د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۳۲۲ افغان کډوال چې په پاکستان کې بندیان وو، ازاد او خپل هېواد ته ستانه شوي دي. یاد وزارت ویلي، چې دغه کسان د ننګرهار او کندهار له لارو ستانه شوي او خپلو مېنو ته لېږدول شوي دي.
د افغانستان او پاکستان ترمنځ د سوداګرۍ او تګراتګ لارې د تېر کال د اکتوبر له ۱۲مې نېټې راهیسې تړلې دي، چې له امله یې د دواړو خواوو سوداګر له جدي ستونزو سره مخ شوي او د وچې مېوې سوداګري هم زیانمنه شوې ده.
سياېناېن خبري شبکې د پنټاګون د وروستیو شمېرو په حواله راپور ورکړی، چې د ۱۴۰۴کال د کب ۹مه د ایران د جګړې له پیل راهیسې ۱۸ امریکایي سرتیري وژل شوي او ۷۵۷ نور ټپیان شوي دي.
د امرالله صالح په مشرۍ زرغون بهیر ویلي، چې د چهارشنبې په ورځ د زمري ۲۸مه یې د تخار ولایت په چال ولسوالۍ کې د طالبانو پر یوې پوستې برید کړی دی. زرغون بهیر د یوې ویډیو په خپرولو ادعا کړې، توانېدلي چې په دغه برید کې طالب ځواکونو ته درانه تلفات واړوي.
د خوړو نړۍوال پروګرام او اړوندو ادارو په تازه اقتصادي راپور کې ویلي، چې د افغانستان اقتصاد په ۲۰۲۶کال کې محدوده وده کړې؛ خو د نفوس د چټک زیاتوالي او د مېلیونونه افغان کډوالو د ستنېدو له امله د خلکو پر ژوند یې اغېز محدود پاتې شوی دی.
وای نېټ وېب پاڼې راپور ورکړی، چې د موساد د مشر او د سوریې د بهرنیو چارو وزیر تر ټېلیفوني خبرو څلور ورځې وروسته اسراییل د سوریې د ابوظهور هوايي اډه په هوايي بریدونو کې په نښه کړې.
د طالبانو د کرنې، اوبو لګولو او مالدارۍ وزارت ویلي، چې افغانستان او بلاروس د دواړو هېوادونو د ګډ اقتصادي او سوداګریز کمېسیون په دویمه غونډه کې د ګډو پانګونو، صنعتي پروژو او اقتصادي همکاریو پر پراختیا خبرې کړې دي.
د جرمني یو لیکوال، تاریخپوه او خبریال مارکوس شپیکر وایي، چې د «سخت دریځو اسلامپالو» تر واک لاندې افغانستان ته د ګوتو په شمېر کسان په خپله خوښه د سېل او رخصتیو لپاره ځي. نوموړی وایي، طالبان هڅه کوي په احتیاط دغه هېواد د سېلانیانو پر مخ پرانیزي.
د خیبرپښتونخوا ایالت په صوابۍ ولسوالۍ کې د سختو بارانونو له امله د یوه کور چت پرېوتو په پېښه کې یو سړی او د هغه لور مړه او دوه نور کسان ټپیان شوي دي. د ژغورنې ادارې چارواکو ویلي، چې پېښه د صوابۍ په ازادخېل سیمه کې شوې ده.
په افغانستان کې د خوړو نړۍوال پروګرام مشر جان ایلیف وایي، په دغه هېواد کې د مرستو د کمښت او سختو اقلیمي شرایطو له امله هغه کسانو ته د مرستې لپاره خواړه نهلري چې د دوی مرکزونو ته ورځي. نوموړی زیاتوي، چې افغانستان له لوږې سره مخ دی او نړۍ ترې سترګې اړوي.
د طالبانو له بیا واکمنېدو او پر ښځو د پراخو محدودیتونو له لګېدو وروسته، یوشمېر افغان ښځو د کار او عاید پیدا کولو لپاره نوې لارې موندلې دي. په کابل کې د «قاصد» په نوم د بس ټکټونو د انلاین پلور او لېږد خدمت د همدې نوښتونو له ډلې ګڼل کېږي.
