په کابل کې د ایران سفارت وایي، ۲۵ کاله وړاندې په مزارشریف کې د دغه هېواد پر کونسلګرۍ برید یو نه بخښوونکی جنایت و، او د دغه برید په کلکه غندنه کوو. ایران د دغې پېښې پړه پر طالبانو اچوي او زیاتوي، چې ایرانیان به هېڅکله دغه غمیزه له یاده و نه باسي.
په کابل کې د ایران سفارت په خپلې ټوېټرپاڼه لیکلي دي، « ۲۵ کاله وړاندې په مزارشریف کې د ایران پر کونسلګرۍ ترهگریز برید شوی و چې په کې د دغې قونسلګرۍ ډیپلوماټان او یو خبریال وژل شوي وو.»
دغه سفارت د خپلو کارکوونکو د وژنې ۲۵م تلین په لمانځلو سره د دغه نه بخښوونکي جنايت د غندلو په ترڅ کې د دغې پېښې د نورو اړخونو د روښانه کولو په اړتيا ټينګار کړی.
دغه څرګندونې داسې مهال مخې ته راځي، چې د کابل او تهران ترمنځ د اوبو پر سر تاوتریخوالی زیات شوی، او د دواړو غاړو ترمنځ د پولې په اوږدو کې څو ځلې تاوتریخوالی رامنځته شوی دی.
ایراني چارواکو تل پر طالبانو تور پورې کړی، چې د کمال خان او کجکي په بندونو کې د اوبو پریمانه پریماني ده؛ خو طالبان دوی ته درواغ وایي چې ګواکې دغه بندونه د وچکالۍ له امله اوبه نه لري.
سره له دې چې د طالبانو حکومت تر دې مهاله هیڅ کوم هېواد په رسمیت نه دی پېژندلی؛ خو ایران تل په سیمه ییزو او نړیوالو ناستو کې ویلي، چې د طالبانو حکومت ټول شموله نه دی او مذهبي او قامي ډلې له واکه بهر پاتې دي.
