د پاکستان د بشري حقونو وزير رياض حسین پيرزاده ويلي، د پاکستان په بریدونو کې افغانان ښکېل نه دي او د پاکستان په وروستيو ترهگريزو پېښو کې د طالبانو حکومت یا د افغانانو تورنول د دواړو هېوادونو ترمنځ د ناسم پوهاوي له امله شوي دي.
د پاکستان ډان ورځپاڼې ته د دغه وزیر څرګندونې د پاکستان د حکومت او پوځي چارواکو له وروستیو خبرو سره یو مخ په ټکر کې دي، چې په پرله پسې ډول یې له افغان خاورې پر پاکستان د بریدونو او وسله والو ډلو د ملاتړ په اړه کړې وې.
کابو لس ورځې وړاندې د باجوړ تر خونړۍ پېښې وروسته پخواني لومړي وزیرشهباز شریف، د پوځ مشرعاصم منیر، د بهرنیو چارو وزیربلاول بوټو او حنا رباني کهر هغه پاکستاني چارواکي وو چې د دغه هېواد د ننه په وروستیو بریدونو کې یې افغانان ښکېل وبلل.
د دغو پاکستاني چارواکو تر څرګندونو وروسته د طالبانو مشر ملا هبت الله د پاکستاني سرچينو له لارې یو فرمان ورکړ، چې په پاکستان کې يې جهاد حرام بللی.
په دې وروستيو کې د بلوچستان په ژوب کې د پاکستاني پوځ پر مرکز او د بلوچستان په سیوۍ کې د امنيتي ځواکونو پر يوه کتار تر بریدونو وروسته چې پوځيان پکې وژل شوي وو، افغانان پکې ښکېل وبلل شول.
وزیر ریاض پیرزاد په ښکاره د کوم هېواد نوم نه دی اخیستی او زیاته کړې يې ده: "ستاسو د ګاونډي هېواد له لارې خلکو ته پيسې ورکول کېږي او نوم په کې د افغانستان بد دی، ځکه چې په سیمه کې له شل کلنې اوږدې جګړې وروسته خلک په پیسو اخیستل شوي او د خلکو له بې وزلۍ ناوړه ګټه پورته کېږي."
کېدای شي د ګاونډي له یادېدو د وزیر اشاره هندوستان ته وي.
د پاکستان د بشري حقونو وزیر زیاته کړه، چې د "پاکستانیانو او افغانانو وینه یو ډول ده چې د دواړو هېوادونو تر منځ ټولنیز، کلتوري او ژبني نږدې والي شته. "
په افغانستان کې د طالبانو د واکمنۍ دوه کاله پوره کېږي، چې د شنونکو په خبره دوی ته تر ټولو نږدې هېواد پاکستان هم د دوی حکومت په رسمیت نه دی پېژندلی، خو تر هغه وروسته په پاکستان کې بریدونو زور اخیستی چې تل يې پاکستاني چارواکي د پړې ګوته طالبانو ته نیسي.
