دوو سرچینو رویټرز اژانس ته ویلي، چې د اوکراین دوو ډرون کښتیو په تور سمندرګي کې د روسیې جنګي بېړۍ سخته زیانمنه کړې ده. د روسیې دفاع وزارت هم د جمعې په ورځ ومنله چې دوو اوکریني ډرون کښتیو د شپې د دوی پر سمندري اډې د برید هڅه کړې ده.
دغه وزارت په لنډ بیان کې ویلي، چې دا برید یې له اډې بهر اوبو کې شنډ کړی دی، خو خپلې بېړۍ ته د زیان اوښتو په هکله یې څه نه دي ویلي.
اما په اوکراین کې استخبارتي سرچینې رویټرز ته ویلي، چې په دغه برید کې د روسیې جنګي بېړۍ اولنګورسکي ګورنیاک سخته زیانمنه شوې او نور عملیات نشي کولی.
نوروسیسک بندر کې یوې بلې سرچینې هم رویټرز ته ویلي، چې د روسیې ستره سمندري بېړۍ خرابه شوې او دغه بېړۍ خوځېدلی نه شي نو باید سمندرغاړې ته کش کړل شي.
نوروسیسک چې د نړۍ دوه سلنه تېلو او هم د روسیې د غلو دانو د لېږد مهم بندر دی، له دې پېښې وروسته پکې د بېړیو تګ راتګ د لنډ وخت لپاره ځنډېدلی دی.
