د جرمني د کورنیو چارو وزارت د پنجشنبې په ورځ وویل، چې ۲۰ تنه محکوم شوي افغان مجرمان یې له لایپزیګ ښار څخه د یوې چارټر الوتکې له لارې کابل ته ولېږدول . یاد وزارت زیاته کړې، چې دا اقدام له طالبانو سره تر هوکړې وروسته شوی دی.
د ملګرو ملتونو یوې ادارې ویلي چې تېر کال شاوخوا اته زره کسان پر خطرناکو مهاجرتي لارو د تګ پرمهال مړه شوي یا ورک شوي دي، خو اصلي شمېر ښايي ډېر لوړ وي. له اسیا نه په ۳۰۰۰ مړو شویو کډوالو کې تر ۱۵۰۰ ډېر افغانان ګڼل شوي دي.
د افغانستان د بهرنۍ سوداګرۍ وروستي ارقام ښيي چې په شپږو میاشتو کې د ۱۱۰میلیونه ډالرو په ارزښت سګرټ، پان او تنباکو، د ۱۳،۸ میلیونه ډالرو انرژۍ او څښاک توکي، د اووه میلیونه ډالروپه ارزښت ژاولې وارد شوي، خو یوازې د څلور میلیونو ډالرو په ارزښت کتابونه وارد شوي.
د طالبانو د امر بالمعروف او نهی عن المنکر وزارت ویاند سیف الاسلام خیبر وايي، چې په راتلونکي کې به نکاح له اوسنۍ دودیزې او کلیوالي بڼې څخه رسمي بڼې ته واوړي او په محکمو کې به ثبت او تړل کېږي.
د پاکستان د بهرنیو چارو وزارت وايي، په افغانستان کې وروستي بریدونه د ملګرو ملتونو د امنیت شورا د هغو پرلهپسې ټینګارونو پر بنسټ شوي، چې وايي، «د ترهګرۍ د پېښو عاملان، مرسته کوونکي او ملاتړي باید حساب ورکوونکي وګرځول شي».
افغانستان انټرنشنل ته د رسېدلو رسمي سندونو بر بنسټ، طالبانو د جرمني په بن ښار کې د افغانستان په کونسلګرۍ کې یو پاکستانی وګړی د ای ټي مسوول ګومارلی دی. دغه کس صفي الله نومیږي او کونسلګرۍ د ۲۵۰۰ یورو تنخوا په وړاندیز د یوه مکتوب له لارې د طالبانو د بهرنیو چارو وزارت ته معرفي کړی.
د طالبانو د صنعت او سوداګرۍ وزیر نورالدین عزیزی په مشرۍ یوه پلاوي ازبکستان ته سفر کړی. ټاکل شوې دغه پلاوی د ازبکستان د لومړي وزیر له مرستیال جمشید خواجهیف او د یاد هېواد د څو ولایتونو له چارواکو سره د پانګونې، سوداګرۍ، ټرانزیټ، انرژۍ او ګډو اقتصادي پروژو په اړه خبرې وکړي.
د طالبانو سترې محکمې د پنجشنبې په ورځ د یوې خبرپاڼې په خپرولو سره ویلي، چې د پکتیا په زرمت ولسوالۍ کې یې یو کس د «غلا» په تور په ۲۵ دُرو وهلی. د یادې محکمې په وینا؛ دغه کس ته یې د ۶ میاشتني تنفیذي بند سزا هم ورکړې ده.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارد بېنېټ په جنیوا کې د ملګرو ملتونو د بشري حقونو ۶۱مې غونډې ته د وینا پرمهال ویلي، چې د طالبانو تر کنټرول لاندې افغانستان له ژور بشري او انساني ناورین سره مخ دی او دغه وضعیت خورا کړکېچن شوی.
د ملګرو ملتونو د ماشومانو ملاتړ صندوق (یونېسف) ویلي، چې د جاپان حکومت په افغانستان کې د ژوند ژغورونکو خدمتونو وړاندې کولو لپاره ۴.۴ مېلیون ډالره نوې مرسته ځانګړې کړې. دغه مرسته به د ماشومانو د ملاتړ صندوق له لارې ولګول شي.
