په ایران کې د زابل د مرکزي قطعې قوماندان ویلي، چې د دغه هېواد پوله ساتو د ایران او افغانستان په ګډه پوله کې ۱۵۶ نا قانونه کسان نیولي دي. د پرویز قاسم زاده په وینا، دغو کسانو غوښتل په نا قانونه توګه ایران ته واوړي.
سپاه پاسدارونو پورې اړوند د تسنیم خبري اژانس د پنجشنبې په ورځ د قاسم زاده له قوله لیکلي، چې دغه کسان یې د سیستان او بلوچستان په پولو کې تر پېژندلو وروسته نیولي دي.په ایران کې د مرکزي قطعې قوماندان وایي، هغه کسان چې ایران ته په نا قانونه توګه د راتګ هڅه کوي، د دوی له خوا تر نیولو وروسته بېرته خپل هېواد ته ستنول کېږي.واک ته د طالبانو له رسېدو وروسته ډېر شمېر افغانان ګاونډیو هېوادونو په ځانګړې توګه ایران ته کډوال شول او تراوسه هم یو شمېر نور د هېواد د پرېښودو په هڅه کې دي.د ایران اسلامي جمهوریت هره اونۍ د قانوني اسنادو د نه درلودو په تور زرګونه افغانان له دغه هېواده باسي.په ایران کې د افغان کډوالو کره شمېره تراوسه روښانه نه ده، خو د ایران ځینې چارواکو یې کابو د پنځو ملیونو او یو شمېر نورو یې بیا د اوو ملیونو کسانو اټکل کړی.په ایران کې د زابل د مرکزي قطعې قوماندان وویل، د ایران پوله ساتونکي په سیستان او بلوچستان کې د غیر قانوني بهرنیانو د نا قانونه تګ، راتګ او استوګنې د مخنیوي لپاره جدي تګلارې لري، چې د دغې پدیدې د منفي اغیزو او ټولنیزو ستونزو په ځانګړې توګه اړوندې چارې مدیریت کړي.
