یوې سرچینې افغانستان انټرنشنل ته وویل، د طالبانو د استخباراتو ادارې د پنجشنبې په ورځ د ملي تلویزیون د ارزیابۍ مشر د کرېکټ لوبو په یوه اعلان کې د ښځینه انځورونو د نشرېدو له امله نیولی.
د سرچینې په خبره، د ملي تلویزیون د ارزیابۍ امر ضیاالحق د دې ټلویزیون پخوانی کارمند دی او د طالبانو حاکمیت کې یې هم خپلې دندې ته ادامه ورکړې وه.
سرچینه زیاتوي، چې نوموړي ته د ملي راډیو تلویزون په دروازه کې د استخباراتو له خوا پرسر توره بوجۍ ور اغوستل شوې او په خشن انداز نیول شوی دی.
دغه سرچینه وايي طالبانو د ملي تلویزیون خبري څانګې ته هم په دې پلمه ګواښ کړی چې یوه ژوندۍ خبري ناسته کې یې د یوې مېرمنې لوڅ مخ خبرې خپرې کړې وې.
د سرچینې په خبره، دا کار د استخباراتو لخوا د توند غبرګون سره مخ شوی او د ځینو مسوولینو د نیولو خبرداری یې ورکړی دی.
د طالبانو د ملي رادیو تلویزیون مسوولانو په دې تړاو زموږ پوښتنې ته ځواب را نه کړ.
د ښځینه انځور د خپرولو له امله د ملي تلویزیون د یوه مسوول نیول په داسې مهال دي، چې دې وروستیو کې طالبانو د خپلواکو رسنیو خبریالان هم نیولي دی.
د بې پولې خبریالانو سازمان په خبره، په تېرو لسو ورځو کې طالبانو په ننګرهار، کندهار، کندز، پکتیا او نورو ولایتونو کې نهه خبریالان نیولي دی.
د طالبانو یو شمېر لوړ پوړو چارواکو د پنجشنبې په ورځ د نوي کابل پروژه چې د افغانستان د پخوانیو حکومتونو ه خوا طرحه شوې وه، پرانیسته. د طالبانو د لومړي وزیر اقتصادي مرستیال ملا برادر ویلي، چې د نوي کابل پروژه به د طالبانو او خصوصي سکتور په ګډون پلې شي.
د هغه په وينا، له دې پروژې سره به هېوادوالو ته د پانګونې او کار زمينه برابره شي.
دغه پروژه د کابل په شمال ختيځ او په ده سبز ولسوالۍ کې موقعيت لري، چې د حامد کرزي د ولسمشرۍ پر مهال طرحه شوې وه، خو د ستونزو له امله د دې سترې پروژې کار نه و پيل شوی. د ځمکې اخیستل او استملاک د دې پروژې له یوېستونزو څخه وه.
د ملا برادر مطبوعاتي دفتر په یوې خبرپاڼه کې لیکلي، چې د نوي کابل پروژه د اوسني کابل ښار په پرتله یو نیم چنده لویه ده، چې په ۳۷۰ زره جریبه ځمکه کې په څلورو پړاوونو کې طرحه شوې ده.
طالبانو دغه پروژه په څو برخو ویشلې چې طالب چارواکو یې د پنجشنبې په ورځ دویمه برخه پرانیسته.
د ملا برادر دفتر وايي، د دې پروژې دویم پارسل په ۷۴۰ جریبه ځمکه کې ډیزاین شوی دی.
د افغانستان د پخواني حکومت کابینې په ۱۳۸۸ لمریز کال کې د نوي کابل د پروژې پلان تصویب کړ. نوی کابل چې د درې ملیونو خلکو لپاره جوړ شوی و، په ډیزاین یې شاوخوا شپیته میلیونه ډالره لګښت راغلی.
عبدالسلام حنفي، ملا برادر، د طالبانو د لومړي وزیر مرستیالان، امیرخان متقي، ندا محمد ندیم، دین محمد حنیف، د بهرنیو چارو، د لوړو زده کړو او سوداګرۍ وزیران او همدارنګه په کابل کې د طالبانو والي او د طالبانو د چارو ادارې مشر د دغې پروژې د پرانېستې په مراسمو کې کډون کړی وو.
