برېکس د سعودي او ایران په ګډون ۶ هېوادونو ته په دغه اقتصادي بلاک کې د غړیتوب بلنه ورکړه

د روسیې دولتي خبري اژانس ریانووستي؛ د پنجشنبې په ورځ (د وږی دویمه) د دغه هېواد د دفاع وزارت په حواله خبر ورکړ، چې د اوکراین څلور دیپوګان یې په بېلابېلو سیمو کې هم ویجاړ کړي دي.

د روسیې د دفاع وزارت ویلي، چې دوی خپل هدف ترلاسه کړی او ټول توغندي یې ټاکلي هدف ته رسولي دي.

مسکو وايي؛ په اوکراین کې د روسیې تر ولکې لاندې سیمو کې یې د کیف شپږ بریدونه هم شڼډ کړي دي.

د روسیې د بهرنیو چارو د وزارت ویاندې ماریا زاخارووا پرون (چهارشنبه د وږی لومړۍ) ویلي وو، چې د دغه هېواد پوځ به په مسکو کې د اوکراین د بې پیلوټه الوتکو د بریدونو ځواب ورکړي.

د ایران د بهرنیو چارو وزارت ویاند د چهارشنبې په ورځ هلمند سیند ته د ایراني پلاوي وروستی سفر له طالبانو سره د همکارۍ نښه وبلله.

ناصر کنعاني وايي: “موږ د تخنیکي پلاوي سفر د افغان لوري د ژمنو او د هیرمند سیند د مسالې په اړه د ۱۳۵۱ کال د تړون د یوې برخې د تطبیق په معنا ګڼو”.

د نوموړي په خبره، چې د تړون له مخې دا ډول لیدنې باید په منظم ډول په میاشت کې یو ځل ترسره شي.

له څو میاشتو مقاومت وروسته طالبانو د هلمند سیند له رود خانو څخه د لیدنې لپاره ایراني تخنیکي پلاوي ته اجازه ورکړې ده.

د ایران تخنیکي بورډ د دهراود د اوبو د اندازه کولو وسیلې له اندازه ګیرۍ وروسته ومنله، چې د اوبو جریان د پخوا په پرتله کم شوی، خو ایران بیا هم ټینګار کړی چې دوی ته باید اوبه ورکړل شي.

د طالبانو د بهرنیو چارو وزیر د چهارشنبه په ورځ وویل، چې دې ډلې د "ایرانیانو اندېښنې" حل کړې، مګر هغه روښانه نه کړه، چې ایا طالبانو هلمند سیند ته د ایراني تخنیکي پلاوي د میاشتینیو لیدنو غوښتنه منلې که نه.

په تېرو میاشتو کې د ایران د چارواکو او طالبانو ترمنځ لفظي شخړې د دواړو لورو ترمنځ په اړیکو کې د کړکیچ سبب شوه او په ورته وخت کې د دواړو لورو ترمنځ د یو لړ سرحدي وسله والو نښتو سبب هم شوې.

ای بي سي نیوز د روسیې فدرالي هوايي ترانسپورت ادارې په وینا لیکي، چې د چهار شنبې په ورځ د مسکو په شمال کې هغه الوتکه رالوېدلې، چې د مسافرینو په لېست کې یې د واګنر ډلې د مشر پریګوژین نوم هم شامل دی.

په پېښه کې لس تنه وژل شوي، خو تر اوسه څرګنده نه ده، چې پرېګوژین په رښتیا هم په الوتکه کې سپور و او که نه؟

یاده اداره وايي، چې اوس مهال د پېښې په اړه پلټنې روانې دي، چې معلومه کړي په دغه الوتکه کې د واګنر ډلې مشر و او که نه.

دغه اداره وايي: “د ایمبریر یوه الوتکه چې نن ماخوستن مهال را نسکوره شوې، د مسافرو په لېست کې یې یوګیني پریګوژین نوم او تخلص هم شامل دي."

په وژل شویو لسو کسانو کې درې د الوتکې د عملې غړي او اوه مسافر شامل دي. په الوتکه کې سپاره ټول کسان وژل شول.

واګنر ته یوې نېږدې ډلې په ټیلګرام کې ویلي، چې د دغې ډلې د مشر الوتکه له مسکو څخه سنت پترزبورګ ته پر لار وه، چې د یوه هوايي توغندیز برید پر وسیله سقوط شوې ده.

پریګوژین د خصوصي نیمه پوځي وسلوالې ډلې واګنر مشر دی، چې د جون په میاشت کې د روسیې د اردو پر وړاندې د لنډ مهال لپاره بغاوت وکړ او وروسته د مذاکراتو له لارې له بغاوته لاس پر سر شو.

د امریکايي ماشومانو اکاډمي په یوه څېړنیز راپور کې د امریکا د ناروغیو د کنټرول او وقایې مرکز د معلوماتو پر بنسټ وايي، چې په ۲۰۲۱ میلادي کال کې د امریکا ۴۷۵۲ ماشومان د وسلوال تشدد له امله وژل شوي دي.

دغه اکاډمي وايي، چې دا وژنه د امریکا په تاریخ کې بې سارې ده.

د دغې اکاډمۍ څېړنې ښيي، چې په وژل شویو ماشومانو کې یې ۶۷ سلنه تور پوستې ماشومان دي.

د کامن ډریمز د راپور له مخې؛ د امریکا متحده ایالتونه په نړۍ کې تر ټولو زیات د وسلوال تشدد قربانیان لري.

راپور زیاتوي چې یوازې په تېر کال کې د وسلوال تشدد له امله په امریکا کې ۴۴۳۵۷ کسان وژل شوي، چې نیمايي برخه یې د ځان وژنې پېښې وې.

بلخوا د امریکا ولسمشر هم د دغو پېښو د زیاتېدو کانګرس ته بار – بار ویلي، چې د وسلو د کنټرول نوې لایحه ژر تر ژره تصویب کړي.

له تېرو دوو اونیو راپه دېخوا ځنګلي اورونو د هاوایي ایالت د ماوي ټاپو وسوځاوه او د دغه ایالت چارواکو له مرکزي ادارې څخه د مرستې غوښتنه هم کړې ده.
د دغه ایالت والي ویلي، چې تر اوسه ۱۱۵ کسانو مړینه تایید شوې او په نورو پسې د پلټنې اداره پلټنې کوي.

فاکس نیوز د ماوي د پولیسو د مشر جان پېلټیر په حواله ویلي، چې ښايي د مړو په شمېره کې د پام وړ بدلون راشي او په نېږدې راتلونکي کې به د بې درکه شویو کسانو لېست خپور کړي.

تېره اونۍ د لاهینا چارواکو ویلي وو، چې د ۱۱۵ جسدونو څخه یې یوازې ۲۷ تنه پېژندل شوي او د نورو د پېژندنې لپاره اړتیا ده، چې د ډي این ای بېلګې یې واخیستل شي.

د هاوايي ایالت دغه اورلګېدنه د امریکا په تېر سل کلن تاریخ کې بې سارې بلل شوې او درانه مالي زیانونه یې هم اړولي دي.

د یادونې وړه ده، چې د تېرې دوشنبې په ورځ د امریکا ولسمشر جو بایډن هم دغه ایالت ته سفر کړی و او د قربانیانو له کورنیو سره یې د مرستې ژمنه کړې وه.