د طالبانو د معیار او کیفیت ادارې ویاند محمد یوسف غاویر خبر ورکړی، چې په تېرې سلواغې میاشت کې یې د بېلابېلو بندرونو له لارې ۲۰۵ ټُنه بېکيفيته ودانیز توکي بېرته صادرونکو هېوادونو ته ستانه کړي دي.
د خیبر پښتونخوا هریپور ولسوالۍ چارواکو رسنیو ته ویلي، چې په تېرو شپږو میاشتو کې له دغه ولسوالۍ په خپله خوښه د ستنېدونکو افغان کډوالو شمېر کې زیاتوالی راغلی او دغه شمېر تر ۹۰ سلنې لوړ شوی.
د بلوچستان په پنجګور ولسوالۍ کې د ډزو دوو بېلابېلو پېښو پرمهال د دوو افغان ښځو په ګډون اته کسان وژل شوي او درې نور ټپیان دي. ځایي چارواکو ویلي، دغه وژل شویو افغان مېرمنو په قاچاقي لاره پاکستان ته د ننوتو هڅه کوله.
د امریکا ولسمشر ډونالډ ټرمپ هغه راپورونه چې وايي، د امریکا د ګډو ځواکونو لوی درستیز جنرال ډینیل کېن د ایران پر وړاندې د پوځي اقدام مخالف دی «سل په سلو کې ناسم» وبلل او ټینګار یې کړی چې د تهران سره د جګړې یا هوکړې وروستۍ پرېکړه به د هغه وي.
د فلسطین روغتیا وزارت خبر ورکړی، چې د اکټوبر له لسمې نېټې د اوربند له پیل راهیسې تر اوسه پر غزې د اسراییل په بریدونو کې لږترلږه ۶۱۵ فلسطینیان وژل شوي او ۱۶۵۱ نور بیا ټپیان شوي دي. د راپور له مخې؛ یوازې د اکټوبر په ۱۹مې او ۲۹مې نېټې بریدونو کې ټولټال ۱۵۴ کسان وژل شوي دي.
د طالبانو د کانونو او پټرولیم وزارت ویاند همایون افغان وايي، د ټاپي پروژې کارونه منظم روان دي او تر دې مهاله یې ۹۷ کیلومتره ساحه اواره کړې ده. هغه زیاته کړې، نوې نل لیکه هم سیمې ته رسېدلې چې له دې وروسته به یې د غځولو چارې پيل شي.
په پاکستان کې د ملګرو ملتونو د کډوالو عالي کمېشنرۍ (UNHCR) وياند قيصر اپريدی وايي، افغانستان ته په دغه هېواد کې د مېشتو افغان کډوالو د ستنېدو بهیر دوام لري؛ خو د ستنېدونکو او بېځايه شويو افغانانو ستونزې لاهم پرځای دي.
د ایران د خراسان رضوي د ټرانسپورټ عمومي مشر جعفر شهامت وايي، چې له ایران نه افغانستان ته هره ورځ له ۲زره باروړونکو موټرونو څخه یوازې ۱۲۰۰ یې پر دوغارون پوله تګراتګ کوي. نوموړي زیاته کړې، د ۱۴۰۵کال لپاره پر دغه پوله د سوداګریزې راکړې ورکړې یوه طرحه هم جوړه شوې چې ژر به پلي شي.
سيبياېس نيوز د څو باخبره سرچينو په حواله راپور ورکړی، د امريکا ولسمشر ډونالډ ټرمپ په زياتېدونکې توګه له هغو محدوديتونو ناخوښي څرګندوي چې د تهران پر ضد د پوځي ځواک د کارولو لپاره وضع شوي دي.
په پکتیا کې د طالبانو امنیې قوماندانۍ خبر ورکړی، چې په دغه ولایت کې یې ځواکونو دوه کسان د ګران بیه ډبرو د ناقانونه کېندنې په تړاو نیولي دي. د یادې قوماندانۍ په وینا؛ له دغه کسانو ګران بیه ډبرې او د دغه ډبرو د کېندنې وسایل هم ترلاسه شوي دي.