ملا برادر په دې مراسمو کې وویل، چې د نوي کابل پروژه به ټولې عصري اسانتیاوې له ځان سره ولري.
د طالبانو د لومړي وزیر د دفتر اداري مرستیال عبدالسلام حنفي سیمه ییزو او نړۍوال پانګوال په افغانستان کې د پانګونې لپاره راوبلل.هغه زياته کړه، چې د دې پروژې په پلي کېدو سره به تر ډېره بریده ترافيکي او چاپېريالي ستونزې هوارې شي.
د باختراژانس دخبر له مخې، دوسله والو طالبانو تر واکمنۍ لاندې دنوي کابل دپروژې ماسټر پلان به په دوو پنځلس کلنو مرحلو کې عملي شي، چې په لومړي پړاو کې به یونیم میلیون کسانو ته ۲۵۰ زره استوګنځي د تجارتي، کرهنیز، تفریحي او صنعتي سیمو په ګډون جوړ شي.
د طالبانو د بهرنیو چارو وزیر امیرخان متقي د دې پروژې د پرانستې په مراسمو کې وویل، «دا څرګنده ده چې په سیاسي په ځانګړۍ توګه د رسمیت پیژندې برخې کې ستونزې شته، خو اسلامي امارت په نورو برخو کې د پام وړ پرمختګ کړی دی».
د شانګهای همکارۍ سازمان د پراختیا او د ایروایشیا د یوځایولو برخې مشر وایي، په افغانسان کې سیاسي بې ثباتي ډېره زیاته ده او له دغه هېواد نورو ته بالقوه خطر متوجه دی.
نوموړي د سپوتنیک خبري اژانس له تاجکستان برخې سره مرکه کې ویلي، چین هم د تاجکستان له پوله ساتو ځواکونو سره مرسته کوي، چې د سرحدونو په کنټرول سره خپل ټیکاو وساتي.
ولادیمیر اوسیف چې د خپلواکو همګټو هېوادونو پوځي څېړونکی هم دی وايي، روسیه او چین هم د خپلو پولو امنیت څاري او هم د تاجکستان د پولو په امنیت ټینګولو کې لویه ونډه لري.
د هغه په خبره، له افغانستان ډېره اندازه نشه يي توکي تاجکستان ته قاچاق کېږي.
نوموړي دا هم وویل، چې طالبان د نشه يي توکو له قاچاق سره مبارزه نه کوي.
د تاجکستان ولسمشر امان علي رحمان د دغه هېواد د پولو د امنیت ټینګولو لپاره تېره سې شنبه له افغانستان سره پر پوله څو نوې پوستې پرانیستې.
د افغانستان لپاره د بشري مرستو د همغږۍ دفتر (اوچا) مشر ډینیل انډریس وايي، چې سږ کال ۲۹.۲ میلیونه افغانان یوازې د ژوندي پاتې کېدو په موخه بشري مرستو ته اړتیا لري.
اوچا نن پنجشنبه (د زمري ۲۶مه) د یوې خبرپاڼې په خپرولو سره د دغې ادارې د مشر ډینیل انډریس په حواله؛ په افغانستان کې د بشري مرستو په رسولو کې د دوی د ښځینه همکارانو له هڅو ستاینه کړې او خواشیني یې څرګنده کړې ده، چې د ښځینه همکارانو د کار بندیز له امله یې د مرستو بهیر یو څه ټکنی شوی دی.
نوموړی وايي: “دا ټولو ته جوته ده، چې ښځینه کارکوونکي په نړۍواله کچه په مرستو رسولو کې مهم رول لري”.
ډینیل انډریس زیاتوي؛ په تېرو دوو کلونو کې په پراخه کچه د بشري مرستو د رسېدو له امله ګڼ افغانان ژوندي پاتې دي او که چېرې دوی مرستې نه وی رسولې ښايي یو لوی ناورین رامنځته شوی وی.
