د افغان ایواک مشر شان وانډيور وايي، د امریکا د پنسلوانیا ایالت په یوه توقیف ځای کې شاوخوا ۳۰ افغانانو ته ویل شوي چې لویزیانا ایالت ته لېږدول کېږي او د نومبر په پیل کې به له امریکا وشړل شي. نوموړی وايي، له هغې وروسته یې له شپږو ایالتونو څخه ورته راپورونه ترلاسه کړي دي.
د پښتون ژغورنې غورځنګ مشر منظور پشتین د هاګ عدالت ډیالوګ کې ویلي، پاکستان پوځ او استخباراتي ادارې په پښتونخوا کې وسلهوالې ډلې جوړوي، تمویلوي، روزي او بیا د ترهګرۍ ضد عملیاتو په نامه خلک جبري بېځایه کوي. د پشتین د خبرو پرمهال د اعتراض په توګه د پاکستان استازي له غونډې ووتل.
د افغانستان لپاره د برېتانیا ځانګړي استازي ریچارډ لېنډسي ویلي، کابل ته یې د خپل سفر پر مهال له طالب چارواکو غوښتي چې یوازې خبرې بسنه نه کوي، بلکې طالبان باید د ترهګرۍ پر وړاندې د مبارزې ژمنې عملي کړي، سیمهییز امنیتي ګواښونه مهار کړي او د ښځو او نجونو حقونو ته درناوی وکړي.
د طالبانو د ازموینو اداره وايي، د ستوماتولوژۍ پوهنځي فارغانو د فعالیت جواز (اېګزېټ) ازموینه سبا (جمعه د تلې ۲۴مه) په کابل پوهنتون کې اخیستل کېږي. د طبي شورا د اېګزېت په تېرو ازموینو کې نجونو ته د ګډون اجازه نهوه ورکړل شوې او اوس هم د ازموینو ادارې په دې تړاو څه نهدي ویلي.
د طالبانو کورنیو چارو وزارت لومړي مرستیال محمد نبي عمري په لارو کې د تالاشیو پر مهال د طالب وسلهوالو د چلند ستاینه کړې؛ خو د بشري حقونو راپورونه او د افغانانو څرګندونې ښيي چې خلک په چیک پواینټونو کې د بېځایه پوښتنو، د موبایلونو د پلټنې او له دوی سره د ناوړه چلند شکایتونه لري.
په روسیې کې د طالبانو سفیر ګل حسن حسن په دغه هېواد کې د قزاقستان له سفیر داورېن ابایف سره په کتنه کې د دوه اړخیزو سیاسي، اقتصادي او سوداګریزو اړیکو په تړاو خبرې کړې دي. دواړو لورو د دوه اړخیزو اړیکو پر دوام هم ټینګار کړی دی.
د طالبانو مخالفې وسلهوالې ډلې، متحدې جبهې ادعا کړې چې ځواکونو یې د هلمند ولایت د ګرشک او نوزاد ولسوالیو ترمنځ د طالبانو پر یوې پوستې برید کړی او پنځه طالب وسلهوال یې وژلي دي.
د طالبانو د کورنیو چارو وزیر د پولیسو د قانون لارښودیزه غونډه کې خبرداری ورکړی، چې د دغه قانون سرغړونکو ته به «لازمه» جزا ورکړل شي. هغه څرګنده کړې، چې له دغه قانون سره د ټولو دندې مشخصې شوې دي. پر دغه قانون او په ځانګړې توګه د لاریونونو پر منع کېدو ګڼې نیوکې لا هم پر خپل ځای دي.
د طالبانو مخالفې وسلهوالې ډلې، ملي استقلال جبهې ادعا کړې چې د میدان وردګو ولایت د سیداباد ولسوالۍ په سالار سیمه کې یې د طالبانو پر یوه ګزموي رینجر موټر برید کړی او څلور طالب وسلهوال یې وژلي دي.
