د روسیې د بهرنیو چارو وزیر سرګي لاوروف وایي، چې جرمني او جاپان د امریکا د غوښتنو پر بنسټ عمل کوي. نوموړي په سویلي افریقا کې د برېکس سرمشریزې غونډې په څنډه کې وویل، چې په امنیت شورا کې د جرمني او جاپان دایمي غړیتوب "بې انصافي زیاتوي."
د روسیې د بهرنیو چارو وزیر وايي، برلین او ټوکیو د نورو لویدیځو هېوادونو په څېر "د واشنګټن اطاعت کوونکي دي."
د روسیې د بهرنیو چارو وزارت د یوه راپور له مخې سرګي لاوروف ویلي، چې جرمني او جاپان د امنیت شورا بحثونو ته کومه نوې موضوع نه راوړي.
سرګي لاوروف تر دې مخکې ویلي وو، چې مسکو د ملګرو ملتونو د امنیت په شورا کې د اسیایي، افریقایي او لاتیني امریکا د هېوادونو د غړیتوب د پراخولو په لټه کې دی.
روسیه، چین، فرانسه، برېټانیا او امریکا د امنیت شورا پنځه دایمي غړي هېوادونه دي.
په امریکا کې د موټر پلورنځیو یوه پلورونکي بېزنس انسایډر وېبسایټ ته ویلي، چې د برېښنايي موټرو د پېرلو کچه کمه شوې ده. دوی د موټرو له شرکتونو څخه د نويو فرمایشونو اخیستل بند کړي دي. لوړه بیه او د چارج سټېشنونو کموالي د پېرودلو لېوالتیا کمه کړې ده.
د موټرو شرکتونو په پراخه پانګونې سره د برېښنایي موټرو د تولیدولو وړتیا زیاته کړې ده.
اوس د موټر جوړولو صنعت د برېښنایي موټرو د لوړې غوښتنې او کمښت له پړاوه د تولید لوړې مرحلې ته رسېدلی دی.
د موټرو د مشورتي شرکت یوه مرستیال سام فیوراني انسایډر بېزنس ته وویل، چې برېښنایي موټرونه د تېلو موټرو پرتله لږ تر لږه 10,000 ډالر ګران دي.
هغه زیاته کړه، چې پېرودونکي په اوږدو لارو کې د چارج سټېشنونو په نه موندلو اندېښمن دي او دغو دوو لاملونو د پېرېدونکو شمېر کم کړی دی.
د برېښنایي موټرو د پېرېدونکو کمښت د چاپېریال پوهانو لپاره ښه خبر نه دی، ځکه دوی هیله درلوده چې په امریکا کې برېښنایي موټر زیات شي.
اوس مهال په دغه هېواد کې د موټرو خرڅلاو د ټول بازار شپږ سلنه برېښنايي موټر جوړوي.
موټر پلورونکو انسایډر بېزنس ته وویل، چې د دغو موټرو د تولید په کچه بازارونه نه شته چې په پایله کې یې د پلورنځیو پوړونه د پلور لپاره د برېښنایی موټرو څخه ډک دي، نو ځکه دوی د نورو برېښنایي موټرو له اخیستو ډډه کوي.
ډونالډ ټرمپ د ۲۰۲۰ کال د ټاکنو په پایلو کې د بدلون راوستلو په تور ځان جورجیا ایالت فولتون کانټي زندان ته تسلیم کړ. له هغه څخه د نېونې عکس واخېستل شو او د ۲۰دقیقه یي بند وروسته د دوه لکه ډالرو د ضمانتي وثیقې له شرایطو سره سم خوشې شو.
ټرمپ د امریکا په تاریخ کې لومړنی ولسمشر دی، چې په خپله ځان زندان ته سپاري. زندان ته تر رسېدو څو شېبې وروسته، د فولټون کانتي دفتر اعلان وکړ، چې په زندان کې د ټرمپ څخه د نېولو عکس واخېستل شو.
له شلو دقېقو وروسته، د ډونالډ ټرمپ د ساتونکو د موټرو کاروان له زندانه ووت.
ټرامپ له زندانه تر ستنېدو وروسته، د اتلانتا په هوایي ډګر کې خبریالانو ته د هغه پر ضد د اعلان شویو جرمونه «ټاکنیز دخالت» وباله او ټينګار یې وکړ، چې هېڅ ډول تېروتنه یې نه ده کړې.