د هغه په خبره، چې د مرسته کوونکو د تمویل د بې ساري کمښت له امله د افغانانو د ژوند ژغورنې پروګرامونه په بې ساري او چټکه توګه بند شوي او دوی د می په میاشت کې یوازې له پنځو میلیونو اړمنو افغانانو سره مرسته کړې.
د اوچا مشر روغتیايي ستونزو ته په اشارې وايي، چې تر دا مهاله له ۲۶۰ څخه زیات روغتیايي مرکزونه تړل شوي، چې له امله یې نېږدې دوه میلیونه وګړو روغتیايي خدمات له لاسه ورکړي دي.
انډریس خبرداری ورکوي، چې لېرې نه ده چې یو شمېر نور د بشري مرستو پروګرامونه هم وځنډول شي.
اعلامیه د اوچا د مشر په حواله زیاتوي، چې په روان کال کې ۲۹.۲ میلیونه افغانان یوازې د ژوندي پاتې کېدو لپاره مرستو ته اړتیا لري، چې دا شمېره په تېرو پنځو کلونو کې ۴۸۰ سلنه زیاتوالی ښيي.
نوموړی وايي: “ د بشردوستانه غبرګون پلان لپاره یوازې ۲۵ سلنه تمویل ترلاسه شوی دی او د ۱.۳ میلیارده ډالرو له جدي کمښت سره مخ دی، هغه څه چې د ژمي په رارسېدو سره زیانمنې افغانې کورنۍ به له شدیدې لوږې، ناروغیو او حتا د مرګ له ګواښ سره مخامخ کړي”.
نوموړی په افغانستان کې د یوه سخت بشري ناورین د رامنځته کېدو وړاندوینه کوي او وايي چې د افغانانو د ژوندي پاتې کېدو یوازینۍ هیله بشري مرستې دي.
د یادونې وړ ده، چې له دې وړاندې هم د ملګرو ملتونو چارواکو، بشر حقونو چارواکو او ګڼو نورو نړۍوالو سازمانونو په افغانستان کې د روان بشري وضعیت او د خوړو پر کمښت اندېښنه څرګنده کړې وه.
یوې سرچینې افغانستان انټرنشنل ته وويل تېره شبه ډیورنډ کرښې ته څېرمه د ننګرهار د لالپورې ولسوالۍ په راماتي نوم سیمه کې د پاکستان په ډرون برید کې د پاکستاني طالبانو یو مخکښ مشر اسد اپریدی ټپي شوی او دوه ساتونکي یې وژل شوي دي. تر اوسه پاکستاني طالبانو په دې هکله څه نه دي ویلي.
د طالبانو ننګرهار امنیه قومندانۍ ویاند نن پنچشنبي ( اسد ۲۶ مه ) افغانستان ته انټرنشنل ته وویل چې د افغانستان په خاوره کې د اسد اپریدي ټپي کېدل هیڅ حقیقت نه لري.
تر اوسه تحریک طالبان پاکستان د خپل دغه مشر د وژلو او یا هم د ټپي کېدو په اړه په رسمي ډول څه نه دي ویلي.
د پاکستان حکومت هم تر اوسه د افغانستان په خاوره کې شوي هوايي برید کې د پاکستاني طالبانو پورې اړوند جماعت الحرار کوچنۍ ډلې د یوه مشر اسد اپریدي په نښه کېدو په اړه څه نه دي ویلي.
اسد اپریدی د تحریک طالبان پاکستان لخوا د خیرپښتونخوا ایالت د ډېره اسمعیل خان لپاره د والي په توکه ټاکل شوی و خو د ځینې خپلمنځي اختلافاتو له امله له دندې ګوښه شوی و.
راپورنه وايي اسد اپریدي د پاکستان بلوچستان ایالت ژوب سیمه کې د پاکستاني پوځیانو پر مرکز خونړي برید کې چې څو ځانمرګو بریدګرو کړی و، پړه پر غاړه اخیستې وه او دا کار د دې ډلې د خپلمنځي اختلافاتو لامل وګرځېد.