د طالبانو کورنیو چارو وزارت مرستیال ابراهیم صدر د پولیسو د شپه او ورځې دندو ته په اشارې د هغوی د تنخواوو د دوه برابره کېدو غوښتنه کړې؛ خو د کابل د اوسېدونکو شکایتونه دا پوښتنه راپورته کوي چې ایا د معاشونو له زیاتوالي سره به د پولیسو مسوولیت منل او له خلکو سره ښه چلند هم تضمین شي؟
د طالبانو مخالفې وسلهوالې ډلې، متحدې جبهې کابل او کندهار ته د روسیې د بهرنیو استخباراتو د مشر سرګي ناریشکین، پر سفر نیوکه کړې او له مسکو یې غوښتي چې د طالبانو له ملاتړ ډډه وکړي. دې جبهې ویلي، افغانان به په «تورو ورځو» کې د هغو کسانو دریځونه په یاد وساتي چې د دوی تر څنګ ولاړ وو.
د لبنان ولسمشر جوزف عون د امریکا د بهرنیو چارو له وزیر مارکو روبیو غوښتي چې پر اسراییل فشار راوړي، څو د لبنان پر سوېلي سیمو خپل بریدونه ودروي.
د ملګرو ملتونو د خوړو او کرنې سازمان (ایفایاو) او د خوړو نړیوال پروګرام (ډبلیوایف پي) خبرداری ورکړی چې د روان کال په ژمي کې به د افغانستان شاوخوا ۴۰ سلنه وګړي د خوړو له شدید ناورین سره مخ شي.
د نوبل د جاېزې ګټونکې ملالې یوسفزۍ پلار ضیاءالدین یوسفزي، پېښور کې د ښوونځي د چت نړېدو له امله د ماشومانو پر مړینه خواشیني څرګنده کړې او ویلي یې دي چې ښوونځي باید د زدهکړو ځایونه وي، نه د ماشومانو هدیرې. ورته مهال د پاکستان د بشري حقونو کمېسیون هم د خپلواکې څېړنې غوښتنه کړې ده.
د ننګرهار په مرکز او ۲۲ ولسوالیو کې د سختو ورښتونو او سېلابونو له امله ۲ کسان مړه، یو لادرکه او ۱۰ نور ټپیان شوي دي. د دغه ولایت لپاره طالب مسوولین وايي، په دې پېښو کې ۲۱۶ کورونه هم زیانمن شوي، خو لا تر اوسه له زیانمنو سره هېڅ ډول مرستې نهدي شوي.
د طالبانو د هرات ښاروال حمدالله نعماني وايي، چې که په دغه ښار کې روان پرمختګ په همدې ډول دوام وکړي، هرات به په راتلونکو اتو او لسو کلونو کې د دوبۍ، جدې او کراچۍ له ښارونو سره د سیالۍ جوګه وي.
د طالبانو د لوړو زده کړو وزیر ندا محمد ندیم د غزني تخنیکي پوهنتون د فراغت غونډه کې محصلانو ته ویلي چې د خپل مسلک اړوند برخه کې کار وکړي او هېڅکله دې له افغانستان څخه تېښتې ته زړه نه ښه کوي.
افغانستان انټرنشنل ته باخبره سرچینو ویلي، چې ټاکل شوې د افغانستان لپاره د ملګرو ملتونو د سرمنشي نوې ځانګړې استازې او د ملګرو ملتونو د مرستندوی ماموریت (یوناما) مشره رباب فاطمې روانه اونۍ افغانستان ته لاړه شي او خپله دنده په رسمي ډول پیل کړي.
د افغانستان د امریکايي پوهنتون د شل کلن مزل او فعالیتونو د ملاتړ په مناسبت، د قطر سفارت په کوربهتوب د امریکا په پلازمېنه واشنګټن کې یوه غونډه شوې او د امریکا یو شمېر پخوانیو او برحاله چارواکو، د پوهنتونونو استادانو او د دغه پوهنتون افغان فارغانو پکې ګډون کړی.
هند او روسیې د افغانستان او پاکستان په اړه د ځانګړي میکانیزم په اووم پړاو ناسته کې د چارشنبې په ورځ په نوي ډیلي کې خبرې کړې دي. د هند د بهرنیو چارو وزارت په اعلامیه کې د افغانستان او پاکستان په اړه د بحثونو نور مشخص جزئیات نه دي خپاره شوي.
د طالبانو د ادارې ویاند ذبیحالله مجاهد د افغانستان لپاره د ملګرو ملتونو د مرستندویه ماموریت (یوناما) پر وروستي راپور نیوکه کړې او تور یې لګولی، چې دغه دفتر په افغانستان کې د دوی پر ضد په «پروپاګند» بوخت دی.