د سویلي خراسان د اقتصادي چارو د همغږۍ مرستیال له اړونده بنسټونو وغوښتل، چې «په بیرجند کې دې د افغانستان قونسلګرۍ د ځای پر ځای کولو» موضوع وڅاري. جواد اشرفي وویل، چې دغه بنسټ به افغانستان ته د توکو په صادرولو کې اسانیاوې برابرې کړي.
د ځوانو خبریالانو د ټولنې په وینا د سویلي خراسان د ګمرکونو عمومي مدیر ویلي، چې د دغه ولایت د صادراتو زیاته برخه افغانستان ته لېږدول کېږي. د دغه ولایت د ۴۸ ملیونه ډالرو په ارزښت د صادراتي توکو له ډلې یې یوازې د ۴۱ ملیونو ډالرو په ارزښت توکي افغانستان ته صادر کړي دي.
سویلي خراسان چې مرکز یې بیرجند دی، له افغانستان سره ۲۳۱ کېلومټره ګډه پوله لري.
په تېرو وروستیو میاشتو کې له ایرانه افغانستان ته د صادراتو کچه لوړه شوې ده. د (زمري ۱۵ مه) د تهران د صنعت او سوداګرۍ ټولنې اعلان وکړ، چې افغانستان د دوی لپاره د صادراتو د پنځو بازارونو څخه یو مهم بازار ګڼل کېږي.
تېرې څو ورځې وړاندې یو بل ایراني چارواکي افغانستان ته د صادراتو په کچه کې د زیاتوالي خبره کړې وه او ویلي یې و، چې د کال په لومړیو شپږو میاشتو کې له ایرانه افغانستان ته د ۶۰۰ ملیونه ډالرو په ارزښت توکي صادر شوي دي.
له ایرانه افغانستان ته په صادراتو کې خوراکي توکي، نفتي مواد او د ودانیزو چارو لپاره کاریدونکي توکي شامل دي.
خو یو شمېر نورو ایراني ادارو څه موده وړاندې افغانستان ته له ایرانه د سوداګرۍ کچه د تېرو کلونو پرتله ټيټه ښودلې وه.
د ایران د اسلامي جمهوریت ګمرک د چنګاښ په دېرشمه راپور ورکړ، چې افغانستان سره د دغه هېواد سوداګري د طالبانو له واکمنېدو وروسته د ارزښت له پلوه لس سلنه او د وزن له نظره نوولس سلنه ټيټه شوې ده.
دغې ادارې زیاته کړې، چې افغانستان د یوې درجې تنزیل سره د ایراني توکو لپاره په شپږم صادراتي هېواد بدل شوی دی.
