د «روادارۍ» په نوم د بشري حقونو سازمان اعلان کړی، چې د روان کال په لومړیو ۶ میاشتو کې لږ تر لږه ۲۸۳ کسان د طالبانو او نامالومو کسانو لخوا په قصدي او مرموز ډول وژل شوي. د راپور له مخې، په وژل شویو کې د تیر حکومت ۵۵ ملکي او پوځي کارکوونکي هم دي.
دغه بنسټ چې د شنبې په ورځ یې په افغانستان کې د بشري حقونو د وضعیت په اړه راپور خپور کړ زیاتوي، چې په ټول افغانستان کې د روان کال په لومړیو شپږو میاشتو کې لږ تر لږه ۵۱۶ کسانو ته په بېلابېلو پېښو کې مرګژوبله اوښتې ده.
رواداري لیکلي دي، په کابل او بدخشان کې په هغو ځانمرګو بریدونو کې چې داعش ډلې یې مسوولیت پر غاړه اخیستی و، کابو ۱۱۱ کسانو ته مرګژوبله اوښتې.
د دغه بنسټ د راپور له مخې، د ډېریو قربانیانو پېژندنه نه ده شوې.
د دغه سازمان په راپور کې زیاته شوې، په دې موده کې د ۲۶ ماشومانو په ګډون ۶۳ کسانو ته د ځای پر ځای شویو ماینونو او له جګړو څخه د پاتې شویو چاودېدونکو توکو د چاودنې له امله مرګژوبله اوښتې ده.
هدفي او په مرموز ډول وژنې
د روادارۍ د موندنو له مخې، سږ کال د طالبانو او نامالومو کسانو لخوا په هدفي، مرموز او په غیرقضایي توګه د ۲۲۹ نارینه و، درې دېرشو ښځو او لسو ماشومانو په ګډون ۳۴۲ کسانو ته مرګژوبله اوښتې ده.
په وژل شویو کسانو کې د تېر حکومت پنځه پنځوس ملکي او پوځي کارکوونکي هم شامل دي.
د طالبانو په زندانونو کې د ۲۷۰ خبریالانو، مدني فعالانو او د بشري حقونو د ملاتړيو بندیانول
د روادارۍ د راپور پر بنسټ، د ۲۰۲۳ کال له پیله تراوسه پورې د افغانستان په بېلابېلو ولایتونو کې د ۲۳ ښځو په ګډون ۲۷۰ خبریالان، د مدني ټولنې غړي او د بشري حقونو ملاتړي د طالبانو لخوا نیول شوي دي.
د ښځو له حقونو سرغړونه په ځانګړې توګه د ښځو د زده کړو او کار څخه مخنیوی او روغتیایی خدمتونو ته نه لاسرسی هغه څه دي، چې په دې راپور کې یې یادونه شوې.
رواداري په خپل راپور کې ویلي، چې د ۵۲ ښځو په ګډون یې له ۳۵۳ کسانو سره د مرکو پر بنسټ د بشري حقونو د سرغړونو پېښې چمتو کړې دي.
