د پخواني پارلمان دوو غړو، شکریه بارکزۍ او شینکۍ کړوخېل، د ښځو پر وړاندې د طالبانو چلند غندلی او ویلي یې دي، طالبان د حجاب په پلمه ښځې ځوروي او د زدهکړو حقونه یې محدود کړي. دا څرګندونې وروسته له هغې کېږي چې ملګرو ملتونو په کابل او هرات کې د ۵۲ ښځو او یوې نجلۍ نیول کېدل تایید کړل.
د سمنګان لپاره د طالبانو د امنیه قومندانۍ مسوولین وايي، په دغه ولایت کې د دوو ټرافیکي پېښو له امله دوه کسان مړه او ۳ نور ټپيان شوي دي.
د سویډن رسنیو د راپور لهمخې، په استکهُلم کې د مخکیني افغان سفیر عباس نویان د پناهغوښتنه قضیه رد شوې ده. ویل شوي چې د دغه هېواد د کډوالۍ ادارې د عباس نویان د اېستنې پرېکړه کړې، خو نوموړي اعتراض کړی او دمګړۍ یې دوسیه په کډوالۍ محکمه کې تر ارزونې لاندې ده.
د امریکا د جګړې وزیر پیټ هګسېت د ډونالډ ټرمپ د حکومت له لوري سوریې او عراق څخه د امریکايي ځواکونو د وتلو بهیر د جو بایډن د ولسمشرۍ پر مهال له افغانستان څخه د وتلو له بهیر سره پرتله کړی. هغه ویلي، له افغانستان څخه د امریکايي ځواکونو د وتلو څرنګوالي د امریکا اعتبار ته زیان ورساوه.
د امریکا د جګړې وزارت اعلان کړی دی چې د فورټ هوډ د پوځي اډې د بریدګر نضال ملک حسن د اعدام بهیر به په ژوندۍ بڼه خپور شي. دا پرېکړه وروسته له هغې وشوه چې د امریکا د جنګ وزیر پېټ هګسېټ وویل، د دغه بریدګر اعدام به د عامو خلکو پر وړاندې او علني وي.
د طالبانو د ارشاد، حج او اوقافو وزارت وايي، د تېر کال د ۳۰ زره حاجیانو له ډلې یې تر اوسه څه باندې ۲۰ زره ته د حج له لګښتونو اضافه شوې پیسې بېرته ورکړي. په داسې حال کې چې افغان حاجیانو په مراسمو کې د منظم ټرانسپورټ او مناسبو خدماتو او امکاناتو له نه شتون څخه شکایت درلود.
د عراق د کردستان په اربیل ولایت کې د ایران د کردستان د خبات سازمان پر یوه مرکز د پنجشنبې په ماښام د دوو چاودېدونکو ډرونونو برید شوی، چې د دې سازمان په وینا، مرګژوبله یې نه ده اړولې، خو د مرکز ودانۍ او شاوخوا سیمو ته یې مالي زیان رسولی دی.
د روادارۍ په نوم د بشري حقونو بنسټ په هسپانیا کې د یوې غونډې له لارې له طالبانو سره د اړیکو د عادي کولو پر وړاندې د دریځ نیولو او د افغان ښځو لپاره د ولسي محکمې د پرېکړې د عملي کېدو غوښتنه کړې ده. دوی ویلي چې د طالبانو د ښځو ضد سیاستونه باید عادي ونه ګڼل شي
د جمهوري نظام پر مهال د افغانستان د دفاع وزارت سرپرست شاه محمود میاخېل وايي، افغانستان له څو لسیزو سیاسي، امنیتي او ټولنیزو بحرانونو وروسته د خپل راتلونکي لپاره ملي اجماع ته اړتیا لري او په وینا یې، «واقعي لویه جرګه چې د افغانستان د خلکو استازولي وکړای شي» د حل لار ده.
د اوکراین ولسمشر ولادیمیر زیلېنسکي اعلان وکړ چې هېواد یې تمه لري اروپایي شریکان په راتلونکو ورځو کې له امریکا سره د سولې په خبرو اترو کې ورګډ شي. دا خبرې د هغو هڅو برخه ده چې د امریکا په مشرۍ له روسیې سره د څه باندې څلور نیم کلنې جګړې د حل لپاره پیل شوې دي.
