په بلوچستان کې په بېلابېلو پېښو کې پنځه کسان وژل شوي او یو بل ټپي دی. د بلوچستان په ډېره بګټي ولسوالۍ کې د پولیسو په وینا؛ د یادې ولسوالۍ پیر کوه سیمه کې ناپېژاندو وسلهوالو د امن ځواک د یوه ځايي مشر په کور برید کړی، چې له امله یې یو قبايلي مشر وژل شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ ۸۶۸ کډوالې کورنۍ چې ټولټال ۳زره او ۹۶۵ کسان کېږي؛ له ایران او پاکستان نه افغانستان ته ستنې شوې دي.
د ملګرو ملتونو امنیت شورا د بندیزونو کمېټې اعلان کړی، چې د طالبانو د څلورو چارواکو په اړه یې د بندیزونو په نوملړ کې معلومات تازه کړي.
د طالبانو د صنعت او سوداګرۍ وزارت ویاند اخندزاده عبدالسلام جواد وایي، په ۲۰۲۵کال کې د سیمې او نړۍ هېوادونو ته تر ۱۰۴زره ټنه ډېره پنه صادره شوې ده. نوموړي زیاته کړې، یاد صادارت پاکستان، ایران، قزاقستان، ازبکستان، چین، هند، متحده عربي اماراتو، عراق، ترکیې او اسټرالیا ته شوي دي.
د پاکستان تحریک انصاف ګوند بنسټګر او د دغه هېواد د پخواني لومړي وزیر عمران خان په لارښوونه د خیبر پښتونخوا حکومت د راتلونکې یکشنبې په ورځ (د وري ۲۹مه) د مردان په ریلوې میدان کې یوه پراخه ولسي غونډه جوړوي.
د افغانستان د تکواندو فدراسیون اعلان کړی، چې د هېواد دوه ځوان ملي لوبغاړي به نن د ازبکستان په تاشکند ښار کې د ځوانانو د نړۍوالو تکواندو سیالیو ۱۵م پړاو کې خپلې سیالۍ پیل کړي. دغه سیالۍ (د وري له ۲۳مې تر ۲۸مې) نېټې پورې ترسره کېږي.
د شمالي زون د طالبانو تر واک لاندې د قره قل صادراتو د ودې انسټېټیوټ وايي، چې تېرکال یې د حیرتان بندر له لارې تر ۳۶زره ډېر د قره قل پوستکي بهر ته صادر کړي دي. یادې ادارې ویلي، چې دغه صادارت تر ډېره ازبکستان، ترکمنستان او روسیې ته شوي دي.
د افغانستان د مدني ټولنو او بشري حقونو بنسټونو (ICSHRA) د طالبانو په بند کې د درېیو افغان خبریالانو د وضعیت په اړه ژوره اندېښنه څرګنده کړې او ویلي یې دي، حمید فرهادي، احمد شکېب نظري او بشیر هاتف چې دا مهال د طالبانو په بند کې دي؛ له سختو روغتیايي، روحي او رواني ستونزو سره مخ دي.
هرات چې تر وروستیو دوو لسیزو مخکې د اسلامي مذهبونو ترمنځ د سولهییز ګډ ژوند یو څرګند سمبول ګڼل کېده، اوس د طالبانو له بیا واکمنېدو وروسته د یوه ځانګړي مذهب او قوم پر وړاندې د هدفي تاوتریخوالي په مهم مرکز بدل شوی دی.
د افغانستان د پخواني جمهوري دولت د کورنیو چارو وزارت سلاکار ادریس ستانکزي، د طالبانو پر تګلارو نیوکه کړې او ویلي یې دي چې د طالبانو له لوري د نجونو پر زده کړو بندیز د جاهلیت د زمانې له کړنو سره ورته والی لري.
د ملګرو ملتونو د ښځو څانګې په خپل تازه راپور کې ویلي، چې د طالبان او پاکستان ترمنځ د وروستیو نښتو له امله له ۹۰زره ډېر کسان اغېزمن شوي، چې له نیمایي څخه زیات یې ښځې او نجونې دي.
په کاپیسا کې د طالبانو امنیه قومانداني وايي، چې د دې ولایت د تګاب په ولسوالۍ کې د یوه پخواني ناچاوده ماین د چاودنې له امله یوې لس کلنې ماشومې خپل ژوند له لاسه ورکړی دی.
د رېفیوجیز انټرنشنل په نوم د کډوالو ملاتړي بنسټ د پاکستان له حکومت څخه غوښتي چې ژر تر ژره د افغان کډوالو د جبري ایستلو لړۍ ودروي. په اعلامیه کې راغلي چې پاکستان په وروستیو اونیو کې د افغان کډوالو ډلهییز ایستل په څرګند ډول ډېر کړي دي.
د تاجکستان حکومت اعلان کړی، چې د افغانستان د کډوالو کارګرو د جذب لپاره یې ځانګړې ونډه (کوټه) ټاکلې ده.
د افغانستان د مخېکني اسلامي جمهوريت د ډيپلوماتيکو او قونسلګريو د استازوليو د همغږۍ شورا په هرات ولايت کې پر شيعه وګړو وروستی بريد په کلکه غندلی دی. یادې شورا په یوې اعلامیه کې له ملګروملتونو او نړیوالو بنسټونو څخه غوښتنه کړې چې د دې پېښې په تړاو دې رڼې پلټنې وکړي.
د کونړ په مرکز اسعد اباد کې یو شمېر سرچینو افغانستان انټرنشنل – پښتو ته ویلي چې پاکستان یو ځل بیا په کڅۍ کلي باندې توغندیز بریدونه کړي دي. ځايي اوسېدونکي وایي، پاکستاني عسکرو نن شپه له ۸بجو څخه د شپې تر ۹نیمو بجو پورې د اسعداباد اړوند کڅۍ سیمه باندې بېشمېره توغندي وېشتي.
په کابل کې د تهران سفیر علي رضا بیکدلي ویلي، چې د روان ۱۴۰۵ کال له پېل راهیسې د افغانستان او ایران ترمنځ د رېل پټلۍ له لارې له ۱۰۰۰ ټنو د ډېرو توکو لېږد رالېږد ترسره شوی دی. هغه دا څرګندونې له روزنک بندر څخه د لیدنې پر مهال په یوه ویډیویي پیغام کې کړي دي.
د افغانستان د کرکټ نامتو ستوری راشد خان د کرکټ نړیوالې شورا د لوبغاړو مشورتي بورډ د نوی غړي په توګه ټاکل شوی دی.
د ملګرو ملتونو سرمنشي ویاند وایي، د منځني ختیځ روان کړکېچ پوځي حل نه لري او باید د خبرو اترو له لارې ورته حل وموندل شي. د سرمنشي ویاند سټیفان دوجاریک ویلي، له څو اوونیو ویجاړۍ او کړاو وروسته دا څرګنده شوې چې د دې شخړې لپاره نظامي حل نشته.
په غزني کې د طالبانو امنیه قومنداني وایي، چې په دې ولايت کې د دوو جلا ترافيکي پېښو له امله درې کسان مړه او درې نور ټپيان شوي دي.
په مسکو کې د طالبانو سفیر مولوي ګل حسن حسن په روسیه کې له مېشتو افغان سوداګرو سره په دغه هېواد کې د دوی پر ستونزو، ټرانزیټ او ټرانسپورټي اسانتیاوو باندې خبرې کړي. خبرپاڼه کې راغلي، چې دواړو لوریو د افغان سوداګرو پر وړاندې د شته ستونزو د حل په تړاو هم نظرونه تبادله کړي.