د دغه وزارت ویاند ناصر کنعاني ویلي، له تهران څخه یو پلاوی کابل ته تللی چې له طالب چارواکو سره پر بېلابېلو موضوع ګانو خبرې وکړي. هغه یوې خبري غونډې ته وویل، چې د دغه پلاوي په خبرو کې به مهم ټکی له افغانستان سره د ايران د اوبو د حقابې موضوع وي.
د ایران د بهرنیو چارو وزارت ویاند د دغه سفر په اړه نور جزئیات ورنه کړل. هغه زياته کړه: "د دوو ګاونډيو هېوادونو په توګه زموږ ترمنځ په بېلابېلو کچو پلاوي ځي او راځي نو اړتیا نشته چې د پلاويو ټولې خبرې رسنیزې شي."
افغانستان ته د ایراني پلاوي سفر داسې مهال کې کېږي، چې تر دې وړاندې ښاغلي کنعاني د هلمند د حقابې په اړه له طالبانو سره د لومړنیو هوکړو په اړه خبر ورکړی و.
د ایران او افغانستان ترمنځ د اوبو پر سر کړکېچ وروسته له هغې زیات شو، چې ایراني چارواکو د اوبو ور پرېښودلو پرلپسې غوښتنې طالبانو بابېزه وګڼلې او ژمنه يې پر ځای نه کړه.
د ايران د ولسمشر په ګډون د اسلامي جمهوریت چارواکو په وار، وار طالبانو ته د ایران د حقابې په اړه خبرداری ورکړی؛ خو تر داسې خبرداريو وروسته طالبانو د دواړو هېوادونو تر منځ پولې ته خپل ځواکونه لېږلي.
د بلومبرګ خبري اژانس په یوه ځانګړي راپور کې لیکلي، چې د ابراهیم رییسي له ګواښ وروسته، زرګونه وسله وال او سلګونه ځانمرګي چې په امریکايي وسلو، پوځي ګاډو او تجهیزاتو سمبال دي د ایران پولو ته څېرمه رسول شوي دي.
