تایوان د چین په مقابل کې د خپلې دفاع د پیاوړتیا لپاره راتلونکی کال د نږدې درې میلیارد ډالرو په ارزښت وسلې او مهمات اخلي. د تایوان دفاع وزیر پو هارنګ های وايي، دې تجهیزاتو کې د اېف شپاړس جېټ الوتکو ډېر پیاوړي کشفوونکي سیستمونه هم شامل دي.
پو هارنګ های د پنجشنبې په ورځ- د وږي دویمه- دې سیستمونو ته په اشارې وویل، دا د پلټنې او کشف داسې سیستمونه دي چې د امریکا خورا پرمختللې اېف ۳۵ او اېف ۲۲ جېټ الوتکې یې کاروي.
د هغه په خبره، دا نوي تجهیزات به له تایوان سره مرسته وکړي چې په تایوان تنګي کې له رادار پټېدونکې جي شل الوتکې په نښه کړي.
د نوموړي اشاره د چین جنګي الوتکو ته وه.
چین،تایوان ته د خپلې خاورې په سترګه ګوري او په تیرو دریو کلونو کې یې د دې ادعاوو د ثابتولو لپاره پوځي او سیاسي فشارونه زیات کړي. خو مقابل لوری د بېجینګ د مالکیت ادعا په کلکه ردوي.
د تایوان ولسمشر تسای انګ وین د دوشنبې په ورځ وویل، د راتلونکي کاللپاره دفاعي لګښت څه باندې شپږ نیم سوه میلیارده تایواني ډالر وړاندیز شوی دی، چې تر تیر کال ۳.۵ سلنه زیات دی.
د تایوان د احصايي ادارې ویلي، له نږدې درې میلیارد ډالرو به نیمايي د جنګي الوتکو پر پېرلو او پاتې به د سمندري دفاع پر پیاوړتیا ولګول شي.
د امریکا دفاع وزارت هم د چارشنبې په ورځ تایید کړه چې پر تایوان د اېف شپاړس جنګي الوتکو لپاره د کشف او پلټنې سیستم په ګډون نور مهمات پلوري.
