د طالبانو د پېښو پر وړاندې د مبارزې ادارې رییس ملا نورالدین ترابي په کابل کې د ملګرو ملتونو د پراختیايي پروګرام له رییس سټیفن روډریګز او د یاد بنسټ له تخنیکي پلاوي سره په کتنه کې د اقلیمي بدلون، ناڅاپي ورښتونو او نیزونو له امله د رامنځته شویو زیانونو په اړه خبرې کړې دي.
د ایران د پوځ یوه چورلکه د سې شنبې په ورځ د اصفهان ولایت په مرکزي سیمه کې د مېوو په بازار کې ولوېده، چې له امله یې پيلوټ، مرستيال پيلوټ او دوه هټیوال مړه شوي دي. رپوټونه زیاتوي چې چورلکه په دورچې ښار کې راولوېده او اور ولګېد، خو د اوروژنې ډلې اور وواژه.
د خبرو اترو له بهیره خبرو شپږو سرچینو ویلي چې ایران له چین سره د بېړیو ضد کروز توغندیو د پېرلو تړون وروستیو پړاوونو ته رسېدلی دی. دا تر غږ چټک توغندي شاوخوا ۲۹۰ کیلومتره واټن ویشتلی شي او داسې طرحه شوي چې د بېړیو دفاعي سیستمونه په ټیټې او چټکې الوتنې تېر باسي.
د طالبانو د اطلاعاتوا او کلتور وزارت وايي، د ګرځندوی شرکتونو اتحادیې مسوولینو خپلې ستونزې د طالبانو د ګرځندوی چارو معین سره شریکې کړې دي. د ګرځندوی شرکتونو اتحادیې ګرځندویانو ته د ویزو اخیستلو په برخه کې د شته ستونزو د حل غوښتنه کړې ده.
د طالبانو د شمال ختیځ زون د نظامي محکمې رییس ویلي، چې که مولوي هبت الله اجازه ور کړي، دویمه شپه به یې په کوټه او پېښور کې وي. نوموړي دغه راز ویلي، چې هرڅوک د طالبانو ادارې ته زیان رسوي، پر خلاف یې جهاد فرض عین دی.
د طالبانو د معیار او کیفیت ادارې مشر فیضالله تمیم د یوه پلاوي په مشرۍ ترکمنستان ته ولاړ. د یادې ادارې د خپرې شوې خبرپاڼې له مخې؛ نوموړی د باکیفیته تېلو د واردولو، د تېلو د سرچینو او تصفیه خونه څخه د لیدنې په موخه دغه هېواد ته تللی دی.
د اوکراین ولسمشر ولادیمیر زېلېنسکي د اوکراین جګړې د څلورمې کليزې په مناسبت په خپل خپور کړي پیغام کې ویلي، چې اوکراین له خپلې خپلواکۍ دفاع کړې، خپل دولت یې له لاسه نهدی ورکړی او روسیې خپلې موخې نهدي ترلاسه کړې.
د خیبر پښتونخوا په کوهاټ کې د پولیسو پر یوه موټر په وسلهوال برید کې د یوه پاکستاني افسر په ګډون ۴ پولیس وژل شوي او درې نور ټپيان دي. د راپورونو له مخې؛ تر برید وروسته وسلهوالو د پولیسو موټر سوځولی دی.
د طالبانو د کورنیو چارو وزارت وایي، په نیمروز کې د یادې ډلې امنیې قوماندانۍ د کشفي عملیاتو پرمهال ۲۳زره او ۵۰۰ هغه وسایل کشف او ضبط کړي چې د تریاکو د حاصل اخیستنې او شېرې اېستلو لپاره کارول کېدل.
د طالبانو تر واک لاندې د احصايې او معلوماتو اداره وایي، چې په تېرې سلواغې میاشت کې د هوایي ډګرونو او ځمکنیو بندرونو له لارې افغانستان ته ۲زره او ۹۱۸ بهرنیو وګړو تګراتګ کړی. یادې ادارې ویلي، چې دغه وګړي افغانستان ته د کار، سیل او د کورنیو د لیدو لپاره راغلي وو.
