په افغانستان کې د طالبانو مشر ملا هېبت الله د پاکستان په ګډون له افغان خاورې د باندې هر ډول بریدونه «حرام» بللي او هغه يې له اسلامي احکامو سر غړاوی یاد کړی دی. تر دې وړاندې ملا یعقوب خپلو جنګیالو ته ويلي و، چې له افغانستانه بهره جهاد نشته.
په اسلام اباد کې یوې معتبرې رسمي سرچینې افغانستان انټرنشنل ته ویلي، د طالبانو لوړپوړو مشرانو د هېبت الله "حکم" یا فرمان پاکستاني چارواکو ته د وروستیو دوه اړخیزو خبرو اترو پر مهال رسولی، چې په دې توګه هغوی ته د طالبانو دا هوډ څرګند کړ چې، «هیچا ته اجازه نه ورکوي د افغانستان له خاورې نورو هېوادونو ته ګواښ پېښ کړي.»
سرچينې وايي، دا پیغام ځکه له کابله ډاګیز نه شو چې په کور د ننه غبرګونونه را و نه پاروي.
دا موضوع تېره میاشت په کابل کې د افغان طالبانو او پاکستاني پلاوي تر منځ یاده شوې وه، د افغانستان لپاره د پاکستان د ځانګړي استازي اصف دراني چې د یوه پلاوي مشري يې کوله، په پلازمېنه کابل کې يې د طالبانو د بهرنیو چارو له وزیر امیرخان متقي او د کورنیو چارو له وزیر سراج الدین حقاني سره په درې اړخیزه ناسته کې شاربلې وه.
د طالبانو د دفاع وزیر له څرګندونو چې په جلال اباد کې یې خپلو جنګیالیو ته کولې داسې انګېرل کېږي، چې د خپل مشر ملا هبېت الله پيغام يې په یوه بله بڼه ور ورساوه.
کابل ته د پاکستاني پلاوي سفر داسې مهال وشو، چې د دغه هېواد پر امنیتي ځواکونو او ملکي وګړو باندې ځانمرګي او ډله ییز وسلوال بریدونه زیات شوي و، چې د ډېری بریدونو مسوولیت د پاکستاني طالبانو ډلې يا ټي ټي پي په غاړه اخیسته.
پاکستاني امنيتي چارواکو ویلي، ډېر داسې اسناد په لاس ورغلي چې په تېر کې د پاکستان پولو ته نږدې کوم بریدونه شوي او مسوليت يې هم د ټي ټي پي ډلې منلی و له افغانستانه پلان شوي وو؛ خو پاکستاني چارواکي دا دعوه هم کوي چې پاکستاني طالبان په افغانستان کې خوندي ځایونه لري.
کابل ته د پاکستان د تللي پلاوي له معلوماتو باخبر یوه جګپوړي چارواکي افغانستان انټرنشنل ته ویلي، چې په افغانستان کې د پاکستاني طالبانو د پټنځایونو او فعالیتونو په اړه لاسوندونه وړاندې شوي.
دغه چارواکي چې نه يې غوښتل نوم او موقف يې څرګند شي ویلي، چې د طالبانوکوربنو چارواکو، ورغلي پاکستاني پلاوي ته ويلي چې: «د شیخ هېبت الله فرمان ټولې هغه ډلې تړلي چې له ده سره يې بیعت کړی او د هغه حکم دا دی چې پر پاکستان برید حرام دی.»
پاکستاني لوري پر افغان طالبانو غږ کړی، چې د پاکستاني طالبانو او د هغوی له افغان ملاتړو دې پرده پورته کړي که داسې و نه شي دا به د دواړو هېوادونو اړیکې خړې پړې کړي.
