د افغانستان د مخکېني جمهوري نظام پر مهال لوړ پوړي پوځي جنرال سمېع سادات د نورستان قومي مخورو او پاکستاني پوځ ترمنځ تړون ته په اشارې ویلي، چې افغانان د طالبانو له نظام پرته په بل هېڅ پړاو کې دومره نه وو، بې عزته شوي.
پېښور کې د طالبانو د قونسل محبالله شاکر او د پاکستان د یو چارواکي ریاض محسود ترمنځ لیدنې په خواله رسنیو کې د افغان کاروونکو پراخ غبرګونونه راپارولي دي. انځورونه ښيي چې پاکستانی چارواکی د رسمي مېز تر شا ناست خو طالب استازی تر هغه ټیټ او په غیررسمي بڼه د هغه مخې ته ناست ښکاري.
په بدخشان او سمنګان ولایتونو کې د دوو جلا ترافیکي پېښو له امله لږ تر لږه اته تنه مړه شوي او ۱۹نور ټپیان شوي دي.
د افغانستان د فوټبال د غوره لوبغاړو د ټاکلو پنځم پړاو (د ۲۰۲۵ کال) د «فوټبال سي» رسنۍ لهخوا په هرات کې ترسره شو. د دې پروګرام په تر ټولو مهمه برخه کې، د افغانستان د فوټبال ملي لوبغاړي عليرضا پناهي وکولای شول چې د کال د غوره لوبغاړي په توګه د سرو زرو د توپ جایزه وګټي.
د امریکا د سټنفورډ پوهنتون د «مصنوعي ځيرکتيا شاخص ۲۰۲۶» کلنی راپور ښيي چې سعودي عربستان د مصنوعي ځيرکتيا په برخه کې د ښځو د ۳۲سلنې ونډې په لرلو سره د نړۍ په کچه لومړی مقام خپل کړی دی. تر دې وروسته اسټرالیا د ۳۰ سلنې او کاناډا د ۲۹ سلنې ونډې سره په دویم او درېیم ځای کې راغلي دي.
سره له دې چې طالبانو سخت مخالفت کړی و، سلګونو کسانو د سې شنبې په ورځ د هرات د شیعه وګړو پر وړاندې د وروستي خونړي برید د قربانیانو د جنازې او لاریون په مراسمو کې ګډون وکړ. په دغو مراسمو کې له شیعهوو سربېره سني وکړو هم ورسره د جنازې ګډ لمونځ ادا کړی.
کابل ښار د نفوس د زیاتوالي او وچکالۍ له امله د اوبو سخت بحران سره مخ شوی او تر ځمکې لاندې د اوبو سطحه په اندېښمنوونکې توګه کمه شوې ده. کارپوهان خبرداری ورکوي، که د اوبو د سرچینو مدیریت اساسي بدلون ونه مومي، کابل به په راتلونکې لسیزه کې له بېساري انساني ناورین سره مخ شي.
په دوحه کې د طالبانو سفیر محمد سهیل شاهین د افغانستان لپاره د فرانسې د شارژدافیر سره په ناسته کې پر سیاسي، اقتصادي او د قونسلي اړیکو په تړاو خبرې کړې دي. خبرپاڼه کې راغلي، دواړو لوریو همدا راز د ستنېدونکو افغان کډوالو او سوداګرۍ په تړاو هم بحث کړی دی.
د طالبانو سترې محکمې خبر ورکړی، چې د ننګرهار په دره نور ولسوالۍ کې د دوی لومړنۍ محکمې یو کس ته د تښتونې او زنا په تور یو نیم کال د بند سزا اورولې او په دُرو هم وهل شوی دی. همدا راز بادغیس ولایت کې هم د طالبانو یوې محکمې د اخلاقي فساد په تور یو کس ته ورته سزا ورکړې ده.
د ملګرو ملتونو د بشري چارو همغږۍ دفتر (اوچا) د سهشنبې په ورځ د وري ۲۵مه خبر ورکړی، چې په پکتیا ولایت کې له ۸۰سوو کورنیو سره بشري مرستې شوې دي. خبرپاڼه وایي، په دغو مرستو کې نغدې پیسې، د سرپناوو اړوند توکي او د روغتیا اړوند وسایل شامل دي.
