په دوشنبه کې د امریکا سفارت له خپلو وګړو غوښتي، چې د افغانستان او تاجکستان ترمنځ پرتو سرحدي سیمو، په ځانګړې توګه د تاجکستان خودمختاره ولایت بدخشان ته لاړ نه شي. د امریکا د سفارت په وینا، د افغانستان په بدخشان کې وروستیو نښتو د تاجکستان پر امنیتي وضعیت هم اغېز کړی دی.
په ننګرهار کې د طالبانو د نشهيي توکو پر وړاندې د مبارزې مدیریت وایي، د مومندرې ولسوالۍ په مربوطاتو کې یې له یوه کس سره ۱۰ زره او ۲۰۰ «ټابلیټکا» ګولۍ نیولې دي. دغه مدیریت ویلي، چې یاد کس د کشفي عملیاتو په ترڅ کې نیول شوی دی.
د طالبانو اړوند رسنیو ویلي، چې ددې ډلې ځواکونو په یو لړ پېچلو عملیاتو کې د مقاومت جبهې غړی حسیب قوای مرکز وژلی دی.
د طالبانو له بیا واکمنېدو پنځه کاله وروسته، لا هم له زرو ډېر افغان کډوال چې امریکا ته د انتقال ژمنې ورسره شوې او قطر ته لېږدول شوي، د دغه هېواد په السیلیه کمپ کې بې برخلیکه پراته دي.
د پاکستان د جمعیت علمای اسلام ګوند مشر مولانا فضل الرحمان د یوه نوي «متحد اپوزیسیون» د جوړېدو اعلان وکړ. نوموړي په اسلاماباد کې د پاکستان ملي اسمبلۍ د اپوزیسیون له مشر محمود خان اڅکزي سره له کتنې وروسته وویل، چې د پارلمان دننه د ګډ رول پر سر هوکړې ته رسېدلي دي.
ځايي سرچینې وايي چې بلوڅ وسله والو د پنجشنبې په ورځ د سرانانو په بازار کې د پاکستاني پولیسو د حوزې ودانۍ په بمونو الوځولې ده. د سرچینو د معلوماتو لهمخې، وسله والو د حوزې د پولیسو وسلې او وسایط له ځان سره وړي دي.
د طالبانو د کورنیو چارو وزیر سراجالدین حقاني پنجشېر ته سفر کړی او د دغه ولایت د بېلابېلو ولسوالیو له قومي مشرانو او مخورو سره یې کتلي دي. د طالبانو د کورنیو چارو وزارت وايي، چې په دې کتنه کې قومي مشرانو او مخورو خپلې ستونزې، غوښتنې او مشورې له حقاني سره شریکې کړې.
په کندهار کې یو شمېر پخوانیو افغان سرتېرو افغانستان انټرنشنل ته په رالېږلي پیغام کې ادعا کړې چې طالبان په بېلابېلو پلمو پخواني نطامیان نیسي او له بایومټریک او امنیتي معلوماتو وروسته د کلي د ملا، ملک او نورو کسانو د شکایتونو پربنسټ ورته دوسیې جوړیږي.
د پخواني ولسمشر اشرف غني ویاند او فرهنګي سلاکار شاهحسین مرتضوي وایي چې د جمهوریت یو شمېر بانفوذه مشرانو په حساسو شېبو کې هېواد پرېښود. نوموړي له بيبيسي سره په تازه مرکه کې ویلي، چې د طالبانو په واکمنۍ کې یې بایسکل غلا شوی دی.
د طالبانو د مخابراتو او معلوماتي ټکنالوژۍ وزارت ویلي چې ډیورنډ کرښې ته څېرمه په ۱۳ سرحدي ولسوالیو کې یې د مخابراتي پوښښ پراختیا په موخه له یو خصوصي شرکت سره د څه باندې ۲۶۹ میلیونه افغانیو په ارزښت تړون لاسلیک کړی دی.
