د اقتصاد وزارت مسلکي مرستیال عبداللطیف نظري ویلي، دغه ۲۲۰مرستندویه بنسټونه يې د تېر یوه کال په موده کې له فعالیته راګرځولي چې له دې ډلې ۴ يې بهرني دي. نظري وایي، د دغو بنسټونو کار ځکه درېدلی، چې د اقتصاد وزارت ټاکلي اصول یې په پام کې نه نیول.
د هغه په وینا د دغو کورنیو او بهرنیو مرستندویه بنسټونو فعالیتونه له دې امله درول شوي، چې د دوو پرله پسې کلونو په اوږدو کې یې دغه وزارت ته خپل راپورونه نه دي ورکړي.عبداللطیف نظري وايي، د دغو بنسټونو د فعالیت بندېدل به تلپاتې نه وي، که چېرې دوی د یاد وزارت له لوري ورته اېښودل شويو شرطونو ته غاړه کېږدي؛ نو دوی ته به بېرته د اصولو له مخې د فعالیت اجازه ورکړي.تر دې وړاندې طالبانو د اعتراض په ډول په افغانستان کې د سویډن هېواد اړوند د سویډني بنسټونو پر فعالیتونو بندیز لګولی و، چې ګنې په سویډن کې د یاد هېواد وګړو د قران کریم نسخې ته اور ورته کړی و.