د طالبانو د بهرنیو چارو وزیر امیرخان متقي د ملګرو ملتونو د سیاسي چارو لپاره د سرمنشي مرستيالې روزمارې ډېکارلو سره په ټیلیفوني خبرو کې د پاکستان وروستي هوايي بریدونه چې پهکې ملکي وګړي په نښه شوي غندلي او د دغه پېښو د بشپړې څېړنې غوښتنه یې کړې ده.
د افغانستان لپاره د پاکستان ځانګړي استازي محمد صادق له خپل ازبک سیال سره د یوې انلاین غونډې پر مهال ویلي، چې د طالبانو په کوربهتوب زرګونه وسلهوال د ګاونډیو هېوادونو لپاره جدي امنیتي ګواښونه رامنځته کوي. هغه وایي، دامهال په افغانستان کې د ازبک وسلهوالو شمېر تر ۲۵۰۰ زیات دی.
د طالبانو د امربالمعروف، نهې عن المنکر او شکایتونو اورېدو وزارت وایي، په بدخشان کې یې هغه درې کوډګر نیولي چې د «دم، کوډو او تعویذ» په نومونو یې د کورنیو ترمنخ ستونزې جوړولې. یاد وزارت خبرداری ورکړی، چې په ټولنه کې چاته د دغه ډول کړنو اجازه نه ورکوي.
د طالبانو تر واک لاندې د اریانا افغان هوایي شرکت ویلي، چې د ۱۴۰۴کال د سلواغې میاشتې په اوږدو کې دغه شرکت نږدې ۴۲زره مساپر او ۳۷۰ټنه سوداګريز توکي کورنیو او نړۍوالو سکټورونو ته انتقال کړي دي.
د طالبانو د کورنیو چارو وزارت خبر ورکړی، چې په ۵ ولایتونو کې یې د یو لړ عملیاتو پر مهال ۱۰ کسان د «غلا، قتل او قمار» په تور نیولي دي. یاد وزارت زیاته کړې، نیول شوي کسان به تر پوښتنو ګروېږنو وروسته قضايي ادارو ته ور وپېژندل شي.
په غزني کې د طالبانو ښاروال ابومحمد ثابت وايي، تېره اونۍ یې ۵۰۰ هغه هټۍ تړلې چې د ورکړل شوې نرخ پاڼې څخه یې سرغړونه کړې او توکي یې په لوړه بیه پلورل. طالبانو هټۍوالو ته خبرداری وکړی، چې سرغړونکي به عدلي او قضايي ادارو ته ور وپېژني.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د کب ۴مه) ۵۱۱ کډوالې کورنۍ چې ټولټال ۲زره او ۴۲۴ کسان کېږي؛ له ایران او پاکستان نه افغانستان ته ستنې شوې دي.
د امریکا دفاع وزیر پېټ هېګسټ له خبریالانو سره د خبرو پرمهال ویلي، چې د ایران حکومت باید له دې فرصته د یوې هوکړې لپاره کار واخلي. هغه ټینګار کړی، چې د ولسمشر ټرمپ لپاره لاهم ټول انتخابونه د مېز په سر پراته دي.
د طالبانو د معیار او کیفیت ادارې ویاند محمد یوسف غاویر خبر ورکړی، چې په تېرې سلواغې میاشت کې یې د بېلابېلو بندرونو له لارې ۲۰۵ ټُنه بېکيفيته ودانیز توکي بېرته صادرونکو هېوادونو ته ستانه کړي دي.
د خیبر پښتونخوا هریپور ولسوالۍ چارواکو رسنیو ته ویلي، چې په تېرو شپږو میاشتو کې له دغه ولسوالۍ په خپله خوښه د ستنېدونکو افغان کډوالو شمېر کې زیاتوالی راغلی او دغه شمېر تر ۹۰ سلنې لوړ شوی.
د بلوچستان په پنجګور ولسوالۍ کې د ډزو دوو بېلابېلو پېښو پرمهال د دوو افغان ښځو په ګډون اته کسان وژل شوي او درې نور ټپیان دي. ځایي چارواکو ویلي، دغه وژل شویو افغان مېرمنو په قاچاقي لاره پاکستان ته د ننوتو هڅه کوله.