د امریکا سمندري ځواکونه وایي، په خلیج کې د دغه هېواد په مشرۍ د سمندري ځواکونو ایتلاف، بېړیو ته خبرداری ورکړی، چې د احتمالي نیونې د مخنیوي لپاره د ایران له اوبو لرې پاتې شي. په بحرین کې دامریکا د سمندري ځواکونو یو ویاند هم دا خبرداری تاییدوي.
تیموتي هاکنز وايي: "بیړیو ته مشوره ورکول کیږي چې د امکان تر حده د ایران له اوبو لرې حرکت وکړي."
ښاغلی هاکنز زیاتوي: "د نړیوال سمندري امنیت جوړښت سیمه ییزو ماڼوګانو ته د مناسبو احتیاطي تدابیرو د نیولو خبر ورکوي چېله مخې یې سیمه کې د اوسني تاوتریخواليله امله د نیونې خطر ټیټې کچې ته ورسېږي. موږ د کړکېچکمولو په لټه کې یو."
د رویټرز د راپور له مخې دا خبرداری ښیې چې په هرمز تنګي او شاوخوا کې تاوتریخوالی خورا لوړ دی.
د نړۍ د خامو تېلو او تېليتولیداتو یو پر پنځمه برخه د هرمز تنګي له لارې تېرېږي.
پنځه کاله مخکې ایران وویل، که امریکا یې پر تېلو بندیز لګوي، نو په ځواب کې دا هېواد هرمز تنګی بندوي.
د ایران سمندري ځواکونو د تېر اپریل په وروستیو او د مې په لومړیو کې هم په دغه سیمه کې تېلي بېړۍ ونیولې.
د امریکا سمندري ځواکونو تېره اونۍ وویل، د ایران له خوا د تېل وړونکو بېړیو د نیولو د مخنیوي لپاره په دوو جنګي بېړیو کې له درې زرو ډېر سرتېري له سویز کانال تېر او سور سمندرګي ته رسېدلي دي.
تر دې څو ورځې مخکې امریکايي چارواکو رسنیو ته ویلي وو، د ایران له ګواښونو سره د مقابلې لپاره که له هرمز تېرېدونکې سوداګریزې بېړۍ غوښتنه وکړي، نو پنټګان به په دغو بېړیو کې پوځیان ځای پر ځای کړي.
د دغو چارواکو په خبره، په دې برخه کې لا پرېکړه نه ده شوې او واشنګټن له خلیجي هېوادونو سره سلا مشورې کوي.
