د پاکستان د سیند حکومت پرېکړه کړې چې کوم مور پلار خپلو بچیانو ته واکسین نه کوي، له یوې میاشتې بند او ۵۰ زره روپیو جرمانې سره به مخ شي. د نوي قانون له مخې د واکسین خلاف تبلیغ کې ښکېل کس ته هم شپږ میاشتې بند او یو لک روپۍ جرمانه ټاکل شوې ده.
د پاکستاني رسنیو د راپور له مخې، د سیند حکومت دا هم وايي، چې د واکسین بریښنايي ریکارډ هم جوړېږي او تر دې وروسته به هغو کسانو ته زېږلیک یا د زېږېدو سند نه ور کول کېږي چې واکسین یې ثبت شوی نه وي.
د سیند والي کامران ټیسوري پرون - د اګسټ ۲۵- دا لایحه تصویب کړې ده چې موخه یې د پولیو او نورو ناروغیو مخنیوی او د هغو په مقابل کې بدني پیاوړتیا ښودل شوې ده.
افغانستان او پاکستان په نړۍ کې دوه داسې هېوادونه دي چې پولیو پکې شته.
پاکستان کې د پولیو او نورو واکسینونو لپاره هڅې په داسې مهال دي چې په افغانستان کې د طالبانو واکمنېدو سره د دې واکسین هڅې ټکنۍ شوې دي.
د روغتیا نړیوال سازمان تازه خبرداری ور کړی چې په کندهار کې د پولیو ضد کور په کور کمپاین په محدودېدو سره په دغه ولایت کې ماشومان په پراخه کچه د پولیو له سخت خطر سره مخ دي.
دغه سازمان وايي، سږ کال په افغانستان کې د پولیو ۳۲ مثبتې پېښې ثبت شوې دي