د اېرلنډ کرېکټ بورډ د هغه نیوکو په ځواب کې چې د افغانستان د نارینهو ملي لوبډلې پر وړاندې د سیالیو ترسره کېدل یې غندلي وو ویلي، دا «په بشپړه توګه ناسمه ده» چې ګواکې دوی د افغان ښځو د وضعیت پروا نهلري.
برتانوۍ ورځپاڼې ټېلګراف په یوه راپور کې لیکلي، له افغانستان نه د لوېدیځو ځواکونو د وتلو او د طالبانو تر بیا واکمنېدو پنځه کاله وروسته، افغان ښځې او نجونې له پراخو محدودیتونو سره مخ دي؛ خو د نړۍوالې ټولنې غبرګون د پخوا پرتله کمزوری ښکاري.
یوه افغانه نجلۍ چې غوښتل یې خبریاله شي وایي، د زرګونه نجونو په څېر پنځه کاله کېږي چې هیلې یې د ښوونځي د تړلو دروازو ترشا پاتې دي. هغه وایي: «زما درد یوازې دا نهدی، چې ښوونځي ته نهشم تلای؛ لویه ستونزه دا ده چې د خپل راتلونکي د ټاکلو فرصت رانه واخیستل شو».
په نورستان کې د طالبانو امنیې قوماندانۍ خبر ورکړی، چې تېره ورځ د نورستان د منډول ولسوالۍ د جناخېلو په کلي کې د یوه کور چت پرېوتو له امله یوه مېرمنه مړه او یوه بله ټپي شوې ده. د یادې قوماندانۍ په وینا، ټپي شوې مېرمن روغتون ته لېږدول شوې ده.
سرچینو افغانستان انټرنشنل ته ویلي، چې د کونړ ولایت د مرکز اسعداباد ښار په (کرهالې زرمنډیي بېلې) سیمه کې د پنجشنبې په سهار (د زمري ۲۹مه) د سیند په اوبو کې د یوه ځوان جسد موندل شوی.
د ملګرو ملتونو د ماشومانو ملاتړ صندوق (یونېسف) د کابل د دشت برچي د مهدیه ښارګوتي په یوه ښوونځي کې د چاودنې او ۴۲ ماشومانو د ټپي کېدو په اړه د څېړنې غوښتنه کړې. یادې ادارې زیاته کړې، چې ښوونځي د نړۍوال قانون له مخې خوندي ځایونه دي او باید خوندي پاتې شي.
د اګست ۱۹مه د بشري خواخوږۍ له نړۍوالې ورځې سره هممهاله په پېښور کې مېشت یوشمېر افغان کډوال د قانوني اسنادو، د کورنیو د یوځای پاتې کېدو او خپلو بنسټیزو حقونو لپاره په محکمو کې قانوني مبارزه کوي.
د کرمانشاه له لارې ترکیې او افغانستان ته د عراق د تېلو محصولاتو د اورګاډي ټرانزیټ لړۍ پیل شوه. په پیل کې د عراق د تېلو ۵۰زره ټنه لومړۍ جوپه د ترکیې او افغانستان بازارونو ته ولېږدول شوه.
د بلوچستان د ګوادر ولسوالۍ د اورماړې ښار ته څېرمه د مکران ساحلي لویې لارې په یوه ترافیکي پېښه کې د دوو ماشومانو په ګډون شپږ کسان مړه شوي دي. د پولیسو په وینا، پېښه د مکران ساحلي لویې لارې د سرپټ په سیمه کې هغه مهال شوې چې د ګازو یو ټانکر له کرولا ډوله موټر سره ټکر وکړ.
د «الکترونیک امېګرېشن نېټورک» په یوه راپور کې راغلي، له جګړو او ناامنۍ څخه د تېښتې سربېره، په پاکستان کې مېشت ګڼ افغان کډوال لاهم د بېځایه کېدو له رواني او عاطفي اغېزو سره مخ دي.