په ننګرهار کې د طالبانو رسنیز دفتر خبر ورکړی، چې د دغه ولایت د مرکز جلالاباد ښار په چکنوريو سيمه کې د یوې ټرافیکي پېښې له امله یو کس مړ او یو بل ټپي شوی دی. دغه پېښه تېر ماښام شاوخوا شپږ بجې شوې ده.
د سوریې دولتي خبري اژانس وايي، داعش د دوشنبې په ورځ د دغه هېواد په شمال کې پر یوې پوستې د برید په ترڅ کې۴ دولتي نظامیان ووژل. دا د احمد الشرع په مشرۍ د نوي دولت له جوړېدو وروسته پر دولتي ځواکونو د داعشیانو تر ټولو خونړی برید دی.
د اسټرالیا دفاع وزیر د ایران پر وړاندې د امریکا د احتمالي برید په اړه ویلي، هېواد یې له خپلو نړۍوالو شریکانو سره په سلا مشورو بوخت دی، خو د دغو خبرو جزییات شریکولی نهشي.
د جرمني د کورنيو چارو وزیر الکساندر دوبرینت وايي، د کډوالۍ د نظام د سمون لپاره يوه نوې طرحه چمتو شوې ده. د دې طرحې لهمخې، هغه کسان چې جرمني ته د پناه غوښتنې لپاره ځي، کولای شي يوازې دغه هېواد ته له داخلېدو درې مياشتې وروسته کار پيل کړي.
د روسیې د پلازمېنې مسکو ښار د رېلګاډي په یوه تمځای کې د یوې چادونې له امله د پولیسو یو افسر او یو شکمن کس وژل شوي او دوه نور پولیس ټپيان دي. دغه پېښه نن سهار وختي (سېشنبه د کب ۵مه) رامنځته شوې ده.
په هرات کې د ټرافیکو ادارې ویلي، هغه قبر چې د ښار له منځه لرې شو، رښتینی نه و. د طالبانو د یادې ادارې مشر وايي، دغه قبر چې د ښار د یوه ډېر تګراتګ لرونکي سړک په منځ کې و او له کلونو راهیسې د ټرافیکي پېښو لامل کېده، خالي و او هېڅ پهکې نه و.
د ملي ډیموکراټیک غورځنګ مشر مُحسن داوړ له افغانستان انټرنشنل- پښتو سره په مرکه کې پر افغانستان د پاکستان د برید په غبرګون کې وايي، د پاکستان د هغې پالیسۍ خلاف دی چې غواړي افغانستان وران کړي. د هغه په باور افغان طالبان لا هم د پاکستان په لاس او کنټرول کې دي.
د ویسټانډیز کرېکټ ملي لوبډلې د ۲۰۲۶کال د شل اوریز نړۍوال جام د غوره اتو پړاو په خپله لومړۍ لوبه کې زیمبابوې ته د ۱۰۷ منډو په توپیر ماتې ورکړه. دا لوبه د دې سیالیو د لومړۍ ډلې برخه وه چې په هند کې ترسره شوه.
په هند کې یو شمېر مخکښو مسلمانو عالمانو د طالبانو جزايي اصولنامه غندلې او دا یې له دین څخه ښکاره ناوړه ګټه اخیستنه بللې ده. د «ټول هند د مسلمانانو د جماعت» مشر مولانا شهابالدین رضوي بریلوي ویلي، چې د طالبانو څېره تل له ترهګرۍ سره تړلې پاتې شوې او دوی دغه ډله نهمني.
د امریکا ولسمشر ډونالډ ټرمپ د ایران پر ضد د پوځي اقدام په اړه د متحده ایالاتو د پوځ د لوی درستیز جنرال ډنیل کین د مخالفت راپورونه «سل په سلو کې ناسم» وبلل او ټینګار یې وکړ، چې له تهران سره د جګړې یا هوکړې په اړه پرېکړه د ده په واک کې ده.
د ايران د خراسان رضوي د سرحدي پوليسو چارواکي وايي، د تايباد په سرحدي سيمه کې يې د وسلو او جنګي توکو يوه جوپه نيولې. پوليسو تر اوسه نه دي ويلي چې دا وسلې له کوم ځايه تايباد ته رسېدلي. تايباد د افغانستان له پولې سره نږدې پرته سيمه ده او له دوغارون څخه شاوخوا ۱۸ کيلومتره واټن لري.