په خیبر پښتونخوا کې د پولیسو د اعتراضونو لړۍ په ځانګړې توګه په خیبر، لکي مروت او بنو ولسوالیو کې زیاته شوې ده. د سیمې پولیس چارواکي وایي چې له ایالت سره د قبایلي سیمو له یوځای کېدو اته کاله تېر شوي، خو لا هم د دوی کاري جوړښت او حقوق نه دي تایید شوي.
د افغانستان په ختیځ او سوېل، پېښور او سویلي وزیرستان کې شپږو سرچینو افغانستان انټرنشنل ته ویلي چې افغان طالبانو په تېرو دریو اونیو کې پر تحریک طالبان پاکستان خپل فشارونه زیات کړي. سرچینې وايي، د دې ډلې تر ۲۰ پورې ډلګیمشران، قوماندانان او دغه راز د هغوی افغان ملاتړي نیول شوي دي.
د هرات پوهنتون د طب پوهنځي ۱۱ استادانو د طالبانو د امر بالمعروف او نهی عن المنکر ادارې د چلند په غبرګون کې استعفا کړې ده. سرچینو افغانستان انټرنشنل ته ویلي، چې د طالبانو محتسبانو د دغه پوهنځي اته تنه استادان د لنډو ږیرو له امله شاوخوا یو ساعت په یوه کانټینر کې ساتلي وو.
د روسیې مرستیال لومړي وزیر مرات خوسنولین ویلي، چې مسکو د افغانستان او پاکستان له لارې د هند سمندر ته د رېل پټلۍ د غځولو لارې چارې څېړي. خوسنولین وايي، د ایران د اوسني وضعیت له امله د بدیلو ترانزیټي دهلېزونو اړتیا ډېره شوې ده.
د امریکا ولسمشر ډونالډ ټرمپ وايي، هغه هېوادونه به له اقتصادي پایلو سره مخ شي چې ایران ته « د ژغورنې لاره» برابروي. ټرمپ په ټولنیزو رسنیو کې ولیکل چې ایران به له خورا سختو اقتصادي بندیزونو او انزوا سره مخ کړي، خو د دې پلان جزئیات یې نه دي روښانه کړي.
د طالبانو د کورنیو چارو وزیر سراج الدین حقاني وايي، یاده ډله هڅه کوي په نړۍوال سیاست کې پر افغانستان د باور کچه زیاته شي. نوموړي ویلي، افغانان چاته ستونزې نه جوړوي او د جرګې او خبرو اترو خلک دي.
د هند د بهرنیو چارو وزارت خبر ورکړی چې په کابل کې یې یوه دولتي روغتون ته د درملو او طبي توکو جوپه لېږلې ده او ټینګار یې کړی چې له افغانانو سره به خپلې بشري مرستې جاري وساتي.
د ایران د بشري حقونو سازمان ههنګاو خبر ورکړی چې ایراني چارواکو د قایم حسیني په نوم یو شل کلن افغان د اصفهان په تېرو لاریونونو کې د «ملي امنیت ضد اقداماتو» او عامه شتمنیو ته د زیان اړولو په جرم اعدام کړی دی.
د اګست ۱۹مه د تصویر اخیستنې نړۍواله ورځ په نړۍ کې داسې مهال نمانځل کېږي، چې په کندهار کې نږدې دوه کاله کېږي د ساکښو موجوداتو د تصویر پر اخیستلو او خپرولو بندیز لګېدلی او لسګونه خبریالان، تصویر اخیستونکي او ویډیو جوړونکي یې له ګڼو ستونزو سره مخ کړي دي.
په کندهار ولایت کې د انګورو له موسم سره هممهاله بزګران وايي، د افغانستان او پاکستان ترمنځ د لارو تړل کېدو د دوی د محصولاتو صادرات سخت اغېزمن کړي او له همدې امله ګڼو بزګرانو خپل انګور په مميزو بدل کړي؛ خو د مميزو بیې هم د پخوا پرتله رالوېدلې دي.
د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۳۲۲ افغان کډوال چې په پاکستان کې بندیان وو، ازاد او خپل هېواد ته ستانه شوي دي. یاد وزارت ویلي، چې دغه کسان د ننګرهار او کندهار له لارو ستانه شوي او خپلو مېنو ته لېږدول شوي دي.