هغه وویل:«موږ له هر پلوه دا حق لرو، که فکر کوو ټاکنې رښتینې او رڼې نه وې، هغه باید وننګوو.»
د امریکا د استازیو جرګې غړي مارجري ټېلور وویل، د ډونلډ ټرمپ د نېونې عکس د ۲۰۲۴ کال په ولسمشریزو ټاکنو کې د هغه د بریالیتوب لامل ګرځي.
د استازیو د جرګې د جمهوري غوښتونکي ګوند غړي تروی نلز هم د ټرمپ د نېولو د عکس په غبرګون کې وویل: «دا د امریکا د اووه څلوېښتم ولسمشر عکس دی.»
زندان ته د ټرمپ له رسېدو وړاندې، د هغه ګڼ شمېر پلویان د فولټون کانټي زندان مخې ته راغونډ شوي وو؛ خو د هغه د مخالفانو یوه کوچنۍ ډله هم د زندان مخې ته راټوله شوې وه.
په همدې حال کې، د دغه ښار پولیسو د فولټون کانټي زندان په شاوخوا کې کوټلي امنیتي ګامونه اخیستي وو او دغه زندان ته یې ټولې ورغلې لارې تړلې وې.
جمهوري غوښتونکي سناتور مارکو روبیو په جورجیا کې زندان ته د ټرمپ د سپارلو په اړه وویل: هغوی چې پریکړه کړې د څارنوالۍ له خوا د سزا د ورکولو، او له اخیستل شویو عکسونو څخه په ټاکنېزو منډو ترړو کې ګټه پورته کړي، د امریکا د سیاست په تاریخ کې یې یوه ویجاړوونکې دوره پيل کړې ده.
د امریکا د استازیو جرګې جمهوري غوښتونکی غړي الیز اسټفنیک هم وویل: بایډن غواړي، چې د ټرامپ پر ضد له دولتي امکاناتو کار واخلي او سپينې ماڼۍ ته د خپل دغه ټاکنیز سیال مخه ونیسي.
جمهوري غوښتونکي سناتور مارشا بلکبرن هم وویل، زندان ته د ډونالد ټرمپ تسلیمېدنې امریکا ته «خطرناک تاریخ» پر ځای پرېښود.
هغه وویل: «امریکایان کولای شي ټرمپ ته د سزا ورکولو جوړه شوې دسیسه په سترګو وویني.»
تر دې مهاله له لسو تر اتلسو کسان چې د ټرمپ سره یو ځای په دغه جرم ګرم ګڼل شوي، ځانونه یې تسلیم کړي چې له هغې ډلې یې کولای شو د ټرمپ وکیل رودي جولیاني او د هغه د دفتر پخواني رییس مارک مدوز نومونو ته اشاره وکړو.
ټرمپ تل پر هغه لګول شوي تورونه د جوبایدن له خوا د ۲۰۲۴ کال په ټاکنو کې د هغه د بریالیتوب د مخنیوي هڅې بللي.
د روسیې ولسمشر ولادیمیر پوتین په یوه ویډیويي پیغام کې د واګنر وسلوالې ډلې کورنۍ او د ګروپ غړو ته خواخوږي وړاندې کړې او هغه یې یو باصلاحیته شخص یاد کړی، نوموړي زیاته کړې، چې پریګوژین جدي تېروتنې هم کړي دي.
د روسیې ولسمشر پوتین د پریګوژین د الوتکې له لوېدو یوه ورځ وروسته خپله خاموشي ماته کړه او د نوموړي د وژنې په اړه یې خپل پیغام خپور کړ.
وروسته له څلرویشتو ساعتونو د روسیې حکومت د اجیرې پوځي ډلې د مشر واګنر مړینه تایید کړه، چې په خونړۍ جګړه او د باخموت په سقوط کې یې مهم رول درلود.
هغه د روسیې له دفاع وزیر او اوکرایني جنګسالارانو سره د اختلافاتو له امله بغاوت وکړ.
ولادیمیر پوتین د اوکراین په جګړه کې د پریګوژین او د هغه د جنګیالیو ونډه وستایله او په افریقا کې یې د دې ډلې د رول ستاینه وکړه.
