د ملګرو ملتونو د خوړو او کرنې سازمان خبرداری ورکړی، چې د ایران او اوکراین جګړې او د اقلیم بدلون به د لګښتونو د زیاتوالي او د غلو دانو د حاصلاتو د کمېدو لامل شي. یاد سازمان ویلي چې نړۍ د خوړو د نوي انفلسیون له څپې سره مخ ده.
په هلمند کې د طالبانو د فرعي ګمرکاتو ریاست وایي، د تېرو دوو اونیو په لړ ګې یې له پاکستان څخه قاچاق کېدونکو ۱۵ زره او ۹۴۱ کیلوګرامه انساني، حیواني او کرنیز درمل نیولی دي. طالبانو ویلي، دغه قاچاقي درمل یې د لښکرګاه د ریګستان په سیمه کې سوځولي دي.
افغان کرېکټ بورډ ویلي چې له ایرلنډ سره د پنځو یو ورځینو لوبو د لړۍ لومړۍ لوبه د باران له امله لغوه شوه. د دوامداره اورښت له امله د لوبې پچه اچونه هم نه ده ترسره شوې.
د کندهار یو اوسېدونکي وایي، د خوراکي توکو هټۍ یې د عایدو د کموالي له امله وتاړه، وروسته یې د هندواڼو او خټکیو کارو بار پیل کړ، خو هغه کې یې هم زیان وکړ. نوموړی وایي، اوس د ایران پر لور د تګ فکر کوي، ځکه د خپلو اولادونو لوږه نور نه شي زغملای.
یو انجنیر او ټولنیز فعال د طالبانو له مشر مولوي هبت الله څخه په پرانیستي لیک کې پوښتلې چې طالبان شل کاله د اسلام په نوم وجنګېدل کوم داسې اسلامي بدلون یې راوست چې د دغو قربانیو توجیه وکړي؟ نوموړي له هبت الله نه د عدالت او د خلکو د اساسي حقونو په اړه هم د وضاحت غوښتنه کړې ده.
د ننګرهار د تورخم بازار چې څه باندې پنځه میاشتې وړاندې د طالبانو او پاکستاني ځواکونو ترمنځ د جګړې پرمهال سوځول شوی و، له بیارغونې وروسته بېرته پرانېستل شو. هټيوال وایي، ډېری دوکانونه رغول شوي او له هېوادوالو یې غوښتي چې د پېر او پلور له لارې د زیانمنو سوداګرو ملاتړ وکړي.
د ایران ولسمشر مسعود پزشکیان د حماس د سیاسي دفتر له مشر خلیل الحیه سره په ټلیفوني خبرو کې ویلي، چې د وروستیو تحولاتو او د امریکا او اسراییل له بریدونو سره سره، د فلسطین مسله لا هم د ایران د بهرني سیاست اصلي محور او د اسلامي نړۍ لومړنۍ موضوع ده.
د ترکیې د کډوالۍ ادارې د تازه شمېرو له مخې، د روان میلادي کال په لومړیو اوو میاشتو کې ۲۲ زره او ۴۸۳ افغان کډوال په دغه هیواد کې نیول شوي دي. د دغو شمېرو له مخې، افغانان د نیول شویو کډوالو د نوملړ په سر کې دي او ډېری یې د قانوني استوګنې د کارت د نه لرلو له امله نیول شوي دي.
امریکا او پاکستان په واشنګټن کې د ترهګرۍ ضد مبارزې څلورم پړاو خبرو اترو کې د ترهګرۍ پر ضد مبارزې، د سرحدي امنیت پر پیاوړتیا او د سختدریځو ډلو د ملاتړو شبکو پر له منځه وړلو کې د ګډو همکاریو پر دوام ټینګار وکړ.
د طالبانو د صنعت او سوداګرۍ وزارت وایي، د افغانستان او ایران ترمنځ د سوداګرۍ کلنی حجم ۳،۶ میلیارده ډالرو ته رسېدلی دی. طالبانو ویلي چې له پاکستان سره د لارو له تړل کېدو وروسته یې ایران لوی سوداګریز شریک دی او له دغه هېواد سره د پخوا په پرتله سوداګریزه راکړه ورکړه پراخه شوې ده.