سرچینې وايي اسد اپریدی د تحریک طالبان پاکستان پر مرکزي شورا نیوکه کړې وه چې د دې ډلې د یوه مشر عمر خالد خراساني د وژلو په تړاو یې څیړنې نه دي کړې.
عمر خالد خراسانی د تحریک طالبان پاکستان له مخښکو مشرانو څخه و چې په افغانستان کې د طالبانو واک ته له رسیدو څو میاشتې وروسته په پکتیکا کې د خپلو څو تنو ملګرو سره د سرک غاړې یوه چاودنه کې ووژل شو.
نوموړی د پاکستان حکومت او ددې ډلې د سولې خبرو اترو ټیم کې هم غړیتوب درلود.
په لالپوره کې د دې هوايي برید په اړه په داسې وخت کې راپورونه لاس په لاس کیږي چې دوه ورځې وړاندې د طالبانو دفاع وزیر ملایقوب ټینګار وکړ چې د افغانستان خاوره چاته خطر نه ده.
هغه د پاکستان له نوم اخیستو پرته زیاته کړه، یو شمیر هیوادونه پر خپلو ځواکونو مېلیاردونه پیسې مصرفوي خو د خپل هیواد امنیت نشی نیولی او پړه پر افغانستان اچوي.
طالبانو د تیرې یکشنبې ( اسد ۲۳ مه ) په خوست مرکز کې هوټل کې شوي برید په اړه تروسه معلومات نه دي شریک کړي چې ځايي سرچینو دا برید ډرون بللی و.
تر اوسه د طالبانو لخوا ددغو وروستیو څو بریدونو په تړاو کوم څرګند غبرګون نه دی ښودلی.
دا بریدونه له هغه وروسته دي چې څه موده وړاندې پاکستاني چارواکو خبرداری ورکړی و چې د دې هیواد ضد وسلوال به په افغانستان په نښه کړي.
د طالبانو د کار او ټولنیزو چارو وزارت د پنج شنبې ورځ د (۱۴۰۲ د زمري ۲۸مه) د افغانستان د خپلواکۍ د بېرته تر لاسه کولو ۱۰۴مې کلیزې په مناسبت په افغانستان کې عمومي رخصتي اعلان کړه، خو لا هم روښانه نه ده، چې په دغه ورځ به لمانځغونډې هم جوړې شي که نه؟
په افغانستان کې د زمري ۲۸ مه هر کال په ډېرو پرتمینو مراسمو سره لمانځل کېده او نږدې په ټولو ولایتونو کې به جشنونه جوړېدل او خلګو به خوشحالۍ کولې.
خو تېر کال په افغانستان کې د خپلواکۍ ورځ هغه ډول ونه لمانځل شوه، لکه څنګه چې نور کلونه کې به لمانځل کېده.
د کابل ښار اوسېدونکی اکرام الله وايي:«تیر کال د خپلواکۍ ورځ موږ هیڅ ونه لمانځله، ځکه طالبانو پر موسیقۍ او ملي بېرغ بندیز لګولی دی.»
نوموړی زیاتوي:« نور کلونه د افغانستان د خپلواکۍ د ورځې د لمانځلو په مناسبت د ښار ټول واټونه د افغانستان په درې رنګه ملي بېرغ پوښل کېده، خو تېر کال چې هر څوک به له ملي بېرغ سره ولیدل شوه پر هماغه ځای به وهل ډبول کېده.»
تېر کال هم د طالبانو له لورې په کابل او یو شمېر ولایتونو کې د خپلواکۍ ورځ ولمانځل شوه.
د طالبانو د دفاع وزیر مولوي محمد یعقوب د دفاع وزارت په انګړ کې د یادې ورځې د لمانځلو پر مهال په وینا کې ويلي و:« موږ اوس په رښتینې ډول ازاد یوو او هیچا پورې تړلي نه یو، زموږ ځواکونه د ملي ګټو پر ضد او یا هم د اسلامي عقیدې بدلون د هیچا په غوښتنه نشي منلی.»