د خیبر پښتونخوا په شمالي وزیرستان کې د چهارشنبې په ماښام د یوې دولتي لېسې ودانۍ د ډورن برید له امله ویجاړه شوې ده. ځايي پولیسو ویلي، دغه پېښه د شېوه کلي اړوند د میامي کابلخېل په سیمه کې شوې ده.
د ایران ولسمشر مسعود پزشکیان د امریکا د ولسمشر ډونالډ ټرمپ څرګندونو په غبرګون کې حکومتيشمېرو ته په اشارې ویلي: «د امریکا ولسمشر وایي چې ۳۲زره کسان مو وژلي دي. خو موږ د هغه خلکو نومونه او د وژل شویو شمېرې خپرې کړې دي. که څوک وايي له دې زیات دي؛ نو اعلان دې کړي».
د طالبانو د معیار او کیفیت ادارې مشر فیض الله تمیم د ترکمنستان د اوسپنې پټلۍ او ګمرکونو له مرستیالانو سره په جلا، جلا ناستو کې غوښتنه کړې، چې د نفتي او نورو سوداګریزو توکو د چټک لېږد لپاره دې د اورګاډي واګونونو شمېر زیات کړي.
د ناروې د کډوالو شورا خبرداری ورکړی، چې د بشري مرستو کمښت د کونړ زلزله ځپلې زرګونه کورنۍ د بېځایه کېدو له ګواښ سره مخ کړې دي. د یاد بنسټ په وینا؛ ډېری هغه کورنۍ چې د زلزلې له امله یې خپل کورونه له لاسه ورکړي، د ژمي په سړې هوا کې تر خېمو لاندې شپې سبا کوي.
په کابل کې د طالبانو امنیه قوماندانۍ وايي، په ۱۰مه حوزه کې یې ۴ وسلهوال غله نیولي چې د وسلې په ګواښ به یې له خلکو موبایلونه او پیسې غلا کولې. طالبانو ویلي، چې نیول شوي کسان به عدلي او قضايي ادارو ته ور پېژني.
د افغانستان لپاره د پاکستان ځانګړی استازی محمدصادق وايي، چې د اروپايي ټولنې له استازي ګېلس برټرینډ سره یې په یوې انلاین غونډه کې د سیمې پر سیاسي او امنیتي وضعیت خبرې کړې دي. نوموړي ویلي، چې په دغه غونډه کې یې د بشري حقونو، ترهګرۍ او نورو ګواښونو په اړه بحث او خبرې کړې دي.
د افغانستان د بشري حقونو یوشمېر بنسټونو او د ښځو اعتراضي خوځښتونو په یوه پرانیستي لیک کې د ملګرو ملتونو د عمومي اسمبلۍ له مشرې انالینا بېربوک غوښتي، چې د طالبانو لهخوا دې «د روان جنسیتي اپارتاید» پر وړاندې اقدام وکړي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۱۶ کوډګر نیولي دي. د خبرپاڼې له مخې؛ دغه کوډګر په پروان، بامیان، کندهار، بدخشان، جوزجان غور او سرپل ولایتونو کې نیول شوي دي.
د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۷۵ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د خیبر پښتونخوا په بېلابېلو سیمو کې د روژې میاشتې له پیل راهیسې د ناامنۍ پېښې زیاتې شوې دي. یوازې د روژې په لومړۍ اوونۍ د پولیسو، اېفسي او نورو امنیتي ځواکونو له ۲۰ ډېر سرتېري وژل شوي او ګڼ نور ټپیان دي.
د طالبانو د کډوالو او بېرته راستنېدونکو چارو وزارت خبر ورکړی، چې په ننګرهار کې ۳زره او ۴۲۰ تازه ستانه شوي زدهکوونکي به په وړیا توګه په ۳۸۴ خصوصي ښوونځیو کې شامل کړي. طالبانو ویلي، د یوه ښوونیز کال لپاره د دغه تړون لګښت شاوخوا یونیم مېلیون افغانۍ کېږي.