په افغانستان کې د پوځي عملیاتو په اړه د اسلام اباد له خبرداري وروسته، د پاکستان د سولې د مطالعاتو مرکز د دغه هېواد له حکومته وغوښتل، چې د افغانستان په اړه رښتینې پالیسي غوره کړي. مخ پر زیاتېدونکي ترهګریز ګواښونه ددې غونډې د سر، سر موضوع وه.
د پاکستانۍ ډان ورځپاڼې د راپور له مخې، یو شمېر کارپوهانو او پوهانو د پاکستان د سولې د مطالعاتو د مرکز له خوا په جوړه شوې غونډه کې وویل، اسلام اباد باید په افغانستان کې د تحریک طالبان پاکستان د مسلې په اړه جدي خبرې پیل کړي.
د ورځپانې د راپور له مخې، د دغې غونډې ګډونوالو ویلي، چې پاکستان د افغانستان په اړه په خپلو سیاستونو کې ښکاره او دوامدار اراده نه لري.
د کارپوهانو په اند د پاکستان له لوري «پر افغان پوله د اغزن سیم لګول په بشپړه توګه له افغانستانه د ترهګرۍ په مخنیوي کې اغېزمن نه دی.»
د پاکستان یو خبریال او د چارو شنونکی هارون رشید ویلي: «د تحریک طالبان پاکستان موضوع د پاکستان او طالبانو په دوه اړخیزو اړیکو کې یو ستر خنډ دی.»
هغه زیاته کړه:« په دې مسله کې لا هم لوی خنډونه شته، دا به تر هغه دوام کوي چې دواړه لوري ستونزې ته د حل لاره ومومي.»
هغه همداراز ټینګار کړی، چې پاکستان باید د تحریک طالبان پاکستان د کمزوری کولو لپاره پر یوې حل لارې کار وکړی.
په همدې حال کې د پاکستان د جمعیت علمای اسلام مرکزي مشر مفتي محمد قاسم حقاني په دې غونډه کې وړاندیز وکړ، چې د پاکستاني طالبانو د ګواښ په اړه دې د سیمه ییزو علماو او پاکستاني پښتنو مشرتابه یو پلاوی په کابل کې له طالبانو سره وګوري.