د ایران ولسمشر مسعود پزشکیان له خپل روسي سیال سره په کتنه کې د منځني ختیځ کړچ ته په اشارې سره ویلي، تهران چې هر کله له واشنګټن سره خبرې کوي، نو پرې برید کوي. هغه زیاتوي، له واشنګټن سره د خبرو په حال کې دي او په ټينګار سره یې ویلي، چې د خبرو له مېز څخه به هېڅکله په شا نهشي.
د روغتیا نړیوال سازمان وايي، د کانګو دیموکراتیک جمهوریت کې د بوندیبوجیو ایبولا ویروس له امله د تایید شویو ناروغانو شمېر ۸۷۲۸ او د مړینو شمېر ۴۲۰۵ ته رسېدلی دی.
د افغانستان کرېکټ ملي لوبډله نن، د تلې په ۱۷مه، په ابوظبۍ کې د بنګلهدېش پر وړاندې د یوازېنۍ ټېسټ لوبې ډګر ته وځي. دا لوبه به د رحمت شاه زرمتي لپاره د ټېسټ لوبډلې د کپتان په توګه لومړۍ رسمي سیالي وي او دواړه لوبډلې به د شیخ زاید کرېکټ لوبغالي پر میدان سره مخ شي.
د طالبانو مخالفې وسلهوالې ډلې، متحدې جبهې ادعا کړې چې د کندهار ولایت په ارغستان ولسوالۍ کې یې د طالبانو دوه غړي وژلي دي. د دغې جبهې په خبرپاڼه کې راغلي چې دغه عملیات د یادې ولسوالۍ اړوند په «نرغل» سیمه کې ترسره شوې دي.
د ماشومانو لپاره د ملګرو ملتونو وجهي صندوق (یونیسف) وايي، په افغانستان کې د ټولنې پر بنسټ لومړني روغتیايي خدمتونه پیاوړي کوي او د میندو، نوي زېږېدلو ماشومانو روغتیايي خدمتونو ته د لاسرسي د پراخولو لپاره کار کوي.
بلخ کې د طالبانو رسنیز دفتر خبر ورکړی چې طالب والي یوسف وفا په افغانستان کې د ترکیې له سفیر سادین ایلدز سره کتلي او پر دوه اړخیزو همکاریو یې خبرې کړې دي. د دې کتنې پر مهال د اقتصادي، سوداګریزو او ترانزیټي اړیکو پر پراختیا او پیاوړتیا بحث او د نظرونو تبادله شوې ده.
د طالبانو مخالفې وسلهوالې ډلې، متحدې جبهې ویلي چې د افغان امنیتي او دفاعي ځواکونو پخواني غړي لا هم په خپل هېواد کې له ګواښونو سره مخ دي او په وینا یې، میلیونونه افغانان د یوه نظام له «وحشت» څخه د تېښتې وروسته د بل لوري له تاوتریخوالي سره مخ شوي دي.
د طالبانو یو لوړپوړی چارواکی، شهابالدین دلاور ادعا کوي چې افغانستان د نړۍ له امنو هېوادونو څخه دی او د هر وګړي ځان او مال خوندي دی او هېڅوک حق نه لري چې د بل چا پر ځان او مال تېری وکړي. خو یوناما همدا نن په بېلابېلو ولایتونو کې د ۵۲ ښځو پر نیول کېدو اندېښنه ښودلې ده.
د مقاومت جبهې د سیاسي دفتر مشر عبدالله خنجاني ویلي، د ښځو پر وړاندې د طالبانو جنایتونه باید په هېواد کې فرعي مسله ونه ګڼل شي. هغه ټینګار کړی، چې په افغانستان کې د جنایت د مفهوم تاریخي بیا تعریف روان دی او طالبان باید د ښځو پر وړاندې د خپلو کړنو حساب ورکړي.
د افغانستان د پخوانۍ ولسي جرګې غړې فوزیه کوفي د پوښتنې په ډول ویلي، چې نړۍ ولې په افغانستان کې د ښځو او نجونو پر وړاندې له پرلهپسې ګواښونو، ځورونو، نیونو او له ټولنې د هغوی د اېستلو سره عادي شوې ده.
د طالبانو له واک ته رسېدو پنځه کاله وروسته، وسلهواله مخالفه مبارزه د افغانستان له شمالي سیمو ورهاخوا د هېواد نورو برخو ته د پراخېدو په حال کې ده. د مقاومت د ډلو جغرافیایي پراختیا او د پخوانیو افغان ځواکونو د غړو بیا تنظیمېدل د طالبانو لپاره د امنیتي ننګونې نوې بڼه رامنځته کوي.