د پاکستان کابینې د داسې امنیتي تړون لاسلیک تاییدکړ، چې له مخې به یې اسلام اباد ته له واشنګټن څخه د پوځي تجهیزاتو د اخیستلو لار هوارېږي. رسمي سرچینو اېکسپریس ټرېبیون ورځپاڼې ته منلې، چې کابینې د امریکا او پاکستان ترمنځ د همکارۍ او امنیت په اړه د تړون د لاسلیکولو منظوري ورکړې ده.
د (CIS-MOA) په نوم دغه تړون امریکا له خپلو متحدانو او هغو هېوادونو سره لاسلیکوي، چې غواړي ور سره نږدې پوځي او دفاعي اړیکې وساتي.
د دغه تړون د لاسلیکولو په اړه تر اوسه دواړو هېوادونو رسمي څه نه دي ویلي.
د لومړي ځل لپاره دغه تړون د پاکستان د ګډو ځواکونو د مرکزي دفتر او د متحده ایالتونو د دفاع وزارت ترمنځ د ۲۰۰۵ کا په اکتوبر کې د ۱۵ کلونو لپاره لاسلیک شو.
دغه تړون په ۲۰۲۰ کال کې پای ته رسیدلی و، خو دواړه لورو اوس نوی کړی چې ګډ تمرینونه، عملیات، روزنه، اډې او تجهیزات پکې شامل دي.
په واشنګټن کې یوې سرچینې ایکسپرېس ټریبیون ته ویلي، دا تړون ډاګیزوي چې متحده ایالات ممکن په راتلونکو کلونو کې پر پاکستان یو څه نظامي تجهیزات و پلوري.
خو د اردو یو لوړ پوړي متقاعد افسر دا تړون کم اهمیته وباله.
دغه افسر له نوم پرته زیاته کړه، چې له تړون سره، سره د پاکستان لپاره له امریکا د پوځي وسایلو اخیستل اسان کار نه دی.
دغه افسر د امریکا او هند مخ پر وده ستراتیژیکو اړیکو ته په اشاره وایي: «د واشنګټن اوږد مهاله ګټې له اسلام اباد سره سمون نه لري، خو امریکا په ځینو حساسو برخو کې پاکستان ته اړتیا لري او له همدې امله دا تړون د دواړو هدفونه پوره کوي »
پاکستان یو وخت د امریکا له سترو پوځي او امنیتي مرستو تر لاسوونکی هیواد و، خو حالات هغه وخت بدل شول، کله چې سړه جګړه پای ته ورسیده او چین د امریکا د حاکمیت ننګول پیل کړل.
دغه وضعیت واشنګټن دې ته اړ کړی، چې د چین د مقابلې لپاره له هند سره نږدې همکاري وکړي.
په همدې حال کې پاکستان امریکا خپل څو لسیزې اهمیت له لاسه ورکړی؛ خو د یوې بلې سرچینې په وینا د یاد تړون په لاسلیک سره داسې برېښي چې لږ تر لږه امریکا نه غواړي له پاکستان سره اړیکې کمې کړي.
