د کندوز پوهنتون د سیاسي علومو او نړۍوالو اړیکو پوهنځي د پنځم سمسټر یو محصل افغانستان انټرنشنل ته ویلي، چې یوشمېر مضمونونه د درېیم او څلورم ټولګي محصلان ورته تدریس کوي. نوموړي زیاته کړې، ډېری استادان د طالبانو د فشارونو له امله له افغانستان نه وتلي او یا یې هم استعفا کړې ده.
د افغانستان له جګړې څخه د امریکا تر وتلو پنځه کاله وروسته تر ۱۰۰۰ ډېر هغه افغانان چې د ۲۰۲۱کال په اګست کې د امریکا له لوري قطر ته انتقال شوي وو، لاهم په دغه هېواد کې له ناروښانه برخلیک سره مخ دي.
د پاکستان بهرنیو چارو وزارت په اسلاماباد کې د امریکا سفارت شارژدافیره د چهار شنبې په ورځ (د زمري ۲۸مه) احضار کړه. دغه وزارت ویلي، دغې شارژدافیرې ته یې په هند کې د امریکا د سفیر د هغو څرګندونو په تړاو چې جمو کشمیر یې د هند یوه برخه بللې خپل احتجاج لیک سپارلی دی.
لندن کې د افغان سفارت د ودانۍ په زېرمتون کې، د افغانستان او نورو هېوادونو ترمنځ د لومړنیو ډيپلوماټيکو اړیکو له کلونو پاتې اسناد، لیکونه او یادګارونه خوندي دي. په دغو اسنادو کې د هغو کسانو نومونه هم لیدل کېږي چې افغانستان تازه غوښتل نړۍ ته ځان د یوه خپلواک هېواد په توګه ور وپېژني.
د طالبانو د امر بالمعروف او نهی عن المنکر وزارت ویاند سیفالاسلام خیبر د دغه وزارت د وزیر خالد حنفي د وروستیو څرګندونو په اړه د نیوکو په غبرګون کې ویلي، د انسان عقل د شریعت د قطعي حکم د رد یا منلو معیار نه شي کېدای.
د امریکا ولسمشر ډونالډ ټرمپ ویلي، وروسته له هغې چې ایران د توافق د ترلاسه کولو له فرصت څخه ګټه وانهخیسته، متحده ایالات د تهران پر وړاندې «تر ټولو درانه اقتصادي عملیات» پیلوي.
په داسې حال کې چې طالبان ادعا کوي، په افغانستان کې د نشهيي توکو کرکېله، کاروبار او قاچاق نږدې صفر ته رسېدلې، په افغانستان کې د بریتانیا یوه پخواني قومندان همېش دو برتون ګوردون په یوې مقاله کې ادعا کړې، چې د نشهيي توکو اقتصاد د طالبانو د «پېچلي اقتصاد» یو مهمه برخه ده.
د افغانستان د بهرنیو چارو پخواني وزیر محمد حنیف اتمر د هېواد د خپلواکۍ ۱۰۷مې کلیزې په مناسبت ویلي، رښتینې خپلواکي هغه مهال بشپړېدای شي چې د وګړو بنسټیز حقونه او فردي ازادۍ خوندي او تأمین شي.
په افغانستان کې د ملګرو ملتونو د ښځو څانګې ويلي، په دغه هېواد کې بشري مرستې باید د ښځو لهخوا او د ښځو لپاره وړاندې شي او افغان ښځینه بشري کارکوونکې باید د مرستو د بهیر په طرحه او پلي کولو کې مهم رول ولري.
د پاکستان د بهرنیو چارو وزارت وايي، د سوریې د بهرنیو چارو وزیر اسعد حسن الشېباني د خپل پاکستاني سیال په بلنه په یوه رسمي سفر نن شپه (چهارشنبه د زمري ۲۸مه) اسلاماباد ته ورسېد.
د طالبانو د پوځ لوی درستیز فصیحالدین فطرت وایي، د دې ډلې دفاع وزارت پرېکړه کړې چې د بدخشان له هغو ولسوالیو څخه، چې له پاکستان سره په ډیورند کرښه پرتې دي، ځوانان د طالبانو په پوځ کې جذب کړي. فطرت طالب پلوې رسنۍ «حریت راډیو» ته ویلي چې د نویو عسکرو د جذب بهیر پیل شوی دی.
