د طالبانو تر کنټرول لاندې د افغانستان د سرې میاشتې ټولنې مرستیال ملا نورالدین ترابي په دوحه کې د افغانستان لپاره د برېټانیا د سفیر رابرټ ډېکسن سره لیدلي او د رواني ناروغانو او په زړه سوري اخته ماشومانو په درملنه کې د همکارۍ غوښتنه کړې ده.
د سرې میاشتې ټولنې په خپلې یوې خپرې شوې خبرپاڼه کې لیکلي، چې د افغانستان لپاره د برېټانیا سفارت په دې برخه کې د همکارۍ ژمنه کړې.
دغې ټولنې د ۱۴۰۱ کال د کب په میاشت کې اعلان وکړ، چې د زړه په سوري اخته ۲۴ زره او۷۴۳ ماشومان یې په نوملړ کې ثبت کړي دي.
د طالبانو تر کنټرول لاندې سرې میاشتې ویلي، چې د زړه په سوري د اخته ماشومانو یو څه درملنه یې کړې، خو هره ورځ د ناروغانو شمېر مخ پر ډېرېدو دی.
د طالبانو له بیا واکمنېدو وروسته او د دغې ډلې لخوا پر ښځو د لګېدلو کاري بندیزونو له امله، افغانستان د روغتیا او ټکنالوجۍ په برخو کې د تجهیزاتو او کاري ځواک له کمښت سره مخامخ دی.
