د ایران د بهرنیو چارو وزیر حسین امیرعبداللهیان په جده کې د سعودي عربستان له ولیعهد محمد بن سلمان سره وکتل. د پرېس ټي وي د راپور له مخې دغه ناسته د تړلو دروازو تر شا شوې ده.
دا لیدنه د ایران او ریاض د اړیکو د تودېدو او پراخیدو یوه ستره نښه بلل شوې ده.
د پرېس ټي وي د راپور له مخې، د سعودي عربستان د بهرنیو چارو وزیر شاهزاده فیصل بن فرحان هم په د ناسته کې حضور درلود.
د سعودي په رسنیو کې د دې ناستې په اړه راپور نه دی خپور شوي.
د ایران د بهرنیو چارو وزیر د پنجشنبې په ورځ په ریاض کې له خپل سعودي سیال سره له کتنې وروسته وویل چې د ایران او سعودي عربستان اړیکې مخ په ښه کېدو دي.
د ایران او سعودي ترمنځ اړیکې اوه کاله مخکې ریاض کې د یوه مشهور شیعه عالم شیخ نمر په اعدام او په تهران او مشهد کې د سعودي پر ډیپلوماتیکو ماموریتونو د اعتراض کوونکو له حملې وروسته ترینګلې شوې وې.
ايران او سعودي عربستان د چين په منځګړتوب موافقه وکړه چې له کلونو کړکېچ وروسته خپلې ډیپلوماتيکې اړيکې بيا پيل کړي.
تهران او ریاض له لبنان څخه نیولې تر سوریې، یمن او عراق پورې په ډېرو سیمه ییزو شخړو کې ښکېل دي.
ډیری په دې باور دي چې د دغو دوو سیالانو او ستر سیمه ییز ځواکونو نږدېوالی به په سیمه کې له سولې او ثبات سره مرسته وکړي.
