د ایراني رسنیو د راپورونو له مخې د یکشنبې ماښام د " هغو دوو وسله والو په ډزو کې" يو شمېر کسانو ته مرګژوبله اوښتې، چې غوښتل يې د شېراز ښار د شاه چراغ زیارت ته د ننه شي. ایرنا خبري اژانس راپور ورکړی، چې ۲ خادمان او ۲ زیارت کوونکي په ډزو لګېدلي.
رسنیو او چارواکو بېلابېلې شمېرې خپرې کړې دي. ایرنا خبري اژانس د خپلو سرچینو له قوله د وژل شویو او ټپیانو شمېر څلور تنه ښودلی دی.
د فارس والي د شېراز شاه چراغ په دې پېښه کې د يو تن د وژل کېدو او پنځو نورو د ټپي کېدو خبر ورکړ. خو هغه وویل چې دا شمېرې لا کره نه دي.
فارس خبري اژانس وایي، په دغه پېښه کې د ژوبلو کسانو شمېر دوه تنه دی او د دواړو حالت نازک دی.
ايسنا خبري اژانس ويلي، دواړه بريدګر وژل شوي؛ خو فارس خبري اژانس وايي، چې يو بريدګر ټپي شوی او بل بريدګر په تېښته بريالی شوی دی.
د شېراز په شاه چراغ زیارت باندې د تېر کال د لړم میاشتې په څلورمه د "داعش" له خوا وسله وال برید وشو، چې په پایله کې یې ۱۳ تنه ووژل شول او ۲۰ نور ټپیان شول. د ایران د اسلامي جمهوریت یوې محکمې دوه افغانان په دغه زیارت د برید په تور نیولي او اعدام کړي وو.