د طالبانو تر واک لاندې د پېښو سره د مبارزې چمتوالي ادارې خبرداری ورکړی، چې د روانې وري میاشتې له ۲۵مې تر ۳۰مې نېټې پورې د افغانستان په ځینو سیمو کې د خاورو او دوړو د توپان د رامنځته کېدو وړاندوینه شوې ده.
په پنجشیر کې د طالبانو والي محمد اغا حکیم د یوناما د مرکزي زون د دفتر له رییس تابیتا بوګوا سره په ناسته کې غوښتنه کړې چې نړیوال مرستندویه بنسټونه او موسسات دې په پنجشیر کې پراختیایي پروژې پلې کړي. هغه ویلي، پنجشیر اوس امن دی او پروژې پهکې باید عملي شي.
پاکستاني رسنۍ «اکسپرس ټریبیون» راپور ورکړی، چې په پاکستان کې امنیتي چارواکو ویلي، د دغه هېواد په پنجاب ایالت کې د یو لړ عملیاتو په ترڅ کې یې د ترهګریزو فعالیتونو په تور۱۶کسان نیولي دي.
د طالبانو د کورنیو چارو وزارت سهشنبه د (وري ۲۵مه) خبر ورکړی، چې د دوی ځواکونو په ۱۵ولایتونو کې د نشهيي توکو د کاروبار په تور ۵۸کسان نیولي دي. خبرپاڼه زیاتوي، چې دغو کسانو څخه پنځه کیلو چرس، ۲زره دانۍ د نشې ګولۍ او یوه اندازه شیشه هم ترلاسه شوې ده.
په پېښور کې د طالبانو جنرال قونسلګرۍ خبر ورکړی، چې په یوې ځانګړې غونډه کې یې د شینوارو او اپریدو قبیلو مشران او ځوانان ستایلي دي. خبرپاڼه کې راغلي، چې دغو دواړو قبیلو له پاکستان څخه د افغان کډوالو د ستنېدو بهیر کې لازمې اسانتیاوې برابرې کړي او ښه مېلمانه پالنه یې کړې ده.
د پخواني افغان خبریال عزیز وطنوال خپلوان وايي، چې شاوخوا یو کال کېږي نوموړی طالبانو نیولی او دا مهال د بګرام په زندان کې ساتل کېږي.
د چین سره صلیب د افغانستان د وروستیو سیلابونو او زلزلو له امله د زیانمنو شویو کسانو د لاسنیوي په موخه د طالبانو تر واک لاندې سرې میاشتې ټولنې سره ۱۰۰ زره امریکایي ډالره مرسته کړې ده.
په غربي اسیا کې روانه جګړه د نړۍ د امنیت او اقتصادي ثبات لپاره خورا ستر اهمیت لري، ځکه د خواوشا یوې نیمې میاشتې راهیسې د نړۍ او د سیمې د میډیا ټول پام د دغې جګړې پر څرنګوالي او د هغې د مخنیوي په موخه پر روانو دیپلوماتیکو فعالیتونو متمرکز دی.
یو شمېر افغان ښوونکو افغانستان انټرنشنل-پښتو ته ویلي چې درې میاشتې کیږي طالبانو معاشونه نه دي ورکړي. دوی وایي، د معاشونو ځنډېدو یې ژوند له سختو اقتصادي ستونزو سره مخ کړی او د خپلو کورنیو د لومړنیو اړتیاوو د برابرولو توان یې له لاسه ورکړی.
د طالبانو د پکتیا رسنیز دفتر وايي، چې د پکتیا، خوست ، پکتيکا، لوګر او غزني ولايتونو واليانو او د امنيې قوماندانانو، د ۲۰۳ منصوري قول اردو ریيس ارکان، نظامي محکمې او د استخباراتو رییسانو د سوېل ختیزو ولایتونو د امنیتي وضعیت د خوندیتوب په موخه ناسته کړې ده.
د بيبيسي د یوه څېړنیز راپور له مخې، په یونان کې د ترکیې له پولې سره نږدې سیمو کې یو شمېر افغان کډوال له تاوتریخوالي سره مخ شوي. په راپور کې راغلي چې یوناني امنیتي ځواکونه له ځینو ناقانونه ډلو سره، چې پخپله کډوال دي، همکاري کوي څو نور کډوال په زور بېرته ترکیې ته واړوي.