افغان سندرغاړی جاوېد امیرخېل د افغانستان د خپلواکۍ د ورځې په مناسبت ویلي، خپلواکي د یوه ملت تر ټولو ستر ویاړ او ملي بیرغ د عزت، یووالي او هویت ژوندۍ نښه ده. هغه د خپلواکې د ورځې په ویاړ، درې رنګه ملي بیرغ ته خپله ثبت کړې ترانه هم نن په خواله رسنیو کې خپره کړې ده.
یوه نوې څېړنه ښيي چې پر افغانستان د طالبانو له بیا واکمنېدو سره هممهاله د دې ډلې بهرنی سیاست په څرګند ډول د سیمې د هېوادونو پر لور اوښتی، په داسې حال کې چې له لوېدیځو هېوادونو سره یې ډېپلوماتیک تعامل د واک ته رسېدو له مهاله تر ټولو ټیټې کچې ته راټیټ شوی دی.
د افغانستان د عامې روغتیا پخوانی وزیر او جراح ډاکتر فیروز فیروزالدین وايي، په برېټانیا کې له پناه اخیستو وروسته یې د دغه هېواد د ملي روغتیايي خدمتونو ادارې له دوو اداري دندو سره د کار لپاره غوښتنلیکونه ورکړي، خو «له اړتیا زیاتې وړتیا» لرلو له امله یې غوښتنلیکونه نه دي منل شوي.
ځايي سرچینې وايي، طالبانو د چهارشنبې په ورځ د بادغیس په مرکز قلعهنو ښار کې دوه کسان په ډزو وژلي دي. د سرچینو په وینا، دواړه کسان پر موټرسایکل سپاره وو او د قلعهنو ښار د بندر قادس اړوند د «خلیفه بهرام» په سیمه کې پرې ډزې شوې دي.
د افغانستان د زرګرانو ټولنه وايي، د لومړي ځل لپاره د افغانستان د سرو زرو او زرګرۍ صنعتي نندارتون جوړېږي. دغه ۳ ورځنی نندارتون د وږي له درېیمې تر پنځمې په کابل کې ترسره شي.
د افغانستان د عدلیې پخواني وزیر فضل احمد معنوي افغانستان انټرنشنل ته په یوې ځانګړې مقاله کې لیکلي، د طالب چارواکو وروستۍ څرګندونې، چې په شریعت کې عقل، لوست او څېړنې ته ځای نه ورکوي، د سیاسي واک لپاره د دین کارول دي.
په افغانستان کې د ملګرو ملتونو د بشري مرستو د همغږۍ دفتر (اوچا) وايي، د بشري مرستې د نړیوالې ورځې په مناسبت یې په افغانستان کې د ملګرو ملتونو بیرغ نیمه ځوړند کړی دی.
د افغانستان د سوداګرۍ او پانګونې خونې مشرتابه د ایران د کرنې جهاد له وزیر او مل پلاوي سره په کتنه کې له افغانستان او ایران څخه وغوښتل، چې د سوداګرو او پانګوالو لپاره د ویزو د اسانتیا په ګډون نورې سوداګریزې لازمې اسانتیاوې برابرې کړي.
کابل کې د شمع هدایت خصوصي ښوونځي مسوولان وایي، په دغه ښوونیز مرکز کې د شوې چاودنې د لامل او څرنګوالي په اړه د طالبانو اړوندو ادارو له لوري هر اړخیزې پلټنې روانې دي او تر هغو چې د پېښې څېړنې بشپړې شوې نه وي، باید د چاودنې د لامل په اړه له هر ډول اټکل او بې بنسټه څرګندونو ډډه وشي.
د افغانستان د یوه دولتي پوهنتون استاد په یوه پرانیستيلیک کې له پخواني افغان ولسمشر محمد اشرف غني څخه غوښتي چې هېواد ته بېرته ستون شي او د سولې، سیاسي تفاهم او ملي یووالي لپاره خپل رول ادا کړي.