د امریکا ځانګړو استازو د قطر پلازمېنه دوحه کې له طالب پلاوي سره په لیدنه کې د امریکايي وګړو پر «سملاسي او بې قید او شرطه» خوشې کولو ټینګار کړی دی. دوی دغه نیونه له طالبانو سره د امریکا د تعامل په برخه کې مهم خنډ بللی دی. معلومه نه ده چې څو امریکايان په افغانستان کې بندیان دي.
خو د وري په میاشت کې د امریکا د بهرنیو چارو وزیر انټوني بلېنکن ویلي وو، چې شاوخوا ۱۷۵ امریکایي وګړي په افغانستان کې پاتې دي چې ځینې د ۲۰۲۱ کال په اګسټ میاشت کې د جمهوریت له پرځېدو وروسته افغانستان ته تللي وو.
په دوحه کې د تړلو دروازو ترشا تر دوه ورځنیو خبرو اترو وروسته د افغانستان لپاره د امریکا ځانګړي استازي توماس وېسټ په خپله ټوېټر پاڼه لیکلي چې، دوحه کې یې له طالب پلاوي سره د افغانستان پر اقتصادي وضعیت، بشري حقونو، بشري اړتیاوو، امنیتي ژمنو په ترسره کولو، د ټولګډونه حکومت په رامنځ ته کولو او د نشه یي توکو پر وړاندې د مبارزې په اړه خبرې اترې کړې دي.
ښاغلي وېسټ دغه خبرې دوه اړخیزې، مفصلې، څرګندې او د افغانانو د ملاتړ او د هغوی د ګټو د ساتنې لپاره اړینې ګڼلې دي.
په ورته وخت کې د طالبانو د حکومت د بهرنیو چارو وزارت هم ویلي، چې په دغو دوو ورځنیو خبرو کې د دواړو لورو تر منځ د نورو موضوعاتو ترڅنګ پر باور جوړونې، د افغانستان د بانکي زېرمو پر ازادولو، له نشه يي توکو سره پر مبارزې او بشري حقونو یې خبرې کړې دي.
د افغان مېرمنو، نجونو او بشري حقونو لپاره د امریکا ځانګړې استازې رینا امیري هم پر خپله ټویټر پاڼه ليکلي چې د دغو دوه ورځنیو ناستو په اوږدو کې يې په وار، وار په افغانستان کې د بشري حقونو د حالت د سمون پر بيړنۍ اړتیا ټینګار کړی.
هغې په خپل ټویټ کې لیکلي، چې په دغو غونډو کې یې د ښځو او نجونو پر وړاندې د بندیزونو د لرې کولو، تعلیم او کار ته د لاسرسي، د بندیانو خوشي کول، د فزیکي مجازاتو پای ته رسولو، او پر رسنیو د فشار د له منځه وړلو غوښتنه کړې ده.
اغلې امیري دغه راز ناستې د امنیت د ټينګښت، اقتصادي پرمختیا او ټیکاو د ترلاسه کولو او له نړیوالې ټولنې سره د دریځ په ښه کولو کې، بشري حقونو ته د درناوي اساسي ارزښتونه ګڼلي دي.