د طالبانو د کار او تولنیزو چارو وزارت د خپلواکۍ د ورځې په مناست په داسې حال کې د عمومي رخصتۍ اعلان کوي، چې د طالبانو ګن شمېر چارواکي د شاه امانو الله د مفکورې سرسخته مخالفت کوي.
د طالبانو د لوړو زده کړو وزېر ندا محمد ندیم په یو ویډیو یې کلیپ کې د افغانستان د خپلواکۍ تر لاسه کوونکي شاه امان الله خان په اړه ویلي :«دغه امان الله خان پر غربیانو او کافرانو باندې و ګرځید او د هغې خوا یې دا فرموله راوړه، چې ښځې ولې په کورونو کې ناستې دي ښځې ولې ښوونځیو ته نه ځې؟همدغه د عیاشۍ او فاحشۍ نسخه یې راوړه او غوښتل یې په افغانستان کې یې عملي کړي. دغه قدرمن علما ورته ودریدل او ورته یې ویل موږ دا در سره نه منو. دا د اسلام، افغانیت او غیرت سره په ټکر کې دي. هغه ظالم(امان الله خان)علماو ته ویلي و، د ټولنې فساد تاسو یاست، پر دا علماو یې د فساد نوم کښیښود، علمآ یې بندیان کړل او ډیر مشکلات یې ورته جوړ کړه.»
هغه مهال د طالبانو د لوړو زده کړو د وزیر څرګندونې په ټولنیزو رسنیو کې د افغانانو له سخت غبرګون سره مخامخې شوې.
د دې تر څنګ د طالبانو یو شمیر نورو چارواکو هم د شاه امان الله خان په اړه د سپکاوي ډکې ویناوې کړي دي.
همدارنګه طالبانو د افغانستان په یو شمیر ولایتونو کې د شاه امان الله خان نقاشي شوي انځورونه او د افغانستان دري رنګه ملي بیرغ چي پر واټونو او دیوالونو نقاشي شوي ول، له منځه وړي دي.
یو شمیر افغانان د ملي مسایلو په اړه د طالبانو د نرمښت هرکلی کوي. د کندهار اوسیدونکې ډاکتره فرزانه افغانستان انټرنشنل پښتو ته وايي:«طالبان په ډیرو مسایلو کې د شاه امان الله د فکر سره مخالف دي، خو پر دې هیڅوک سترګې نشي پټولی چې د شاه د واکمنۍ پر مهال افغانستان یو بشپړ خپلواک هېواد اعلان شو، زه هیله لرم چې طالبان زموږ درې رنګه ملي بیرغ ته هم اجازه ورکړي او تر څنګ یې د شاه امان الله په څېر د ډیموکراسۍ اصولو ته غاړه کیږدي.»
دا په داسې حال کې ده چې طالبانو د اګسټ ۱۵ مه د خپلې بریا او آزادۍ د ورځي لمانځلو په موخه رخصتي اعلان کړي وه، او نږدې د هېواد په ټولو ولایتونو کې یې یاده ورځ ولمانځله.
کندهار اوسېدونکې ډاکتره فرزانه افغانستان انټرنشنل پښتو ته وايي:« طالبان په ډېرو مسایلو کې د شاه امان الله د فکر سره مخالف دي؛ خو پر دې هیڅوک سترګې نشي پټولی چې د شاه د واکمنۍ پر مهال افغانستان یو بشپړ خپلواک هېواد اعلان شو، زه هیله لرم چې طالبان زموږ درې رنګه ملي بېرغ ته هم اجازه ورکړي او تر څنګ یې د شاه امان الله خان په څېر د ډیموکراسۍ اصولو ته غاړه کېږدي.»
دا په داسې حال کې ده چې طالبانو د اګسټ ۱۵ مه د خپلې بریا او ازادۍ د ورځې لمانځلو په موخه عمومي رخصتي اعلان کړې وه، او د هېواد په ټولو ولایتونو کې یې یاده ورځ ولمانځله.
