د روسیې د هوايي ځواکونو قوماندان سرګئي سوروویکین له دندې ګوښه شو
د روسیې دولتي خبري اژانس ریانووستي د یوې باخبرې سرچینې په حواله راپور ورکړی، چې د روسیې د هوايي او فضايي ځواکونو قوماندان سرګئي سوروویکین له دندې ګوښه شوی دی.
د روسیې دولتي خبري اژانس ریانووستي د یوې باخبرې سرچینې په حواله راپور ورکړی، چې د روسیې د هوايي او فضايي ځواکونو قوماندان سرګئي سوروویکین له دندې ګوښه شوی دی.
دغه خبري اژانس د چهارشنبې په ورځ (د وږی لومړۍ نېټه) لیکلي، چې د هغه پرځای ویکتور افزلوف په موقت ډول ټاکل شوی دی.
سرګئي سوروویکین د ۲۰۱۷میلادي کال په اکتوبر میاشت کې د روسیې د هوايي او فضايي ځواکونو د مشر په توګه وټاکل شو.
هغه پر اوکراین د روسیې له برید وروسته، یو څه وخت لپاره د روسیي پوځیانو د یوې ډلې لپاره د جګړې قوماندان و.
د روسیې ولسمشر ولادیمیر پوتین په ۲۰۲۱میلادي کال کې د ښاغلی سوروویکین رتبه جنرالۍ ته لوړه کړه، او په ۲۰۲۲ میلادي کال کې یې ورته د زړورتیا مډال ورکړ.
د خپرو شویو راپورونو له مخې؛ نوموړی د روسیې له دفاع وزارت سره د واګنر ډلې اړیکو درلودونکی کس و، خو د دغې ډلې له پاڅون وروسته نور په عام محضر کې نه دی لیدل شوی.
د ریانووستي خبري اژانس په حواله، سرګئي سوروویکین به په بل پوست کې په کار وګمارل شي، خو اوس هغه په "رخصتۍ" کې دی.
