د اروپايي ټولنې د بهرنیو چارو او امنیتي پالیسۍ عالي استازې کاجا کالاس، اعلان کړی چې بیلومو د افغانستان لپاره نوی شارژدافیر او د پخوانۍ استازې ورونیکا بوسکوویچ پوهار نوی ځای ناستی دی.
د ملګرو ملتونو د بشري چارو د همغږۍ دفتر (اوچا) ویلي، لوګزامبورګ د افغانستان د بشري مرستو صندوق سره ۳۰۰ زره یورومرسته کړې ده.
د طالبانو امر بالمعروف وزارت وایي چې د غزني ولایت محتسبینو څلور ښځې له کورني تاوتریخوالي او ظلم څخه ژغورلي او د دوی په وینا د خپلو «شرعي حقونو» ترلاسه کولو زمینه یې ورته برابره کړې ده.
د خیبر پښتونخوا د سویلي وزیرستان ولسوالۍ په ګل کڅ سیمه کې د جمعې په ورځ د ځمکې پر سر د شخړې له امله څلور کسان وژل شوي او دوه نور ټپیان دي.
د بلوچستان په بېلابېلو سیمو کې د شنبې په ورځ په جلا جلا خونړیو پېښو کې لږ تر لږه ۹ کسان وژل شوي او ۱۰ نور ټپیان شوي دي. په دغو پېښو کې د ډزو، وسلهوالو نښتو، د تېزابو برید او هدفي وژنو په ګډون بېلابېلې پېښې شاملې دي، چې د ایالت په بېلابېلو ولسوالیو کې رامنځته شوې دي.
د طالبانو د اوبو او انرژۍ وزارت وایي، د غزني ولایت د سردې بند اوبه د پنځو ورځو لپاره د کرنیزو ځمکو د خړوبولو په موخه خوشې شوې دي.
د پنجشېر ولایت طالب چارواکي وايي، له دې ولایت څخه د ګیلاسو د صادراتو لړۍ پیل شوې او ټاکل شوې ده چې شاوخوا ۲۰ټنه تازه ګیلاس د قرغیزستان، ازبکستان او روسیې بازارونو ته صادر شي.
د پاکستان د پلازمېنې اسلاماباد پولیسو د روان کال په لومړیو پنځو میاشتو کې د جنسي تېري او تښتونې ټول ۴۳۲ قضیې ثبت کړې دي. د پولیسو په وینا په ددغه پېښو زیات شمېر یې به ښاري سیمو کې رامنځته شوي.
د هلمند ولایت په سنگین ولسوالۍ کې د ساروان قلعه په سیمه کې د ۱۲۱.۶ میلیونه افغانیو په ارزښت د برېښنا د یوې انکشافي پروژې کار پیل شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ ۴۸۸ کډوالې کورنۍ چې ټول ۲۶۲۲ کسان کېږي، له ایران او پاکستان نه افغانستان ته جبري ستنې شوې دي.
د روسیې په سنپټرزبورګ ښار کې د نړیوالې اقتصادي غونډې په ترڅ کې د ورزش او المپیکي همکاریو په اړه جوړه شوې ناسته کې د ورزش پر نه سیاسي کېدو او د ټولو لوبغاړو لپاره د برابر ګډون پر حق ټینګار شوی.
د بلوچستان د کوټې ښار په یوه دولتي روغتون کې پر یوې ښځینه ډاکټرې د تېزابو برید شوی، چې له امله یې د هغې د بدن او مخ شاوخوا ۳۵ سلنه برخه سوځېدلې ده.
د کډوالو د ملاتړ نړیوال بنسټ Displaced International ویلي، په نړۍ کې له ۱۲۰ میلیونو څخه ډېر خلک په جبري ډول بېځایه شوي او باید له دوی سره د «ګواښ» پر ځای د انساني کرامت، شمولیت او فرصتونو په رڼا کې چلند وشي.
د الجزیرې په یوه راپور کې ویل شوي چې په افغانستان کې د نادولتي موسسو له لوري د لوړو لګښتونو سره سره ګڼو پراختیایي پروژو د خلکو اساسي اړتیاوې نه دي پوره کړې. راپور زیاتوي چې د بودیجې د کمېدو ترڅنګ، لا هم د دغو پروژو په اړه د بېکفایتۍ او د حساب ورکونې د کمزورۍ ستونزې شته.
د خیبر پښتونخوا د لوړو زدهکړو وزیر مینا خان افريدي ادعا کړې چې د پېښور عالي محکمې د حکم باوجود ورته د هوايي ډګر له لارې د بهر سفر اجازه نه ده ورکړل شوې او هغه د جرمني له تګ څخه راګرځول شوی.
د افغانستان د پخواني جمهوري نظام د ولسي جرګې غړې فوزیه کوفي ادعا کړې، چې طالبانو په تېرو دوو ورځو کې د هرات ولایت ۶۰ښځې د هغه څه له امله نیولي چې دغه ډله یې «نامناسب حجاب» بولي.
د زدهکړو افغان فعال او د قلم لار ټولنې بنسټګر مطیعالله ویسا وايي، په فرانسه کې د ازادۍ جایزې ترلاسه کول به هغه او د هغه ټیم نور هم وهڅوي چې د هغو ماشومانو لپاره خپلې هلې ځلې پراخې کړي چې لا هم له زدهکړو بېبرخې دي.
د افغانستان د پخواني جمهوري نظام د کانونو او پټرولیم وزیرې نرګس نهان ویلي، هغه افغانې ښځې او نجونې چې د طالبانو پر ضد د خپلو اساسي بشري حقونو لپاره راپاڅېدلې دي، له نیونو او سختو تاوتریخوالو سره مخ شوې دي او د دوی مبارزه باید د قضاوت پر ځای د درناوي او ملاتړ وړ وبلل شي.
د اسراییل د استخباراتي ادارې یا موساد یوه پخواني لوړپوړي چارواکي ویلي: «هغه نقشه چې د اسراییل او موساد له لوري چمتو شوې، لا هم کولای شي د اسلامي جمهوریت د رانسکورېدو لامل شي، خو د جګړې د درولو په اړه د امریکا له پرېکړې وروسته، دا نقشه په خپلو ټولو پړاوونو کې تعقیب نشوه».
په بدخشان کې د اتو لوبډلو په ګډون د وزلوبې د دښت شیوه د څلورم پړاو سیالۍ پیل شوې. د طالبانو تر کنټرول لاندې د المپیک، بدني روزنې او سپورټ ریاست په یوې خبرپاڼه کې ویلي، چې دغه سیالۍ د وزلوبې، نیزې وهلو او دودیزو لوبو د ملي فدراسیون په کوربتوب پیل شوې دي.
د بلوچستان په موسی خېل ولسوالۍ کې ناپېژندو وسلهوالو يو ځايي خبريال اسرافيل په ډزو سره وژلی دی. ځايي خبریالانو د دغې پېښې له غندلو سربیره عاملینو ته تر نیول کېدو وروسته د سزا ورکړې غوښتنه هم کړې ده.