور کې ددوی د کورنۍ غړی او خبریال نصیب الله یعقوبي نیولی دی. د یادې کورني په وینا، نوموړي د طالبانو له واکمنېدو وړاندې په ننګرهار کې له همیشه بهار ټلوېزیون سره کار کاوه.
د ایران د خراسان رضوي والي له طالب چارواکو وغوښتل چې دوه اړخیزو اړیکو او په ایران کې میشتو افغانانو ته په پام، په مشهد کې د مېشتو افغانانو د اړتیا وړ اوبو د برابرولو په برخه کې همکاري وکړي.
د ایران د خراسان رضوي والي ادعا کړې، چې طالبانو په وروستۍ جګړه کې له ایران سره سیاسي همکاري کړې او د امریکا پر اقتصادي وړاندیزونو سربېره یې امریکايي ځواکونو ته اجازه نه ده ورکړې چې د افغانستان خاوره د ایران پرضد وکاروي.
د خیبر پښتونخوا د اورکزۍ ولسوالۍ په مرکزي او پاس اورکزۍ سیمو کې د تحریک طالبان پاکستان او داعـ.ـش ډلې ترمنځ نښتو سلګونه کورنۍ د خپلو سیمو پرېښودو ته اړې کړې دي. ځایي خلک وایي چې په ځینو سیمو کې د حکومت واکمني کمزورې شوې او وسلهوال په ښکاره ګرځي.
په افغانستان کې د واک د ترلاسه کولو له پنځمې کلیزې سره هممهاله د طالبانو ادارې پرېکړه وکړه چې سږ کال په بګرام هوایي اډه کې امریکایي نظامي تجهیزات نندارې ته وړاندې نه کړي. د کارپوهانو په وینا، دا پرېکړه د امریکا د ولسمشر ډونالډ ټرمپ د غوسې د مخنیوي لپاره شوې ده.
د چین د سمارټفون شرکت «هونور»له خوا جوړ شوي انسانډوله روبوټ ۱۰۰متره واټن په ۹،۳۲ ثانیو کې وهلی او د جامیکا د نامتو منډهوهونکي یوسین بولټ نړیوال ریکارډ یې مات کړی دی. لایټنېنګ روبوټ د ازمویښتي منډې پر مهال په ثانیه کې ۱۴،۵متره چټک ځغاستی.
د طالبانو د سوداګرۍ وزارت وايي، د عطاءالله عمري په مشرۍ پلاوي په بېلاروس کې له یو شمېر تولیدي فابریکو لیدنه کړې ده. د وزارت په وینا، د دغو لیدنو موخه په افغانستان کې د ورته فابریکو د جوړولو، د نوې ټکنالوژۍ د انتقال او له بېلاروس سره د تخنیکي تجربو د شریکولو امکانات ارزول دي.
د طالبانو د اطلاعاتو او کلتور وزارت وايي، چې د لرغونپوهنې ریاست پلاوي په غزني، زابل، ارزګان، کندهار، هلمند، نیمروز، فراه او هرات ولایتونو کې ۴۴ لرغونې ساحې او تاریخي ابدات ارزولي. د یاد وزارت په وینا، له ارزونې وروسته ددې سیمو د حریم د تثبیت او ټاکلو پرېکړې شوې دي.
سرچینو افغانستان انټرنشنل ته تایید کړې چې غلو د هرات له حوزوي روغتون څخه ۲میلیونه او ۳۰۰ زره افغانۍ غلا کړې دي. د سرچینو په وینا، د شنبې په سهار د روغتون کارکوونکي خبر شول چې د اداري او محاسبې دفترونو د امنیتي کامرو هارډډیسکونه ایستل شوي دي.
د طالبانو مرستیال ویاند ملا حمدالله فطرت وايي، د روان کال له پیله ۸۱ سوداګرو او صنعتکارانو خپلې پانګې افغانستان ته انتقال کړې دي. د نوموړي په وینا، دغو پانګوالو ته لازمې اسانتیاوې برابرې شوې او تر اوسه یې په هېواد کې « ۶۸ میلیونه ډالره» پانګونه کړې ده.
د طالبانو مشر هبتالله اخوندزاده ددې ډلې د ټولګټو وزارت د اوسپنې پټلۍ معینیت د یوې خپلواکې ادارې په توګه اعلان کړی دی. د دغه حکم پر بنسټ، د ټولګټو وزارت پخوانی تخنیکي مرستیال مولوي عبدالکریم فاتح د اوسپنې پټلۍ ادارې د عمومي رییس په توګه ټاکل شوی.
د پاکستان فدرالي حکومت د پنجاب د کورنیو چارو وزارت په غوښتنه په راولپنډۍ کې د شپږو میاشتو لپاره د پوځ د ځای پر ځای کولو پرېکړه تایید کړې ده. د دې پرېکړې له مخې به پوځ د راولپنډۍ په مهمو او حساسو سیمو کې ځای پرځای شي.
د طالبانو عدلیې وزارت د هبت الله له توشیح وروسته د پولیسو یا شرطې نوی قانون خپور کړی، چې ۵۰مه ماده یې د افغانستان په قلمرو کې مظاهرې منع کوي. د قانون په ۳۳مه ماده کې پولیس مکلف ګڼل شوي چې د انځورونو اخېستلو په مخنیوي کې له امر بالمعروف سره همکاري وکړي.
په کونړ کې ځايي سرچینو افغانستان انټرنشنل ته وویل، چې طالبانو د احتمالي ګواښونو د مخنیوي لپاره د استخباراتو په ریاست کې له پخوانيو ولسوالانو، امنیه قوماندانانو، دیني عالمانو او قومي مشرانو سره ناستې کړې دي. په دې ناستو کې د طالبانو د استخبارانو عمومي ریاست چارواکو ګډون درلود.
په پاکستان کې د ۲۰۲۶ کال په لومړیو شپږو میاشتو کې د ماشومانو پر وړاندې د تاوتریخوالي او استحصال ۱۹۱۴ پېښې ثبت شوې دي چې جنسي استفاده او تښتونې پکې تر ټولو ډېرې دي.
د دین یا عقیدې پر بنسټ د تاوتریخوالي د قربانیانو نړیواله ورځ داسې مهال نمانځل کېږي چې په افغانستان کې د طالبانو د دیني تفسیر پر بنسټ وضع شوي محدودیتونو پر خلکو اغېز کړی. په ورته وخت کې، د دیني باورونو په اړه د نظر څرګندول هم د ډېرو خلکو لپاره په حساسه موضوع بدل شوي دي.
طالبانو د پولیسو چې دوی یې اوس شرطه بولي، نوی قانون خپور کړی چې د نیولو، تلاشي او د مظنونانو د څارنې واکونه پکې مشخص شوي؛ خو ملګري ملتونه د طالبانو د امنیتي ځواکونو د حساب ورکونې او خپلسرو نیونو په اړه لا هم اندېښنې لري.
په پاکستان کې د بلوچستان خراب امنیتي وضعیت د خبریالانو پر کار هم دروند اغېز کړی. د دغه ایالت د ژورنالیستانو اتحادیه وايي، تر اوسه ۴۰ خبریالان او د رسنیو کارکوونکي د خپلو دندو پر مهال یا د خپلو راپورونو له امله وژل شوي او یا هم د بریدونو او ګواښونو هدف ګرځېدلي دي.