د ګواتیمالا چارواکو د دوشنبې په ناوخته شپه د فوېګو اورغورځوونکي غره ته څېرمه د دوو سیمو د اوسېدونکو د احتیاطي ایستلو امر وکړ. د دغه اورغورځوونکي غره د اورغورځونې فعالیت لا پسې شدید شوی، ایرې یې خپرې کړي او د غره له لمنو یې اورغورځوونکي بهیرونه راکوز شوي دي.
د طالبانو د اطلاعاتو او کلتور وزارت نشراتي معین حیات الله مهاجر په پکتیا کې له رسنیو غوښتنه کړې، چې د تېرو شلو کلنو «جنایتونو» افشا او خپاره کړې. بل خوا دغه ډله بیا رسنیو ته اجازه نه ورکوي، چې پر دوی انتقادي خپرونې او راپورونه خپاره شي.
د برېتانیا ګارډین ورځپاڼې په یوه ځانګړي راپور کې د «شبنم» په مستعار نوم د یوې افغانې نجلۍ کیسه خپره کړې، چې پکې یې د طالبانو له بیا واکمنېدو وروسته د افغان ښځو او نجونو پر ژوند د لګېدلو محدودیتونو او رواني فشارونو انځور وړاندې کړی دی.
د طالبانو د چتر لاندې د کور او ښار جوړولو وزارت وايي، د راستنو شویو کډوالو د دایمي مېشتېدو او د ځمکو د وېش کمېټې له لارې په پنځو ولایتونو کې ۱۱۶۳ راستنو شویو کورنیو ته د استوګنې ځمکې وېشل شوې دي.
د ملګرو ملتونو د ماشومانو صندوق (یونیسف) وايي، په افغانستان کې له میندو سره د مور شیدو ورکولو په اړه د پوهاوي او تغذیې مشورې کوي، څو ماشومان د ژوند له لومړیو ورځو څخه له مناسبې تغذیې برخمن شي.
د پېښور عالي محکمې د یوه افغان پخواني جنرال او دوو افغان خبریالانو د ایستلو بهیر په موقتي ډول درولی او د پاکستان د کورنیو چارو وزارت ته یې لارښوونه کړې چې د دوی د استوګنې د غوښتنو په اړه په دوو میاشتو کې پرېکړه وکړي.
د پاکستان تحریک انصاف ګوند وايي، د خپل بنسټګر عمران خان د بند د درېیم کال د پوره کېدو په مناسبت به نن، چهارشنبه، په ټول هېواد کې احتجاجونه وکړي او د هغه د سمدستي خوشې کېدو غوښتنه به مطرح کړي.
د طالبانو د کورنیو چارو وزارت خبر ورکړی، چې د کابل او هرات په ګډون په یو شمېر ولایتونو کې یې د یو لړ عملیاتو پرمهال د نشهيي توکو د قاچاق او پلور په تړاو ۳۱ کسان نیولي دي. د یاد وزارت په وینا، دغه کسان به تر لومړنیو څېړنو وروسته عدلي او قضايي ارګانونو ته وسپارل شي.
د بلوچستان د چمن ولسوالۍ په زاړه چمن سیمه کې د لاسي بم په برید کې یو مزدور وژل شوی او دوه نور ټپیان شوي دي.
د اوکراین ولسمشر ولادیمیر زیلینسکي وايي، په پلازمېنې کییف او شاوخوا سیمو باندې د روسیې په پراخ توغندیز او بېپیلوټه الوتکو برید کې لږ تر لږه ۱۷ کسان وژل شوي او ۴۴ نور ټپیان دي.
د کډوالۍ نړیوال سازمان په مالي مرسته د لغمان په علینګار او دولت شاه ولسوالیو کې د طبیعي پېښو د خطرونو کمولو، د عامه پوهاوي پروګرامونه او د بېړنۍ حالت د تجهیزاتو د وېش لس ورځنی پروګرام تر سره کړ.