د طالبانو د ریاست الوزار سیاسي مرستیال مولوي عبدالکبیر وايي، چې دا ډله د افغانستان لپاره پر اساسي قانون او نورو فرعي قوانینو کار کوي. نوموړی وایي، د طالبانو مشر هبت الله اخوندزاده د دې قانون د جوړولو موضوع سترې محکمې ته سپارلې ده او «ډېر ژر به افغانستان د اساسي قانون خاوند شي.»
ملا کبیر له طلوع نیوز سره په مرکه کې زیاته کړه: «موږ له امیرالمومنین سره خبره کړې ده، هلته د امارت ډېر چارواکي موجود وو. امیر المومنین دا موضوع د سترې محکمې د رییس په مشرۍ یو هیت ته سپارلې ده. کار پرې روان دی.»
د هغه په خبره: «په نږدې وخت کې به افغانستان د اساسي قانون خاوند او وزارتونه به د فرعي قوانینو خاوندان وي.»
واک ته د طالبانو رسېدو راهیسې د نجونو له شپږم ټولګي پورته زدکړې هم بندې دي.
مولوي عبدالکبیر هم دې موضوع ته په اشاره وايي، تر شپږم پورته د نجونو ښووځي ځکه تړلي پاتې دي چې په نصاب يې کار روان دي، خو دا يې څرګنده نه کړه چې د دوو کلونو په اوږدو کې د نصاب جوړولو کار تر کومه ځایه رسیدلی دی.
مولوي عبدالکبیر وايي، دوی د امریکا او ناټو غلامان نه دي چې حکومت يې ترلاسه کړی؛ بلکې دا يې د افغانانو په ملاتړ ترلاسه کړی دی.
دی وايي، د دوی او ولس تر منځ واټن نشته نو ځکه يې دا دوه کاله په کابل کې حکومت دوام وکړ.
د ده په خبره چې مشر یې مولوي هبت الله ورته اختیار ورکړی، چې د خلکو ورځنۍ چارې په سم ډول مخته بوځي.
سره له دې چې مولوي عبدالکبیر د مرکې په پيل کې په ټول افغاستان کې د امن خبره کوي؛ خو د خپلو خبرو په دوام زیاتوي چې: «يوازې کندهار کې امن دی، مشر ملا هبت الله ویلي چې د مرمۍ ضد ګاډي نورو ولايتونو ته ولېږئ چې هلته امن نشته.»
هغه وايي د افغانستان په اساسي قانون کار روان دی، خو دا يې و نه ويل چې څه کار پرې روان دی.
د کارپوهانو په نظر طالبان تل دا هڅه کوي، چې هغه مسايل له قوانینو وتروړي چې دوی یې خپلو مشرانو او حکومت ته توهين بولي، او وايي چې دا له شریعت سره په ټکر دي، خو تر ډیره دا باور دی چې دوی هر څه په خپله خوښه او سلیقه بدلوي.
مولوي کبیر وايي دوی غواړي چې له نړیوالو سره ښې اړیکې او راشه درشه ولري، خو دا يې و نه ويل چې څه ډول ښې اړيکې.
هغه زیاته کړه، نړیوال ترې داسې غوښتنې لري چې د دوی له ملي او اسلامي ارزښتونو سره په ټکر کې وي: «نړۍ دې راوړاندې شي موږ دې په رسمیت وپیژني ،ځکه چې موږ ټول شرایط پوره کړي. نړیوال له موږ غواړي چې ښځې مو ازادې وي لکه د دوی ښځې چې دي، دا هيڅکله نه منو.»
د ریاست الوزرا سیاسي مرستیال له طلوع نیوز سره په مرکه کې د خپلو خبرو تر منځ یو دريځ نه شي ساتلی او وايي، چې نړیوال اړ دي چې دوی په رسمیت وپېژني.
هغه وړاندې وايي:« دا د اسلامي نظام برکت دی، چې بايډن خپله اعلان وکړ چې نور راته له افغانستانه مشکل نشته، نو دا مجبوریت دی که نه دی؟»
هغه وايي د ملګرو ملتونو د امنيټ شورا ځينو غړو ورته ويلي:« ماته يې شین څراغ راښودلی، چې د همدې امنیت شورا ځينې هېوادونه به ډېر ژر موږ په رسمیت وپېژني.»
خو مولوي کبیر دا و نه ويل چې دا به کوم هېوادونه وي، چې له دوی سره د رسميت په پېژندلو کې به رامخکې شي.
مولوي کبیر وايي، په افغانستان کې بې وزلي او د خلکو اقتصادي حالت له تېر حکومت په ځای پاتې دی هغه زیاتوي: «هغه خلک چې د خوړلو لپاره څه نه لري هغو ته تسلیت وړاندې کوم او الله تعالی دې پر دوی ورحمیږي.»
هغه دا و نه ويل چې د بې روزګارۍ څخه د خلاصون لپاره د دوی حکومت کوم ځانګړی پروګرام په پام کې لري.
د تېرو دوو کلونو په تېریدو لا هم په افغانستان کې د طالبانو حکومت کوم هېواد په رسميت نه دی پېژندلی. ځينو هېوادونو يې د طالبانو کارکوونکي سفارت ته ور پرېښي، خو د طالبانو په رسميت پېژندلو کې بیا د نورې نړۍ سترګو ته ګوري.