د مسکو په شمال کې د خپلې شخصي الوتکې د غورځېدو په پېښه کې د پریګوژین ناڅاپي مړینې د نړۍوالو پام پوتین ته اړولی او منتقدین یې وايي، چې پوتین په روسیه کې خپل مخالفین ځپلي او د ګڼو مخالفینو پر وژنې تورن دی.
رویټرز د دوو امریکایی چارواکو په حواله راپور ورکړی، چې د واګنر ګروپ د مشر الوتکه د روسیې په خاوره کې دننه له ځمکې څخه هوا ته د راکټ په واسطه ویشتل شوې ده.
د ناروې لومړي وزیر د پنجشنبې په ورځ اوکراین ته د ایف- ۱۶ جنګي الوتکو د ورکولو له پرېکړې خبر ورکړ.
په یوې بیانیه کې یوناسګار استوره وویل؛ د جنګي الوتکو د شمېر او د ورکړې د وخت په اړه به وروسته معلومات وړاندې کړي.
د دې ژمنې له اعلان سره سم؛ استوره (د وږی دویمه) د اوکراین د خپلواکۍ د ورځې په مناسبت په یوه ناڅاپي سفر کیف ته ولاړ.
مخکې له ناروې ډنمارک او هالند هم د یکشنبې په ورځ (د زمري ۲۹مه) ویلي وو، چې ورته جنګي الوتکې به اوکراین ته ورکوي.
دغه پوځي الوتکې کولای شي د اوکراین پوځ په لوړه کچه پیاوړی کړي.
د جنګ متخصصین وايي، چې د دوی کارول پېچلې روزنې او پاملرنې ته اړتیا لري. ځینو بیا د امریکا جوړو شویو جنګي الوتکو لپاره د روسیې پرمختللی هوایي دفاعي سیستم ستره ننګونه ګڼلې ده.
ډنمارک پلان لري، چې تر ۲۰۲۵میلادي کال پورې ټولټال ۱۹، ایف ۱۶ الوتکې اوکراین ته ورکړي. په همدې حال کې هالنډ وايي، چې کیف ته به د دغو جنګي وسایلو د شمېر په اړه له خپلو نړۍوالو ملګرو سره سلا مشورې وکړي.
پوځي کارپوهان په دې باور دي، چې دا الوتکې به په سږني اوړي کې د اوکراین د برید ضد ځواکونو د وړتیاوو پر زیاتولو اغېز ونه کړي.
دا ممکنه ده، چې د اوکراین پوځ شاید د کال په پای کې له هغوی څخه په پوځي عملیاتو کې کار واخلي؛ ځکه چې د دغو نویو الوتکو د ساتلو او کارولو لپاره د پیلوټانو او د ټول اړین پرسونل روزنه وخت ته اړتیا لري.
د الحبتور خیریه بنسټ رییس وايي، چې درې افغانې نجونې نن پنجشنبه دوبۍ ته رسېدلي او ډېر ژر به په خپلو زده کړو پیل وکړي.
د متحده عربي اماراتو د الحبتور خیریه بنسټ له خوا نېږدې سلو افغانو جونو ته په اماراتو کې د زده کړو زمینه برابره شوې وه، خو د تېرې چهارشنبې په ورځ طالبانو د دغو نجونو د سفر مخه ونیوله.
عرب میلیاردر خلف بن احمد الحبتور ویلي، چې درې نجونې دوبۍ ته ور سېدلي او ډېر ژر به خپلو زده کړو پیل وکړي، نوموړي تېره ورځ (چهارشنبه) په یوه ویډیويي پیغام کې افغانو نجونو ته یې د زدکړو زمینه برابره کړې وه؛ خو طالبانو له افغانستان څخه د وتلو اجازه ورنه کړه.
الحبتور د طالبانو دا ګام یوه تراژیدي او پر انسانیت، زدکړو، برابرۍ او عدالت ګوزار بولي او له ښکېلو لورو غواړي چې د دې نجونو «د ژغورلو هڅې وکړي.»
دغې پېښې په نړۍواله کچه پراخ غبرګونونه راپارولي؛ خو طالبانو تراوسه په دې اړه چې ولې یې ددغو نجونو زده کوونکو د سفر مخه نیولې رسنیو ته څه نه دي ویلي.